د افغانستان دولت او د طالبانو مرکچي پلاوي به په ټاکلي وخت یعنې د جنورۍ په پنځمه د قطر په پلازمېنه دوحه کې د سولې دوهم پړاو خبرې پیل کړي.
دا خبره افغان چارواکو او طالبانو پرون یکشنبه تأیید کړه او ویېویل چې د خبرو په دې پړاو کې به پر هغو موضوعاتو خبرې وشي چې دواړو لورو د اجنډا په ترتیب شویو لېستونو کې شامل دي او یو بل تهیې سپارلي دي.
د افغان ولسمشر ویاند صدیق صدیقي پرون په یوه ټویټ کې ولیکل چې د افغانستان د ملي مصالحې عالي شورا له مشر عبدالله عبدالله سره په غونډه کې ولسمشر اشرف غني د دې ملاتړ وکړ چې د سولې د خبرو دوهم دور دې په ټاکلي وخت یعنې د جنورۍ په پنځمه په دوحه کې ترسره شي، خو ولسمشر بیا هم ټینګار کوي چې د خبرو نور پړاوونه باید د افغانستان دننه وشي.
ښاغلي صدیقي ویلي چې ولسمشر د سولې د مرکچي پلاوي او د افغانستان د ملي مصالحې عالي شورا د مشرانو په غوښتنه او له نړیوالو ملاتړو سره په مشوره او هم د دې لپاره چې د دوهم دور خبرو په پیلېدو کې ځنډ رامنځته نهشي له دې سره موافقه وکړه چې د خبرو بل پړاو دې په دوحه کې ترسره شي.
د افغانستان د ملي مصالحې عالي شورا ویاند فریدون خوځون هم بېګا ناوخته ازادي راډیو ته وویل چې د دې شورا د مشرتابه د کمېټې په غونډه کې په دې سلا وشوه چې د سولې خبرو دوهم پړاو دې په خپل ټاکلي وخت په دوحه کې پیل شي او په دې خبرو کې به اوربند د افغانستان د دولت د مرکچي پلاوي لپاره یو لومړیتوب وي.
ښاغلی خوځون زیاتوي: "د رهبرۍ کمېټې پرېکړه وکړه چې مذاکرات به د جنورۍ په پنځمه په دوحه کې بېرته شروع کېږي او زموږ له اړخه په اجنډا کې په لومړي سر کې په اوربند باندې ټینګار وشو او ټولو ګډونوالو غوښتنه وکړه چې هیئت کاملاً د اجنډا په تعیین او ترتیب کې او له طالبانو سره په توافق کې صلاحیت لري او ټول د افغانستان اسلامي جمهوريتیې ملاتړ کوي."
ښاغلي خوځون په دې اړه چې یو شمېر نورو هېوادونو هم په دې وروستیو کې د افغانستان دولت او طالبانو ترمنځ د سولې د خبرو د کوربهتوب لپاره چمتووالی ښودلی وویل چې ډېر دغه هېوادونه د کرونا د خپرې شوې وبا له امله له خپلې دغې ژمنې په شا شوي دي.
د ملي مصالحې عالي شورا ویاند فریدون خوځون
د طالبانو د فرهنګي چارو کمېسیون مرستیال احمدالله وثیق هم تېره شپه ناوخته ازادي راډيو ته تأیید کړه چې د طالبانو مرکچي پلاوی هم دې ته تیار دی چې د جنوري په پنځمه له مقابل لوري سره د خبرو دوهم پړاو پیل کړي.
نوموړی وایي، د خبرو په دې پړاو کې به د اجنډا پر هغو موادو بحث او خبرې وشي چې فهرستیې دواړو لورو له مخکې برابر کړی او یو بل تهیې سپارلی دی.
ښاغلي وثیق وویل: "د افغانستان د اسلامي امارت مذاکراتي ټیم او مسؤلین ژمن دي چې د کړې وعدې او هغه معمول مطابق بېرته مذاکراتي مجالس پیل شي. په مجالسو کې به پر هغو موضوعاتو خبرې کېږي چې په اجنډا کې شامل دي."
د طالبانو او افغان دولت د مرکچي پلاوو ترمنځ د خبرو په لومړي پړاو کې چې د سپټمبر په ۱۲مه په دوحه کې پیل شوې وې او شاوخوا درې میاشتې یې دوام وکړ، دواړو لورو د خبرو د دوام لپاره پر کړنلارې موافقه وکړه او همیې پر راتلونکې اجنډا د بحث لپاره د خپلو غوښتنو فهرستونه له یو بل سره تبادله کړل.
قطر کې د سولې خبرو پرانیست غونډه
له دې مخکې هم د افغانستان د دولت مرکچي پلاوي ډېر ځلې د شخړو پر کمېدو او اوربند ټینګار کړی او ویلي یې دي چې له طالبانو سره په هر ډول خبرو کې دغو دواړو ته لومړیتوب ورکوي.
دا یوازې د افغان چارواکو غوښتنه نه، بلکې د افغانستان د اکثریت وګړو هم دا غوښتنه ده چې ژر دې اوربند وشي. د سیاسي او امنیتي چارو اکثره کتونکي په دې باور دي چې که طالبان په رښتیا په افغانستان کې سوله غواړي نو باید اوربند وکړي.
یو یې هم د امنیتي او دفاعي چارو پوه او د افغانستان د دفاع وزارت پخوانی ویاند جنرال دولت وزیري دی. ښاغلي وزیري په افغانستان کې په دې وروستیو کې د هدفي وژنو د زیاتوالي په اړه چې څوکیې تر شا لاس لري، څو ورځې مخکې ازادي راډیو ته وویل، هر څوک چې د دې بریدونو تر شا لاس ولري، خو بستر یې طالبانو ورته برابر کړی دی.
په دې اړه نور: کابل کې د هدفي وژنو تر شا څوک لاس لري؟نوموړی وایي، اوس چې د سولې د خبرو دوهم پړاو پیلېدونکی دی، طالبان باید د افغانستان د خلکو غوښتنه ومني او د باور فضا د رامنځته کولو لپاره اوربند وکړي.
ښاغلی وزیري زیاتوي: "د حل یوازنۍ لاره دا ده چې طالبان اوربند وکړي او باور رامنځته کړي. طالبان په غلطه لار روان دي، اوربند نهکوي، زور کوي او اسلامي امارت غواړي."
د امریکا متحده ایالاتو، ناټو، یوناما او اروپایي ټولنې په ګډون د افغانستان د دولت مهمو نړیوالو ملاتړو هم په دې وروستیو کې په افغانستان کې د شخړو پر زیاتوالي اندېښنه ښکاره کړې او ویلي یې دي چې که دغه شخړې همداسې دوام وکړي نو د سولې پر روان بهیر به ناوړه اغېز وکړي.
نړیوالې ټولنې هم د سمدستي اوربند پر کېدو ټینګار کړی دی.