په افغانستان کې د اوسنۍ سیاسي لانجو له امله د امریکا د نارضایتۍ دوام!
یو امریکایي لوړپوړی ډیپلومات وایي چې د ولسمشر محمد اشرف غني او عبدالله عبدالله له لوري د افغانستان د اوسني سیاسي وضعیت دوام خورا ګواښوونکی او له اور سره لوبې کول دي.
دغه امریکایي ډیپلومات چې د افغانستان له وضعیت نه خبر دی د ازادي راډيو په ګډون یو شمېر رسنیو ته وویل "امریکا د دواړو رهبرانو له کړنو خوښه نهده."
دغه لوړپوړی امریکایي چارواکی زیاتوي، دغو دوو رهبرانو د افغانستان د سیاسي ستونزو د حل په برخه کې په خپل ځان د خلکو او امریکا باور له لاسه ورکړی دی.
د محمد اشرف غني او مایک پومپیو لیدنه.
نوموړی د دوو ټيمونو هڅې د واک د څوکۍ د خپلولو لپاره وبللې او ویېویل چې دغه دوه ټیمونه لنډ مهاله واک ته رسېدو له امله د افغانستان راتلونکي ته ستر ګواښونه پېښولی شي.
دغه امریکایي ډیپلومات خبرداری ورکوي چې که ولسمشر غني او عبدالله عبدالله دغو لانجو ته دوام ورکړي له دې کار سره بهیې د طالبانو موقف او رول لا پیاوړی کړي.
نوموړی وایي امریکا د خپلو ګټو لپاره ځینې پرېکړې کړي، د هغه په خبره امریکا خپل ټول اوسني او راتلونکي پلانونه تر څارنې لاندې نیولي دي.
دغه امریکایي لوړپوړی ډیپلومات که څه هم وايي چې امریکا د افغانستان له امنیتي ځواکونو سره په څنګ کې پاتې کېږي او له دوی سره بهیې همکارۍ دوام ولري، خو زیاتوي د اوسني وضعیت له پایلو او د افغانستان پر امنیتي ځواکونو یې د اغېز له امله اندېښمن دی.
د عبدالله عبدالله او مایک پومپیو لیدنه
دی د خبرو په یوه برخه کې زیاتوي، "امریکا د افغانستان د امنیتي ځواکونو په څنګ کې پاتې کېږي او له هغوی سره به همکار وي، خو وېره دا ده چې له دغو ځواکونو نه د اوسني وضعیت د دوام په صورت کې به ناوړه ګټه واخیستل شي."
تر دې وړاندې د سې شنبې په ورځ امریکا له افغانستان سره په ۲۰۲۰ کال کې د خپلو یو میلیارد مرستیو د لغوه کېدو خبره هغه مهال ورکړ چې له ولسمشرۍ انتخاباتو وروسته د محمد اشرف غني او انتخاباتي سیالیې عبدالله عبدالله ترمنځ د رامنځته شویو اختلافاتو پر سر د امریکا د بهرنیو چارو وزیر مایک پومپیو هڅو او کابل ته سفر پایله ورنهکړه او هغه تش لاس بېرته امریکا ته ستون شو.
په دې اړه نور: امریکا له افغانستان سره یو میلیارد ډالر مرسته کمويد دغه امریکایي ډیپلومات په خبره، هېواد یې دا څرګنده کړې چې له موازي حکومتونو ملاتړ نهکوي.
دی وایي که څه هم امریکا د افغانستان پر وړاندې د منفي اقداماتو له ترسره کولو خوښه نهده، خو له همدې لارې غواړي د افغانستان پر دواړو رهبرانو فشار راوړي ترڅو توافق ته سره ورسېږي.
نوموړی زیاتوي د دغو لانجو دوام د سولې پروسه هم له ستونزو سره مخ کړې. هغه پروسه چې د افغانستان د جګړې د پای لپاره د امریکا ستره لاسته راوړنه یادېږي.
دغه امریکایي ډیپلومات د سولې د خبرو اترو لپاره د یو ټول شموله پلاوي پر جوړېدو ټینګار کوي.
دی که څه هم د کرونا ویروس خپرېدو له امله نړۍ په یوه ستره ستونزه کې بند بولي، خو وایي د طالب بندیانو د خوشې کولو او د سولې لپاره د پلاوي له جوړېډو سره امریکا غواړي د افغانانو ترمنځ د سولې خبرې ژر تر ژره وشي.
د افغانستان ولسمشرۍ ماڼۍ تازه په دې اړه څه نهوایي، خو ولسمشر غني تېره ورځ (سې شنبه) ولس ته د یوې ټلوېزوني وینا پر مهال وویل چې له ښاغلي عبدالله سرهیې د سیاسي تفاهم لپاره جلا مذاکرات وکړل، خو عبدالله عبدالله د اساسی قانون پر تغییر ټینګار کړی دی چې د ولسمشر غني په خبره دا له اساسي قانون سره په ټکر کې موضوع ده.
خو عبدالله عبدالله افغانستان ته د امریکا د بهرنیو چارو وزیر مایک پومپیو له راتګ وروسته خبرپاڼه کې ویلي چې د روان سیاسي کړکېچ د حل لپاره رامنځته شوی فرصت له لاسه ورکړل شو.