د ماشومانو د ژغورلو نړيوال سازمان یا "سېف د چلډرن" وايي، بغلان کې د بارانونو او سېلابونو له امله شاوخوا څلوېښت زره ماشومان بې کوره شوي.
د "سېف د چلډرن" لهخوا په خپور شوي راپور کې چې د دوشنبې په ورځ د مې ۱۳مه خپور شوى، په بغلان کې د سېلاب ځپلو ماشومانو د وضعیت په اړه اندېښنه ښودل شوې ده.
دغه سازمان د سیمهییزو طالب چارواکو په حواله ویلي چې په بغلان ولایت کې د سختو بارانونو او وروستیو سېلابونو له امله ۱۲زره کورونه ویجاړ شوي، د ۴۰زره ماشومانو په ګډون ۸۰زره کسان زيانمن شوي.
د ځينو نورو اړتیاوو ترڅنګ د څښاک اوبو ته نه لاسرسی، زدهکړو او د لوبو لپاره د مناسبو لوبغالو نه شتون هغه څه دي چې "سېف د چلډرن" يې، د بغلان د سېلاب ځپلو ماشومانو لپاره د نه لاسرسي په اړه اندېښنه ښودلې ده.
د ماشومانو د ژغورنې نړیوال سازمان د طالبانو په حواله ويلي چې په بغلان کې د سېلابونو له امله د مړو شمېر ۱۵۴ ته رسېدلی او زیاته کړې یې ده چې د لټون د عملیاتو په دوام کې د يادې شمېرې د زیاتېدو اټکل شوى دی.
خو د طالبانو د حکومت د کډوالو او راستنېدونکو چارو وزارت د یکشنبې په ورځ اعلان کړى و چې د وژل شویو شمېر ۳۱۵ کسه دی.
Your browser doesn’t support HTML5
د بغلان په سېلابونو کې د مړو شمېر ۳۱۵ او د ټپیانو ۱۶۳۰ ته رسېدلی
"سېف د چلډرن" زياته کړې چې د بغلان په يو شمېر سېلاب ځپلو سيمو کې د څښاک د صحي اوبو د نشتوالي له امله ماشومان د معدې د درد په څېر ناروغيو اخته شوي دي.
دغې ادارې په بغلان کې د خپلو بېړنیو مرستو د یوې برخې په توګه د ګرځنده کلینیک د جوړېدو اعلان کړی، خو یو شمېر سېلاب ځپلي خلک وايي چې دوی بېړنيو خوراکي توکو، جامو او نورو روغتیايي مرستو ته اړتیا لري.
پاچا خان له هغو کسانو څخه چې د بغلان سېلابونو کې يې خپله ټوله هستي له لاسه ورکړې، وايي چې زوى د ژغورلو پر مهال يې پښه ټپي شوه.
نوموړى زياتوي چې اوس له خپلو او کوچنيو ماشومانو سره د خپل کلي په يو هديره کې شپې او ورځې تېروي.
هغه ازادي راډیو ته وویل: "موږ خپله هدیرې ته راغلو، موږ خپل ځانونه هدیرې ته ورسول. زه ١٧ کسيزه کورنۍ لرم، تاسو وګورئ ٧ کلن، ٨ کلن دوى خوراکي توکو کمپلو ته ضرورت لري."
سهراب هم د بغلان اوسېدونکی دی.
هغه وايي، د خپلو لومړنيو اړتياوو د پوره کولو لپاره هڅه کوي چې د ځمکې له لاندې له خټو خپل کالي راوباسي.
د بغلان دغه اوسېدونکي په بېلچو خټې لرې کوي او د ممکنه ژوندي کسانو د ژغورلو هڅه کوي.
نوموړي زیاته کړه: "اوس موږ دلته له خپلو ماشومانو سره د خپلې حویلۍ منځ کې يو هڅه کوو چې د خټو له لاندې ځينې بړستنې واړه واړه ضروري توکي راوباسو."
همهاله په تېره يوه مياشت کې بارانونو او سېلابونو د افغانستان د يو شمېر نورو ولايتونو اوسېدونکو ته هم ځاني او مالي زيانونه اړولي دي.
د نورستان ولایت اوسېدونکی او سېلاب ځپلى شاه محمد ازادي راډيو ته وویل: "دا ستونزمنه ده، خلک له خپلو کورونو بېځایه شوي، ماشومان هم، له درسونو پاتې شول د بېوزلۍ ده، خلک بېوزله دي، کاروبار نهشته، له ښځو نیولې تر ماشومانو پورې."
په افغانستان کې د اوري میاشتې له پیل راپهدېخوا سخت بارانونه او سېلابونه راوتلي.
ملګري ملتونه وايي، افغانستان یو له هغو لسو هېوادونو څخه دی چې د اقلیم د بدلون د بدو پایلو له له امله تر ټولو ډېر زیانمنونکي دي او د دغو اقلیمي بدلونونو د پايلو سره د مقابلې لپاره پر ځان بسيا نه دي.
خو په افغانستان کې سېلاب ځپلى له سېلاب وروسته خپل د ژوند نوي پيل ته اندېښمن دي.