د طالبانو حکومت د کابل ښار د دوشنبې ورځې په ځانمرګي برید کې د ۱۹ کسانو مرګژوبله تایید کړه.
د طالبانو د حکومت د کابل امنیه قوماندانۍ ویاند خالد ځدراڼ ازادي راډیو ته په لیکلي پیغام کې ویلي چې دا پېښه د کابل ښار د شپږمې حوزې اړوند قلعه بختیار سیمه کې شوې ده.
ځدراڼ لیکلي: "سیمه کې یو کس پر ځان پورې تړلو چاودېدونکو موادو ته انفجار ورکړی چې متاسفانه د یوې ښځې په ګډون ۶ ملکي وګړي شهیدان او ۱۳ نور ټپیان شوي دي."
خو د پېښې عیني شاهدان او د کابل استقلال روغتون ځینو روغتیایي کارکوونکو ازادي راډیو ته ویلي، یوازې دې روغتون ته ۱۵ مړي او ټپیان انتقال شوي دي.
همدارنګه د کابل ایمرجنسي روغتون ته څېرمه سیمې اوسېدونکو هم ویلي چې یاد روغتون سره د ټپیانو او امبولانسونو ګڼه ګوڼه زیاته وه.
د پېښې عیني شاهدانو ازادي راډیو دا هم وویل چې دا پېښه د لویې څارنوالۍ دروازې ته څېرمه د مامورینو د رخصتېدو پر مهال شوې ده.
ازادي راډیو ته د طالبانو د حکومت د ځینو امنیتي سرچینو رااستول شویو عکسونو کې ښکاري چې د پېښې په سیمه کې خلک خواره واره او ان ټوټه ټوټه پراته دي.
د دې پېښې مسوولیت تر اوسه کومې ډلې نه دی منلی.