د کابل ښار پر واټونو يوشمېر پلورونکي د طالبانو حکومت له هغه اقدام څخه چې د سړکونو له غاړې غرفې او لاسي کراچۍ راټولوي شکایت کوي.
په کابل ښار کې د سړک د غاړو یوشمېر پلورونکي د طالبانو حکومت لهخوا د دوی پر کار د بندیز په اړه شکایت کوي او وايي چې لهدې سره به هغوی وزګار شي.
دوی د شنبې په ورځ له ازادي راډيو سره په خبرو کې ادعا وکړه چې، د دوی د مالونو او غرفو د راټولولو امر شوی دی.
"ښاروالۍ یوه ورځ راځي چې پورته شه، بله ورځ راځي وايي ټول کړه، وهل ټکول کويجليل، کابل کې يو سودا پلورونکی
د کابل ښار پر واټونو یو تن پلورونکی جلیل د طالبانو حکومت د ښاروالۍ د چارواکو له ناوړه چلند څخه شکایت کوي او ټینګار کوي چې د دوی لپاره باید یو مناسب ځای په پام کې ونیول شي.
هغه وايي: "ښاروالۍ یوه ورځ راځي چې پورته شه، بله ورځ راځي وايي ټول کړه، وهل ټکول کوي وايي دلته څه مه پرېږده چې څه کېږدې راځي وايي ولې. زموږ غوښتنه دا ده چې د بازار دننه دې موږ ته یو مناسب ځای برابر کړي."
همدا شان جميل چې یو بوټ ګنډونکی یا موچي دی او په کابل کې د سړک پر غاړه یوه غرفه لري وايي، پهداسې حال کې چې په افغانستان کې بېوزلي او بېکاري زیاته ده، دا اقدام به د دې لامل شي چې د پلازمېنې ډېری اوسېدونکي وزګاره شي.
هغه د طالبانو له حکومته غواړي چې لومړی دې په شرکتونو او فابریکو کې د واټونو د سر پلورونکو او غرفه لرونکو ته د کار زمینه برابره کړي: "ښاروالۍ دومره فکر نهکوي چې دولت کوم شرکت نهدی جوړ کړی چې خلک ولاړ شي او شرکتونو کې کار وکړي، کراچۍ ټولوي خو نه پوهېږي چې دوی به څه وخوري. د خوړولو لپاره ډوډۍ نهلرو او دوی د ښار د صفايي په هکله وايي."
د واټونو د سرپلورونکي شکايت کوي، چې تر اوسه ورته بديل ځای هم نهدی مشخص شوی.
کله نا کله په ټولنیزو رسنیو کې په کابل کې د طالبانو حکومت د ښاروالۍ د مسوولینو د ناسم چلند ځینې ويډیوګانې خپرېږي او په ځینو مواردو کې لیدل کېږي چې ان د واټونو د سر پلورونکو توکي هم په ځمکه غورځوي.
په کابل کې د طالبانو حکومت ښاروالۍ تر دې مخکې ویلي و چې، پر واټونو پلورونکو د کار د مخنیوي لپاره اقدام په ښار کې د نظم د ښهوالي په هدف ترسره کېږي.
خو دا څرګنده نهده چې په کابل ښار کې د دوی لپاره کوم بل مشخص ځای په پام کې نیول شوی او که نه.
پهدې اړه مو په کابل کې د طالبانو حکومت د ښاروالۍ ویاند نعمتالله بارکزی وپوښت، خو هغه د ازادي راډيو پوښتنې ځواب نهکړې.
په دې اړه نور: کابل کې د واټونو د سر پلورونکي: ښاروالي راڅخه لوړه کرايه اخليد دې ادارې مسؤلینو تر دې مخکې ویلي وو چې د واټونو پر غاړه پلورونکو لپاره یې ځانګړي ځایونه په پام کې نیولي، خو یوشمېر دې پلورونکو پر دې مسئلې نیوکه کړې وه او ټینګار یې کړی و چې د دوی لپاره باید داسې ځای په پام کې ونیول شي چې د پلور لپاره یې مناسب وي.
د واټونو پر غاړه د پلورونکو د کار د بندېدو په اړه راپورونه پهداسې حال کې خپرېږي چې د افغانستان خلک له سختو اقتصادي ننګونو سره مخ دي.
د بېوزلۍ د نړیوال شاخص د وروستي راپور لهمخې، د ماشومانو په ګډون ډېر شمېر افغانان په بېوزلۍ کې ژوند کوي.
د ملګروملتونو سازمان هم په افغانستان کې د روان وضعیت په اړه د اندېښنې په څرګندولو سره ویلي چې نږدې ۲۴ میلیونه افغانان بشري مرستو ته اړتیا لري.