د ننګرهار د ولایتي شورا یو شمېر غړي وایي، پاکستاني لوري په تورخم کې د سرحدې کرښې په ۴۰ متري واټن کې د تاسیساتو جوړېدو ته دوام ورکړی دی.
د ننګرهار د ولایتي شورا منشي وایي، د ډیورنډ کرښې ته نږدې د پاکستان له لوري د تاسیساتو د جوړولو دوام پرته له دوه اړخیزه تفاهم نه تر سره کېږي.
ذبیح الله زمري د شنبې په ورځ آزادي راډيو ته وویل چې د دا ډول اقداماتو څخه د پاکستان هدف د ډیورنډ کرښې ته رسمیت ورکول دي.
هغه زیاتوي:
"دوی بیا هم غواړي له هغې نقطې نه چې دوی دروازه په کې جوړوله، څلویښت متره شاته دروازه جوړه کړي، دا هم د نړیوالو قوانینو خلاف دې، د افغان حکومت سره د تفاهم پر اساس نه دی او نه هم چا ورته اجازه ورکړې ده."
اخوا په ټولنیزو رسنیو کې داسې انځورونه خپاره شوي چې ښيې پاکستان په تورخم کې د لانجمنو تاسیساتو له جوړېدو لاس نه دی اخیستی.
شاوخوا میاشت مخکې پاکستان غوښتل د تورخم په بندر کې پر صفري برخه یوه دروازه جوړه کړي چې افغان ځواکونو یې مخه و نیوله.
افغان ځواکونو مخکې تورخم کې د پاکستان له لوري د تاسیساتو جوړولو مخه ونیوله
له دې سره دواړو خواو په وقفه یې توګه نښتې هم وکړې چې دواړو لورو ته یې ځاني او مالي تلفات واړول.
تر هغې وروسته د بهرنیو چارو وزارت د مرستیال حکمت خلیل کرزي په مشرۍ یو پلاوی اسلام آباد ته ولاړ څو دا ستونزه حل کړي.
د ډیورنډ کرښې د ستونزو په تړاو افغان ولسمشر محمد اشرف غني د شانګهای په وروستۍ سرمشریزه کې هم د پاکستان له ولسمشر سره وکتل او دواړه لوري د سرحدي ستونزو د حل لپاره د یوه میکانیزم پر جوړېدو سلا شول.
شاوخوا لس ورځې مخکې هم د پاکستان د صدراعظم سلاکار طارق فاطمي ویلي و چې هېواد به یې له افغانستان سره د ټولې پولې په اوږدو کې موانع جوړي کړي.
د افغانستان د بهرنیو چارو وزارت وایي پاکستان باید د ډیورنډ کرښې په اوږدو کې د هر ډول تاسیساتو جوړېدو ته د همدې میکانیزم پر اساس تر دوه اړخیزې موافقې وروسته اقدام وکړي.
بل خوا د ننګرهار د والي ویاند عطاالله خوږیاڼي له آزادي راډيو سره خبرو کې دا رد کړه چې ګڼې پاکستان بیا هم پر صفري نقطو تاسیسات جوړوي.
د ننګرهار ولایت ویاند عطاالله خوږیاني
خوګیاڼي زیاته کړه:
"کوم تشویش چې له ولسونو سره شته، زه دوی ته اطمینان ورکوم چې پر صفري نقطې هغوی ته د کار کولو اجازه نه ده ورکړل شوې او نه به هم ورکړل شي."
و موغوښتل چې د همدې ټولنیزو رسنیو د راپورونو په اړه د سرحدي ځواکونو نظر ولرو خو هغوی ځواب رانه کړ.
د چارو کارپوه شهزاده مسعود وایي، افغان حکومت باید د ډیورنډ کرښې په اوږدو کې د شته ستونزو په اړه له ملت او نړیوالې ټولنې سره مشوره وکړي.
دی وایي، که پاکستان بیا هم دا ډول هڅې جاري ساتي نو دا به نور هم د دغه هېواد پر وړاندې د افغانانو احساسات و پاروي.
راپور: محمد قسیم سوله مل