د اسراییلو چارواکو د دوشنبې په ورځ وویل چې صدراعظم بنیامین نتنیاهو د غزې په تړانګه کې د عملیاتو د څارنې جنګي کابینه منحل کړه.
بنیامین نتنیاهو د دوشنبې په ورځ د خپل حکومت وزیرانو ته خبرداری ورکړ چې د جنګ د کابینې له منحل کېدو وروسته به مهمې پرېکړې د وزیرانو له یوې محدودې ډلې سره په مشوره وشي.
د اسراییلو صدراعظم د جنګ کابینه وروسته له هغه منحل کړه چې دوه وزیران بیني ګانټز او ګادي ایزنکوټ او د دوی ګوند له حکومتي ایتلاف څخه ووتل.
بیني ګانټز او ګادي ایزنکوټ دواړه د اسراییلو د پوځ پخواني لوی درستیزان وو.
دوی د اکټوبر په اوومه پر اسراییلو د حماس ډلې له برید وروسته له حکومتي ایتلاف سره یو ځای شول، څو د جګړې په اړه پرېکړې د اکثریت ګوندونو په ملاتړ وشي.
حماس د امریکا او اروپايي ټولنې لهخوا د یوه تروریستي سازمان په توګه پېژندل کېږي.
رویټرز راپور ورکوي چې له حکومت څخه د ګانټز وتل د نتنیاهو انحصار په کابینه کې په خورا ملتپالو متحدینو باندې ډېروي چې د اوربند مخالفت کوي.
دا په غزه کې د اته میاشتنۍ جګړې د پای ته رسولو لپاره د حساسو خبرو اترو لپاره بله ستونزه رامنځته کولی شي.
اسراییل او حماس د اوربند پر وروستي وړاندیز غور کوي.
په دې وړاندیز کې د حماس لهخوا اته میاشتې مخکې پر اسراییلو د برید پر مهال د یرغمل شویو کسانو د خلاصون په بدل کې اوربند شامل دی.
اسراییلي پوځیان اوس هم په غزه کې په جګړه بوخت دي.
د رفح په جنوبي ښار او د حماس د جنګیالیو د بیا یوځای کېدو پر ضد د غزې په نورو ځایونو کې هم جګړه روانه ده.
له بلې خوا د اسراييلو او د لبنان د حزبالله ملېشې ترمنځ شخړه لا هم دوام لري.
په عین حال کې د امریکا د ولسمشر جوبایډن یو استازی په منځني ختیځ کې دی او هڅه کوي چې په دوهمه جبهه کې د جګړې د پراخېدو مخه ونیسي.
د جګړې پر مهال صدراعظم وزیر بنیامین نتنیاهو هڅه وکړه چې د امریکا او د جګړې د نورو نړیوالو مخالفینو د بهرني فشار او د سخت دریځو ملتپالو داخلي تمایلاتو ترمنځ انډول رامنځته کړي.
د اسراییلو جنګي کابینې پنځه غړي درلودل، د نتنیاهو، ګانتز او ایزنکوټ سربېره، د کابینې نور دوه غړي د دفاع وزیر جنرال یواف ګالنټ او د ستراتیژیکو چارو وزیر ویران دیرمر وو.
