ایراني چارواکو ښځو ته اجازه ورکړه چې د ایران او اسپانیا د لوبډلو ترمنځ په لوبغالو کې له نارینهوو سره د ټلوېزیوني پردو له لارې لوبه یوځای وګوري.
څلور ورځې مخکې تر دې ایراني چارواکو د ایران او مراکش ترمنځ د لوبې تر پیل لږ مخکې د ښځو مخه ونیوله چې له نارینهوو سره یوځای لوبه وګوري.
پرون چهارشنبه «۱۳۹۷ کال د غبرګولي ۳۰» په زرګونه کسانو د خپلو کورنیو له غړو سره یوځای د ایران او اسپانیا د فوټبال لوبه د تهران په ازادي لوبغالي کې د ټلوېزیونونو پر لویو پردو ولیده.
د تهران ولایتي شورا وویل، د ازادي او تختي سټډیومونو دروازې یې د ښځو پر مخ پرانیستې دي، څو د ایران او اسپاینا لوبه وویني.
د دې شورا په وینا په پارکونو او نورو عامو ځایونو کې هم د دې مسابقې لپاره هغه بندیز لیرې شوی دی چې پخوا پر ښځو لګېدلي وو.
په لوبغالو کې د لوبو د لیدو لپاره په ایران کې له کلونو راهیسې د ښځو د حقونو پلویانې هڅې کوي چې دا حق ترلاسه کړي.
د جون په ۱۶مه د ایران او مراکش ترمنځ د فوټبال لوبې د نندارې لپاره تمه وه چې ایرانۍ ښځې یې په پارکونو او سټډیومونو کې وګوري، خو ایراني چارواکو په وروستیو شېبو کې اجازه ورنهکړه.
له مراکش سره د لوبې په لومړۍ برخه کې د روسیې په سن پټرزبورګ کې چې هلته لوبه روانه وه دا شعارونه پورته شول چې پر ښځو باید هېڅ ډول بندیز ونهلګول شي.
په یوه بل شعار کې لیکل شوي وو چې د ایران په لوبغالو کې د ښځو له حضوره ملاتړ کوو.
دا شعارونه بیا د سټډیوم د مسؤلانو له لوري لیرې شول، خو د لوبې په دوهمه برخه کې بیا دا شعارونه پورته شول.
د ایران د ښځو د حقونو مدافعانو هیله ښکاره کړه چې د ایران او اسپانیا د لوبې پر مهال د بندیز له لیرې کېدو سره به دې ته لار هواره شي چې ایرانۍ ښځې نورې په لوبغالو کې مسابقې وګوري او مخهیې ونهنیول شي.
پر ایراني چارواکو د نارینه لوبغاړو دا نیوکې په زیاتېدو دي چې په لوبغالو کې د ښځو د حضور مخه نیسي.
اکثر ښځې چې له دې بندیزونو څخهیې سرغړونه کړې د پولیسو له لوري زنداني شوي چې په نړیواله کچه د بشري حقونو د ډلو له لوري دا چلند غندل شوی دی.