یو شمېر نړیوالو ورځپاڼو له افغانستان سره د امریکا د مالي مرستو کمېدو ته پام کړی دی.
- واشنګټن پوسټ
واشنګټن پوسټ ورځپاڼې لیکلي، د افغانستان د سولې پر لور د ولسمشر غني او پخواني اجرائیه رئیس عبدالله عبدالله له ګډ کار څخه د ډډې کولو په غبرګون کې د یو میلیارډ ډالرو مرستې د کمولو پرېکړه د واشنګټن یو بې ساری اقدام دی.
دا قدام په داسې حال کې شوی چې د بې وزلۍ ترڅنګ افغانستان د کرونا ویروس له ګواښ سره هم مخامخ دی.
په مقاله کې لیکل شوي چې د سې شنبې په ورځ ولسمشر محمد اشرف غني او په ولسمشريزو انتخاباتو کې د هغه سیال پخواني اجرائیه رئیس عبدالله عبدالله پر یو بل تور پورې کړ چې لانجه نه حل کوي او په نتيجه کې د امریکا د بهرنیو چارو وزیر مایک پومپیو د مرستو د کمولو اعلان وکړ.
پومپیو د دوشنبې په ورځ کابل ته سفر وکړ.
دی په داسې حال کې کابل ته لاړ چې پر نړیواله کچه د کرونا ویرس د خپرېدو له وېرې سفرونه محدود شوي.
ولسمشر غني له پومپیو سره خبرې مثبتې او رغندې وبللې خو پخواني اجرائیه رئیس عبدالله عبدالله وویل د پومپیو سفر داسې فرصت و چې له لاسه ووت.
واشنګټن پوسټ لیکي، پومپیو له کابله د تګ پر مهال په الوتکه کې خبریالانو ته وویل چې هیله لري د افغانستان سیاسي سیالان به له یو بل سره جوړ راشي او د مرستو د قطع کولو اړتیا به نه وي.
د ورځپاڼې په لیکنه د سې شنبې په ورځ ولسمشر غني په یوه ټلویزیوني وینا کې وویل چې ده عبدالله عبدالله ته د سولې په بهیر کې د مهم رول او په کابینه کې د هغه ملګرو ته د څوکیو ورکولو وړانديز کړی خو هغه ورڅخه د اساسي قانون د بدلولو غوښتنه کړې چې د دې کار صلاحیت ولسمشر نه لري.
واشنګټن پوسټ ورځپاڼه وړاندې لیکي، چې غني د امریکا له دې پریکړې اندېښمن نه ښکاري خو د امریکا د ځانګړي سرپلټونکي جان ساپکو له قوله یې لیکلي چې افغان حکومت د خپلې بودجې یوازي پنځه ویشت فیصده برخه پرې کوي.
د حکومتي وزارتونو د مصارفو په ګډون پاته پنځه اویا فیصده مصارف نړیواله ټولنه ورکوي.
واشنګټن پوسټ ورځپاڼې لیکلي، په داسې حال کې چې ټوله نړۍ د کرونا ویروس له خطر سره لاس او ګرېوان ده، افغانان له سیاسي لانجو شکایت کوي.
د مقالې په پای کې لیکل شوي چې که څه هم پومپیو له افغانستان سره د مرستو د کمولو ګواښ کړی خو دا یې ویلي چې هېواد یې افغانانو ته ژمن دی او د کرونا ویروس د خپرېدو د مخنیوي لپاره به افغانستان ته ۱۵ میلیونه ډالره مرسته ورکړي.
- فایننشل ټایمز
د بریتانیا چاپ فایننشل ټایمز ورځپاڼې هم د افغانستان د سیاسي وضعیت په اړه یوه مقاله خپره کړې ده.
د مقالې عنوان دی: "پومپیو په افغانستان کې په توافق تر لاسه کولو کې پاتې راغلی."
د مقالې لیکوال لیکلي، مایک پومپیو ونکړای شول په کابل کې سیاسي سیالان ګډ حکومت جوړولو ته اړباسي او له طالبانو سره د سولې توافق وژغوري.
په مقاله کې لیکل شوي چې له افغانستانه د یو میلیارد ډالرو د مرستې پرې کولو په اړه ډېر جزئیات نه دي ورکړل شوي.
د لیکوال په وینا امریکا له افغانستانه د خپلو ځواکونو په ایستلو کې له ننګونو سره مخامخ ده چې دا اقدام د ولسمشر ډونالډ ټرمپ د انتخاباتي ژمنو برخه وو.
فایننشل ټایمز لیکي، طالبانو په افغانستان کې حملو ته دوام ورکړی او ښاغلی عبدالله د ولسمشریزو انتخاباتو نتایج نه مني چې په فبرورۍ میاشت کې اعلان شول.
د مقالې په پای کې راغلي، د سولې د بهیر پر درېدلي وضعیت سربېره پومپیو ټينګار کړی چې امریکا به د ۲۰۲۱ میلادي کال تر جولای میاشتې پوري خپل ټول ځواکونه له افغانستانه وباسي.
- وال سټريټ ژورنال
وال سټريټ ژورنال ورځپاڼې هم له افغانستان سره د امریکا د مالي مرستو د پرې کېدو موضوع ته کتنه کړې ده.
ورځپاڼې لیکلي وروسته له هغه چې د امریکا د بهرنیو چارو وزیر مایک پومپیو پاتې راغی چې افغان سیاسي سیالان پر جوړجاړي قانع کړي، پومپیو له افغانستان سره د مالي مرستو د قطع کولو اعلان وکړ.
مقاله د افغان حکومتي چارواکو له قوله لیکي چې افغان ولسمشر محمد اشرف غني د پخواني اجرائیه رئیس عبدالله عبدالله هغه غوښتنه رد کړه چې ګواکې دی دې اجرائيه صدراعظم شي او مساوي قدرت دې ولري.
مقاله یادونه کوي چې دوې اوونۍ مخکې ټاکل شوې وه طالبان له افغان حکومت سره خبرې پیل کړي خو د بندیانو د تبادلې په اړه لانجه رامنځته شوه.
د مقالې په وینا که څه هم د امریکا او طالبانو تر منځ توافق هیلې زیاتې کړي وې چې تاوتریخوالی به کم شي خو دا کار ونشو.
له هغه راهیسي چې د امریکا او طالبانو تر منځ موافقه لیک لاسلیک شوی، په تېرو درو اوونیو کې لږ تر لږه ۱۰۰ امنیتي ځواکونه او ملکیان وژل شوي دي.
