د لاسرسۍ وړ لېنکونه

تازه خبر
شنبه ۱۲ کب ۱۴۰۲ کابل ۰۲:۲۱

بلوچ: پاکستان د افغانستان له لوري د تروریستي ګواښونو له درکه اندېښمن دی


د تېرې جنوري میاشتې په اتمه په باجوړ کې پر امنیتي ځواکونو چاودنه شوې وه چې پنځه پولیس افسران په کې وژل شوي یو شمېر نور ټپیان دي.
د تېرې جنوري میاشتې په اتمه په باجوړ کې پر امنیتي ځواکونو چاودنه شوې وه چې پنځه پولیس افسران په کې وژل شوي یو شمېر نور ټپیان دي.

په پاکستان کې د انتخاباتو په درشل کې امنیتي پېښې ډېرې شوي دي.

پاکستان د طالبانو له حکومته وغوښتل چې په خپله خاوره کې د هغو ډلو پر ضد اقدام وکړي چې د اسلام اباد په وینا تروریستي دي.

د پاکستان د بهرنیو چارو وزارت ویندویې زهرا بلوچ پرون پنجشنبې په اسلام اباد کې په خپله اوونیزه خبري غونډه کې د خپل هېواد غوښتنه تکرار کړه، ویې ویل، طالبان دې هغه ترهګر، چې د اسلام اباد په وینا له افغانستانه پر پاکستان بریدونه کوي، پاکستان ته وسپاري.

دې زیاته کړه، اسلام اباد د افغانستان له لوري د تروریستي ګواښونو له درکه اندېښمن دی.

د پاکستان د بهرنیو چارو وزارت ویندویې زهرا بلوچ
د پاکستان د بهرنیو چارو وزارت ویندویې زهرا بلوچ

طالبانو تر دې پخوا د پاکستان دا ډول ادعاوې رد کړي دي.

د طالبانو د حکومت د دفاع وزارت لوی درستیز فصیح الدین فطرت د روانې اوونۍ په لومړیو کې د پاکستان واکمنان د خپلو خلکو د امنیت په ساتنه کې ناکام وبلل او ویې ویل چې پاکستان د خپلې ناکامۍ پړه د نورو په غاړه اچوي.

د پاکستان د بهرنیو چارو وزارت ویندویې په داسې حال کې یو وار بیا د افغانستان په خاوره کې د 'ټي ټي پي' په شان ډلو پر ضد د طالبانو د فوري اقداماتو غوښتنه وکړه چې کابو یوه اوونۍ وروسته په پاکستان کې عام انتخابات کېږي او په درشل کې یې په دغه هېواد کې ناامنۍ ډېرې شوي دي.

خو د انتخاباتو کمېسیون یې وايي چې له دغو ننګونو سره سره به د راتلونکې اوونۍ د پنجشنبې په ورځ انتخابات ترسره شي.

دغه کمېسیون دا خبره په خیبرپښتونخوا او بلوچستان ایالتونو کې د امنیتي پېښو په اړه له جګپوړو امنیتي چارواکو سره له پرونۍ پنجشنبې غونډې وروسته وکړه.

د فبرورۍ د اتمې نېټې د انتخاباتو یو کاندید ریحان زېب د چهارشنبې په ورځ په خیبرپښتونخوا ایالت کې په یوه وسله وال برید کې ووژل شو او څلور نور ژوبل شول.

هغه د تحریحک انصاف ګوند غړی و، خو د خپلواک کاندید په توګه یې کمپاین کاوه.

ریحان زېب د تېر جنورۍ په ۳۱مه باجوړ کې ووژل شو.
ریحان زېب د تېر جنورۍ په ۳۱مه باجوړ کې ووژل شو.

پر ریحان زېب د حملې مسوولیت داعش ډلې په غاړه واخیست.

تر دې یوه ورځ وړاندې په بلوچستان کې له یوې انتخاباتي غونډې وروسته په یوه موټربمي برید کې څلور تنه وژل شوي وو.

د هغې حملې مسوولیت هم داعش په غاړه اخیستی و.

تر دې مخکې 'ټي ټي پي' ویلي و چې پر انتخاباتي کاندیدانو بریدونه نه کوي.

د رویټرز خبري اژانس د راپور له مخې، بلوچ بېلتون غوښتونکو د دوشنبې په ورځ په بلوچستان کې پر مچ ښار برید وکړ او له امنیتي ځواکونو سره یې نښتې ساعتونه دوام وکړ.

په دې برید کې لږترلږه ۱۵ تنه ووژل شول.

اړوند مطالب

XS
SM
MD
LG