په کندهار کې د میرویس حوزوي روغتون مسوولان په ماشومانو کې د شري ناروغۍ د زیاتوالي په اړه خبر ورکوي.
د میرویس حوزوي روغتون د ماشومانو په واټ کې د بستر شویو ناروغه ماشومانو ډېره برخه د شري په ناروغۍ اخته دي.
شری یو ساري ویروسي ناروغي ده چې پر اخته کس باندې سرې کوچنۍ دانې راخیژي او ورسره یې شدیده تبه هم وي.
عثماني، چې د کندهار د شاولیکوټ ولسوالۍ څخه خپل ماشوم میرویس روغتون ته راوړی، وايي چې له تېرو شلو ورځو راهیسې مریض دی او د شري نښې یې څرګندې شوې.
هغه زیاتوي: "شل ورځې کېږي چې مریض دی یو ځل مې مخکې هم دلته څلور ورځې بستر کړی و، یوه هفته جوړ و اوس اووه ورځې کېږي چې بیا مریض دی، ډاکتران وایې شری دی."
د ناروغانو شمېر او د درملنې څرنګوالی
بلخوا د کندهار د میرویس روغتون د ماشومانو د څانګې مشر عنایتالله حکیمي وایي ، یوازې په تېره یوه میاشت کې یې په شري ناروغۍ اخته شدید ۱۴۵ ماشومان بستر کړي او ۳۰۰ ماشومان یې د سراپا په شکل تداوي کړي دي.
هغه زیاتوي چې د دغو ماشومانو ډېره برخه له ولسوالیو او لرو پرتو سیمو راوړل شوي دي.
ډاکتر حکیمي وايي، هر کال د هوا په بدلېدو سره په شري ناروغۍ د اخته ماشومانو شمېر زیاتېږي چې اصلي لامل یې د کورنیو لهخوا ماشومانو ته د واکسین نه ورکول دي.
نوموړی وايي: "ميرویس روغتون کې مو تېره میاشت د شري ۱۴۵ بستر ناروغ ماشومان درلود او همدارنګه مو شاوخوا ۳۰۰ د سراپا په شکل تداوي کړي چې ډېره برخه یې د ولسوالیو څخه مراجعه کړې."
د کورنیو ستونزې
یو شمېر نورې مېرمنې چې ماشومان یې په شري اخته شوي وايي، په لرو پرتو سیمو کې ژوند کوي او هلته روغتیایي خدمتونو او د ماشومانو لپاره د لومړنیو اسانتیاوو نشتوالی د دې لامل کېږي چې ماشومان یې د شري په ګډون په بېلابېلو ناروغیو اخته شي.
د کندهار د پنجوايي اوسېدونکې بيبي ګله واي: موږ په خپله سیمه کې د واکسیناسیون هیڅ اسانتیا نهلرو.
بي بي ګله، چې د کندهار د پنجوایي ولسوالۍ څخه د خپل ناروغ ماشوم سره میرویس روغتون ته راغلې، وايي: "موږ په خپله سیمه کې د واکسیناسیون هیڅ اسانتیا نهلرو او ډېر خلک لا هم د واکسین په اړه ناسم معلومات لري."
د نور ځلا په نوم یوه بله مېرمن چې د کندهار د دامان ولسوالۍ څخه میرویس ته راغلې، وایي چې یوځل یې خپله لور په کندهار ښار کې په یوه خصوصي روغتون کې بستر کړې وه خو د څو ورځو تېرېدو وروسته یې لا هم تبه درلودل چې اوس یې ميرويس روغتون کې بستر کړې.
د روغتیایي چارو متخصصین پهدې باور دي چې د شري ناروغۍ د خپرېدو مخنیوي لپاره باید د واکسیناسیون کمپاینونه پراخ شي او په ځانګړې توګه په لرو پرتو سیمو کې باید خلکو ته د واکسین د اهمیت په اړه معلومات ورکړل شي.
د شري ناروغۍ د خپرېدو مخنیوی
د میرویس حوزوي روغتون ډاکتران او مسوولان هم د شري ناروغۍ د مخنیوي لپاره د کورنیو د پوهاوي او د واکسینونو د کمپاینونو پراختیا جدي اړتیا ګڼي.
د طالبانو له حکومت او نورو روغتیایي ادارو څخه غواړي چې پهدې برخه کې زیاتې هڅې وکړي ترڅو د ماشومانو روغتیا خوندي وساتل شي.
ډاکتران دغه شان له کورنیو هم غواړي، چې خپل ماشومان په وخت واکسین کړي.
د یادونې ده چې پهدې وروستیو کې د افغانستان په یو شمېر نورو ولایتونو کې هم د شري ناروغي پراخه شوې ده.
د روغتیا نړیوال سازمان یا "ډبليوایچاو" ویلي چې د روان ۲۰۲۴م کال له پیل راهیسې تر اوسه په دغه هېواد کې د شري ۳۶ زره ٦١٨ شکمنې پېښې ثبت شوې چې ۱۶۰ کسان یې مړه کړي دي.
ياد سازمان په یوه راپور کې چې د جولای په ۱۱مه یې خپور کړی، ویلي چې د دې ناروغۍ تر ټولو ډېرې مشکوکې پېښې په خوست او بیا ورپسې په بلخ، سمنګان او جوزجان ولايتونه کې ثبت شوې دي.
