د لاسرسۍ وړ لېنکونه

تازه خبر
پنجشنبه ۲۱ وری ۱۳۹۹ کابل ۱۲:۰۸

افغانستان

د امریکا د بهرنیو چارو وزیر مایک پومپیو نن کابل ته ورسېد

مایک پومپیو

د امریکا د بهرنیو چارو وزیر مایک پومپیو نن دوشنبه کابل ته ورسېد.

د نوموړي دا بېړنی سفر د امریکا او طالبانو ترمنځ د سولې د لاسلیک شوي تړون د چارو د پر مخ وړلو هڅه بلل شوې ده.

له هغه راهیسې چې دا تړون تېره میاشت لاسلیک شوی په افغانستان کې د ولسمشرۍ پر سر راپورته شوې سیاسي لانجې د دې لامل شوي چې د سولې چارې ټکنۍ شي.

تمه ده د امریکا د بهرنیو چارو وزیر د دې وضعیت د ختمولو په برخه کې هڅه وکړي.

په همدې حال کې د افغانستان د سولې عالي شورا د افغان حکومت او طالبانو ترمنځ د سولې لومړنۍ خبرې د تل‌پاتي ثبات د راوستلو په برخه کې ډېرې مهمې بولي.

د دې شورا مرستیال قاضي محمد امین وقاد نن ازادي راډیو ته وویل: "دا کنفرانس (د حکومت او طالبانو ترمنځ) د تقدیر وړ دی، دا هم په‌کې ویل شوي چې د اورکم مسئلې یا د مسایلو د حل لپاره د لارو موندلو پر جریان به په بین‌الافغاني خبرو کې بحث کېږي، دا په دې معنی ده چې دواړو لورو د بین‌الافغاني مذاکراتو سره هم موافقه کړې ده."

دا په داسې حال کې ده چې د افغانستان د ملي امنیت شورا وايي، په دې وېډیويي کنفرانس کې د تاوتریخوالي د کمېدو پر ټولو اړخونو، د مخامخ خبرو په پیل، د تل‌پاتي اوربند په څرنګوالي او تر خوا یې د زندانیانو د تبادلې پر موضوع بحث شوی دی.

د ورځې تازه خبرونه دلته ولولئ

د سالنګ لویه لاره بند شوه

د سالنګ بنده شوې لاره

د سالنګ لویه لاره له غره د ډبرو د رالوېدو له امله د ټرافیکو پر مخ بنده شوې ده.

د سالنګونو د حفظ او مراقبت ادارې رئیس محمد ضمیر عمرخېل نن سهار ازادي راډیو ته وویل چې تېره نیمه شپه د هیجان په سیمه کې ډبرې راوښویېدې چې په نتیجه کې‌یې دوه موټره ویجاړ او یو موټر چلوونکی ټپي شو.

ښاغلي عمرخېل ویلي چې د واورو د اورېدو دوام او توپانونو ته په پام د دې خطر شته چې نورې ډبرې هم له غره راوښوېږي، نو ځکه‌یې د مسافرو د خوندیتوب لپاره دغه لاره د ټرافیکو پر مخ تړلې ده.

هغه همداراز ویلي چې له لارې د ډبرو د لیرې کېدو لپاره ځانګړو عملیاتو لکه چاودنو ته اړتیا ده، خو ورسره د دې خطر هم شته چې د پېښې ځای ته نږدې وارداتي برښنا یوې پایې ته زیان ونه‌رسېږي.

د سالنګونو د حفظ او مراقبت ادارې رئیس ویلي نه‌شي ویلی چې کله به دغه لاره بېرته د ټرافیکو پر مخ پرانیزي. تر دې مخکې ډېر ځلې د واورو د ښویېدو او توپانونو له امله دغه لاره بنده شوې ده.

د تورخم او سپین بولدک دروازې د تجارتي لاریو پر مخ پرانیستل کېږي

د تورخم لار

د پاکستان حکومت اعلان کړی چې افغانستان ته د تجارتي لاریو او کانټینرونو د لېږد لپاره به د تورخم او سپین بولدک دروازې پرانیزي.

د پاکستان د بهرنیو چارو وزارت ویاندې عایشه فاروقي تېر ماښام پر ټویټر لیکلي چې دغه لارۍ به د اپرېل له ۱۰مې او په اوونۍ کې درې ورځې (دوشنیه، چهارشنبه او جمعه) افغانستان ته ولاړې شي.

په اسلام‌اباد کې د افغانستان سفیر عاطف مشعل پر خپل ټویټرپاڼه د دې پرېکړې هرکلی کړی او لیکلي‌یې دي دا ډول همکاري د دواړو هېوادونو ترمنځ د اړیکو د لا ښه کولو لپاره له ګډو هڅو سره مرسته کوي.

په همدې حال کې د کندهار د والي ویاند بهیر احمدي تېر ماښام ازادي راډیو ته په دې اړه وویل: "یوازې په چمن کې تر دوه زره پورې موټر ولاړ دي. دغه‌راز شاوخوا ۱۳۰۰۰ په کراچۍ کې ولاړ دي. تمه کېږي د سبا ورځې له پیل سره چې کومه هوکړه شوې د سوداګریزو موټرو پر مخ به دروازه پرانیستل شي، نو په لومړي سر کې هغه موټر چې په ډبلیو اف پي (د خوړو نړیوال سازمان) پورې مربوط دي، د افغانستان خاورې ته داخل شي."

پاکستان د تېرې مارچ میاشتې په نیمایي کې اعلان وکړ چې د کرونا وېروس په تړاو د اندېښنو له کبله به له افغانستان سره د تګ راتګ لارې د مسافرو او ټرانزیت پر مخ تړي.

د تېرې دوشنبې پر ورځ پاکستان د مسافرو لپاره د تورخم او سپین بولدک لارې پرانیستلې او په تېرو ۳ ورځو کې زرګونه افغانان بېرته افغانستان ته ستانه شوي دي.

د افغانستان کورنیو چارو وزارت پر پلي ګرځېدونکو محدودیت ډېروي

ارشیف، کابل کې پولیس

د افغانستان کورنیو چارو وزارت سر له نن پنجشنبه څخه په کابل ښار کې پر پلي ګرځېدونکو کسانو محدودیتونه او پوښتنې ډېروي.

د کورنیو چارو سرپرست وزیر مسعود اندرابي تېر ماښام پر خپله ټویټرپاڼه دا خبره کړې ده.

ښاغلي اندرابي لیکلي چې په کابل کې د چهارشنبې په ورځ د پولیسو تدابیر ډېر وو. نوموړي په دې برخه کې د خلکو او هم د امنیتي ځواکونو له همکارۍ څخه مننه کړې ده.

د کورنیو چارو سرپرست وزیر لیکلي سر له نن څخه به پلي ګرځېدونکي کسان وپوښتل شي.

ښاغلي اندرابي پرون په کابل کې وویل چې ۱۶۰۰ افراد او ۴۰۰ موټر یې مؤظف کړي چې په کابل کې پرته له هغو کسانو چې اجازه ورته شته د خلکو تګ او راتګ ودروي.

روغتیایي کارکوونکي، امنیتي ځواکونه، رسنۍ، د بانکونو کارکوونکي او د مخابراتي شبکو کارکوونکي او د خوراکي موادو پلورونکي له دې بندیز څخه مستثنی شوي دي.

ښاغلي اندرابي په ماښامني ټویټ کې یو ځل بیا ویلي چې په دې لېست کې شامل کسان مستثنی دي.

حکومت د مارچ په ۲۸مه، په کابل کې د کرونا ویروس د خپرېدو د مخنیوي په هدف د درېیو اوونیو لپاره ګرځ‌بندیز اعلان کړی وو چې تر ډېره خلکو ترې سرغړونې کړې دي.

هرات چارواکي د کرونا ویروس د ټسټ موادو په تمه دي

هرات کې د کرونا ویروس لپاره ځانګړی شوی روغتون

په هرات کې چارواکي وايي چې د کرونا ویروس د ټسټ لپاره ضروري موادو ته په تمه دي.

د هرات د عامې روغتیا ریاست ویاند محمد رفیق شېرزي نن د اپرېل په ۸مه، ازادي راډیو ته وویل چې دوی ۵۰ روغتیايي متخصصانو ته هم اړتیا لري.

په هرات کې د کرونا ویروس د معاینې او تشخیص یو مرکز فعال دی.

د افغانستان عامې روغتیا وزارت پرون ویلي وو چې د کرونا ویروس د ټسټ لپاره د اړتیا مواد به نن هرات ته ورسېږي.

شېرزي وویل چې د تخصصي موادو د کموالي له امله، له پرون راهیسې د کرونا ویروس د تشخیص پروسه بنده ده.

د افغانستان عامې روغتیا وزارت د امیري کمپلېکس فعالیت وځنډاوه

د کرونا ویروس د ټسټ کولو په اړه د امیري کمپلېکس اعلان

د افغانستان عامې روغتیا وزارت په یو تازه اقدام کې په کابل کې د امیري کمپلېکس په نوم د شخصي روغتون فعالیتونه له دې امله وځڼدول چې د یاد روغتون ډېری کارکوونکي په کرونا ویروس اخته شوي دي.

د عامې روغتیا وزارت ویاند وحیدالله مایار د چهارشنبې په ورځ «۱۳۹۹ کال د وري ۲۰» په کابل کې یوې خبري غونډې ته وویل چې د دغه روغتون ۶،۲۵ سلنه پرسونل په کرونا ویروس اخته شوي دي.

دا څرګندونې وروسته له هغې کېږي چې وړمه ورځ د حنیف‌الله حنیف په نوم د دغه روغتون یو ډاکتر چې په دغه ویروس اخته و، مړ شو.

د افغانستان عامې روغتیا وزارت وايي، د دغه روغتون ډېری کارکوونکي ځکه په کرونا ویروس اخته شوي چې د دغه ویروس ټستونه‌یې کول.

د امیري روغتون رئیس میروس امیري بیا وايي چې د دوی سمپلونه اخیستل شوي، خو نتیجه‌یې نه‌ده ورکړل شوې.

نوموړی په امیري روغتون کې د کرونا ویروس د ټستونو کولو موضوع ردوي، خو وايي د دوی کېټونه د عامې روغتیا وزارت له‌خوا مهر او لاک شوي.

د افغانستان عامې روغتیا وزارت مخکې له دې شخصي روغتونونه او لابراتوارونه د دغه ټسټ له کولو منع کړي و.

د افغانستان د عامې روغتیا وزارت د معلوماتو له مخې تر اوسه په ټول افغانستان کې ۴۲۳ کسان په کرونا ویروس اخته شوي چې له دې شمېر ۱۴ کسان مړه شوي دي.

'طالبانو د پل علم لومړۍ حوزې جنایي امر او دوه سرتېري وژلي'

د لوګر نقشه

د لوګر سیمه‌ییز چارواکي وایي چې وسله‌والو طالبانو تېره شپه د پل علم ښار پر لومړۍ حوزه حمله کړې او د لومړۍ حوزې جنایي امر څارمن نور خدا یې له دوو سرتېرو سره یوځای وژلی.

د لوګر د والي ویاند دیدار لونګ نن د اپرېل ۸مه، ازادي راډیو ته وویل چې وسله‌وال طالبان تر حملې وروسته تښتېدلي دي.

وسله‌والو طالبانو یا بلې ډلې لا د حملې مسئولیت نه‌دی اخیستی.

د ۲۰۵ اتل قول اردو: په کندهار کې ۶ وسله‌وال طالبان وژل شوي

د کندهار نقشه

د ۲۰۵ اتل قول اردو چارواکي وايي چې په کندهار کې ۶ وسله‌وال طالبان وژل شوي دي.

د قول اردو ویاند خواجه یحdی علوی نن د اپرېل ۸مه، په کندهار کې د ازادي راډیو خبریال ته وویل چې دا کسان په میانشین او معروف ولسوالیو کې په هوايي او ځمکنیو عملیاتو کې وژل شوي دي. عملیات د افغانستان کورنیو ځواکونو کړي دي.

علوي ویلي چې وسله‌والو طالبانو په معروف ولسوالۍ کې پر امنیتي پوستو د حملې پلان جوړ کړی و چې شنډ شو.

وسله‌والو طالبانو په دې اړه خبرې نه‌دي کړي.

کابل ته د ازبکستان وارداتي برښنا جریان وصل شو

ارشیف

د افغانستان برښنا شرکت وايي چې کابل ته د ازبکستان د وارداتي برښنا جریان وصل شو.

د برښنا شرکت په اعلامیه کې چې نن د اپرېل ۸مه خپره شوه، ویل شوي چې د دې لپاره د بغلان ولایت د ډنډ شهاب‌الدین په سیمه کې د برق د لېږد یوه ستن ورغول شوه.

په بغلان کې د چشمه شېر په سیمه کې د جګړې له امله د تېرې پنجشنبې په ماخوستن کابل او ځیني نورو ولایتونو ته د ازبکستان د وارداتي برښنا جریان پرې شو.

برښنا شرکت ویلي چې په ډنډ شهاب‌الدین کې د وارداتي برښنا ستن تېر کال په وسله‌واله نښته کې تخریب شوې وه او د رغولو کار یې بشپړ شو.

دې ادارې ویلي چې په ماهیپر کې هم یو تخریب شوی توربین جوړ شو او کابل ته له دې ځایه هم د برښنا جریان وصل شوی دی.

ننګرهار کې لسګونه نوي باغونه جوړ شول

ارشیف

په ننګرهار کې د بڼوالو د اقتصادي پراختیا په هدف په لسګونه جریبه ځمکه کې نوي باغونه جوړ شول.

د افغانستان د کرنې او مالدارۍ وزارت وایي، دغه تجارتي باغونه د ننګرهار په بېلابېلو ولسوالیو کې په ۹۶۲ جریبه ځمکه کې جوړ شوي دي.

د دغه وزارت ویاند اکبر رستمي نن ازادي راډیو ته وویل چې په دې کې د شفتالو، مالټو او املوکو باغونه شامل دي.

نوموړي وویل چې دغه باغونه د ننګرهار په اچین، چپرهار، کوټ، رودات، خوگیاني او شېرزاد ولسوالیو کې جوړ شوي دي.

تر دې وړاندې هم په ننګرهار کې د دغه ونو باغونو ښه حاصلات ورکړي وو.

د پانګونې او سوداګرۍ خونه: سوداګریزې چارې په عادي ډول پر مخ ځي

د افغانستان د پانګونې او سوداګرۍ خونې ویاند جان اقا نوید

د افغانستان د پانګونې او سوداګرۍ خونې چارواکي وایی، د هېواد اکثره بندرونه پرانیستي دي او سوداګریزې چارې په عادي ډول پر مخ ځي.

د دغې خونې ویاند جان اقا نوید نن ازادي راډیو ته وویل چې دوی د بازارنو نرخ هم کنټرول کړی دی.

خو نوموړي له حکومت څخه وغوښتل چې په افغان سوداګرو ټکس راکم کړي.

ښاغلی نوید وايي، هېواد ته د درملو او نورو ضروري موادو د واردولو په برخه کې له سوداګرو سره د مالیاتي ټکس د راکمولو په برخه کې باید همکاري وشي.

د سوداګرۍ خونې د معلوماتو پر بنسټ د کرونا ویروس د خپرېدو او قرنطین له امله افغان سوداګرو ته هم مالي زیانونه اوښتي دي.

'هرات کې د کرونا ویروس د تشخیص لابراتوار ستونزه نن هوارېږي'

هرات

د هرات د کرونا ویروس د تشخیص د لابراتوار ستونزه به نن هواره شي.

د افغانستان عامې روغتیا وزارت ویاند وحیدالله مایار تېر ماښام وویل چې د چهارشنبې په ورځ به د هرات لابراتوار ته پلاستیکي ټیوبونه واستول شي.

هغه زیاته کړه: "په موقع‌یې احوال نه‌و ورکړی سبا ټیم مؤظف شو چې ویې‌لېږي. په داسې حالاتو کې چې څه خلاصېږي باید وار له مخه همغږي وکړي، دلته ستونزې د مدیریت دي چې سیمه‌ییز مدیریتونه ستونزې رامنځته کوي."

په هرات کې د دوشنبې له ماسپښین راوروسته د ټیوبونو د نه‌موجودیت له امله د کرونا ناروغانو د تشخیص چارې په ټپه درېدلې دي.

په هرات کې د افغانستان تر بل هر ولایت د کرونا ویروس ډېرې مثبت پېښې ثبت شوې دي.

د افغانستان عامې روغتیا وزیر له طالبانو د اوربند غوښتنه وکړه

د عامې روغتیا وزیر فېروز الدین فېروز

د افغانستان عامې روغتیا وزیر پر طالبانو غږ وکړ چې له کرونا ویروس سره د مبارزې لپاره دې اوربند وکړي.

فېروزالدین فېروز دا خبره پرون په کندهار کې د کرونا ویروس د تشخیص د لابراتوار د پرانیستو پر مهال وکړه او ویې‌ویل چې د 'کوویډ-۱۹' اخیستونکې او وژونکې ناروغۍ د مخنیوي لپاره باید ولس همکاري وکړي.

هغه زیاته کړه: "نن راغلی یم تجهیزات مې راوړي، امکانات مې هم راوړي او پيغام مې دا دی چې نه تجهیزات په درد خوري، نه امکانات که چېرته تاسو له یوه بل سره همکاري ونه‌کړئ، له موږ سره همکاري ونه‌کړئ، زموږ پيغامونو ته په جدي توګه پاملرنه ونه‌کړئ دا ناروغي به خدای مه‌کړه ډېره خرابي وکړي."

په کندهار کې د کرونا ویروس د تشخیص لابراتوار د ۱۰۰ کسانو د وینې د معاینې وړتیا لري.

په دې لابراتوار کې به د زابل، ارزګان او هلمند ولایتونو د کرونا مشکوکې پېښې هم معاینه کېږي.

له کرونا ویروس سره د مبارزې لپاره تېره اوونۍ د افغانستان ولسمشر هم طالبانو ته د اوربند وړاندیز کړی و، خو طالبانو تر اوسه دا غوښتنه نه‌ده منلې.

کابل کې به نن پولیس ګرځ‌بندیز عملي کړي

ټول افغانستان کې پر کرونا ویروس د اخته کسانو شمېر ۴۲۳ ته رسېږي.

ټاکل شوې ده چې نن کابل ښار کې سلګونه پولیس د کرونا ویروس د خپرېدو د مخنیوي لپاره ګرځ‌بندیز عملي کړي.

د افغانستان د کورنیو چارو سرپرست وزیر مسعود اندرابي پرون په کابل کې وویل: "د ۱۶۰۰ کسانو او ۴۰۰ موټرو په مرسته به که خدای کول سبا په هېڅ ډول په کابل کې پرته له هغو کسانو چې اجازه ورته شته د خلکو تګ او راتګ نه‌وي."

د ښاغلي اندرابي په وینا روغتیایي کارکوونکي، امنیتي ځواکونه، رسنۍ، د بانکونو کارکوونکي او د مخابراتي شبکو کارکوونکي له دې بندیز څخه مستثنی دي، همداراز هغه کسان چې خوراکي مواد پلوري.

تر دې مخکې حکومت د مارچ په ۲۸مه، په کابل کې ورته بندیز د درېیو اوونیو په مخه اعلان کړی وو چې تر ډېره خلکو ترې سرغړونې کړې دي.

د سې شنبې د ورځې د شمېرو له مخې په کابل کې ۷۳ تنه په (کوویډ-۱۹) ناروغۍ اخته شوي دي او په ټول افغانستان کې دا شمېره ۴۲۳ ته رسېږي.

کرونا ویروس سره د مبارزې په لارو چارو د ولسمشر غني او ظریف خبرې

ارشیف، د ولسمشر غني او جواد ظریف لیدنه

د افغانستان جمهور رئیس محمد اشرف غني د ایران د بهرنیو چارو له وزیر محمد جواد ظریف سره د کرونا ویروس په وړاندې د مبارزې په لارو چارو ټيلیفوني خبرې کړې دي.

ارګ ماڼۍ په یوه اعلامیه کې ویلي چې دوی نن له کرونا ویروس سره د مبارزې، سیمه‌ییزو او دوه اړخیزو همکاریو او ایران څخه د افغان مهاجرینو د بېرته راستنېدو پر څرنګوالي مفصلې خبرې وکړې.

د ایران د بهرنیو چارو وزیر ښاغلي ظریف په حواله ویل شوي چې هېواد یې هغو افغان کډوالو ته چې په ایران کې مېشت دي او په کرونا ویروس اخته شوي، په وړیا ډول روغتیایي خدمتونه وړاندې کوي.

په افغانستان کې لومړی سر د ځینو هغو کسانو د کرونا ویروس معاینه مثبته راوتلې وه چې له ایران راستانه شوي وو.

ګڼو افغان کډوالو دا شکایتونه هم کړي چې په ایران کې ورسره ناوړه چلند کېږي او له روغتیايي خدماتو بې‌برخې دي.

په افغانستان کې په کرونا ویروس ۴۲۳ کسان اخته شوي او تازه د مړو شمېر ۱۴ ته رسېدلی دی.

د امریکا-طالبانو تړون کې د افغان ښځو د حقونو نه‌یادونې په اړه اندېښنه

ارشیف، د امریکا او طالبانو ترمنځ تړون

د امریکا د استازو جرګې د څار او سمون کمېټې مشرې کارولین بي. مالوني ویلي له دې ډېره اندېښمنه ده چې د ولسمشر ډونالد ټرمپ د ادارې او طالبانو ترمنځ د سولې په تړون کې د افغان ښځو او نجونو د حقونو د خوندیتوب لپاره یوه کلمه هم نه‌ده راغلې.

د اغلې مالوني په حواله دا بیان پرون شپه د امریکا د استازو جرګې په وېب‌پاڼه خپور شوی.

جمهوري غوښتونکې استازې کارولین زیاته کړې چې د طالبانو په رژیم کې ښځې او نجونې سخت تر فشار لاندې وې او په ټولنه کې هېڅ رول نه‌و ورکړل شوی.

د امریکا د استازو جرګې د څار او سمون کمېټې له غړو سره دوشنبه ناوخته د افغانستان د بیارغونې لپاره د امریکا د مرستو سرمفتش جان سوپکو او همکارانو یې د وېډیو کنفرانس له لارې خبرې کړې دي.

د امریکا استازو جرګې په اعلامیه کې د ښاغلي سوپکو د پرونیو خبرو یوه برخه ذکر شوې چې هغه ویلي دا لا معلومه نه‌ده چې امریکا له افغانستانه د خپلو پوځیانو تر ایستلو وروسته د افغان ښځو او نجونو د حقونو ملاتړ ته څنګه دوام ورکولای شي.

تر دې مخکې هم د امریکا او طالبانو ترمنځ د سولې د تړون په باب د افغانستان د ښځو د حقونو فعالانو اندېښنه ښودلې وه.

دا تړون د فبرورۍ په ۲۹مه دا مریکا او طالبانو ترمنځ د قطر په پلازمېنه دوحه کې لاسلیک شو چې ډېر تمرکز یې له افغانستانه د امریکایي او ټولو بهرنیو ځواکونو په وتلو، له ترهګرو سره د طالبانو د اړیکو په پرې کولو او د افغانستان له حکومت سره په خبرو او سولې دی.

نور راوښيه

XS
SM
MD
LG