د ایران ځینو رسنیو راپور ورکړی چې د ایران شپږ تنه پوله ساتي پوځیان فراه ولایت ته په غیرقانوني ډول تر اوښتو وروسته د طالبانو لهخوا نیول شوي دي.
ځینو سرچینو ویلي چې دغه کسان د پنجشنبې په ورځ د فراه په شېخ ابونصر فراهي بندر کې د افغانستان خاورې ته اوښتي وو چې نیول شوي او بیا د طالبانو یوې قرارګاه ته لېږدول شوي دي.
دغو سرچینو ویلي چې د ایران دغه شپږ پوله ساتي لا هم د طالبانو په بند کې دي او د برخلیک په باب یې معلومات نهشته.
د ایران چارواکو د دې موضوع په باب رسماً کومه تبصره نه ده کړې، خو په فراه ولایت کې د طالبانو ځینو سرچینو د دغو کسانو د نیول کېدو خبر تایید کړی دی.
شاوخوا میاشت مخکې هم د ایران یو وګړی چې په غیرقانوني ډول د افغانستان خاورې ته داخل شوی و، د هرات په اسلام کلا کې نیول شوی و.
