په غزه کې د ملکیانو د وژنې د زیاتېدا او د روغتونونو د ویجاړولو له کبله پر اسراییل نړیوال فشارونه زیات شوي دي.
د غزې تړانګې د جګړې د اوږدېدو له کبله پر اسراییل نړیوال فشارونه په زیاتېدو دي او ټاکل شوې نن دوشنبه د ملګرو ملتونو امنیت شورا په یوه پرېکړه لیک کې د غزې دننه "د سملاسي او باثباته" اوربند غوښتنه وکړي.
په غزه کې مرګونې جګړه وروسته تر هغه پیل شوه چې حماس سخت دریځې ډلې چې د امریکا او اروپایي ټولنې له خوا د ترهګرو په توګه پېژندل کېږي، د تېرې اکټوبر میاشتې په ۷مه نېټه پر اسراییل بې ساري غلچکي بریدونه وکړل.
په لومړیو کې د حماس په بریدونو کې د شاوخوا ۱۴ سوه اسراییلیانو د وژنې راپور ورکړل شو، خو فرانس پرېس اژانس د اسراییلي چارواکو په حواله اوس د وژل شویو اسراییلیانو شمېر ۱۱۳۹ او د برمته شویو هغو ۲۵۰ یاد کړی دی.
د غزې د عامې روغتیا وزارت چې د حماس تر کنټرول لاندې ده ویلي چې دغلته د اسراییلي پوځیانو د جګړې له پيله تراوسه له ۱۸۸۰۰ ډېر کسان وژل شوي چې ډېره برخه یې ښځې او ماشومان دي.
پر غزې د اسراییل بریدونه لا هم دوام لري او پرون یکشنبه هم د دوی د بمباریو له کبله د لسګونه فلسطینیانو د وژنې راپورونه خپاره شول.
فرانس پرېس په غزه کې بشري وضعیت د اندېښنې وړ ښودلی او ویلې یې دي چې اکثره اوسېدونکي یې بې ځایه شوي او د سون توکو، خوړو، اوبو او درملو له کموالي سره مخامخ دي.
ملګرو ملتونو ویلي چې د غزې د هرو دریو روغتونونو له ډلې نږدې یو هغه یې څه نا څه فعالیت کوي.
د یکشنبې په ورځ اسراییلي پوځیانو د غزې په جنوب کې د نصر په نوم روغتون باندې هم برید وکړ چې یو تن په کې ووژل شو او ۷ نور ټپیان شول.
د غزې د عامې روغتیا وزارت پرون راپور ورکړی چې اسراییلي پوځیانو پر العوده روغتون هم چاپه وهلې او د هغې کارکوونکي یې توقیف کړي دي.
همدې وضعیت اوس لوېدیځ هېوادونه هم اړ کړي چې پر اسراییل فشار راوړي او د جرمني، فرانسې او بریتانیا چارواکو غزه کې د اوربند غوښتنه کړې ده.
د امریکا د دفاع وزیر لوېډ اسټن هم چې د منځني ختیځ په سفر بوخت دی په غزه کې د ملکیانو پر مرګ ژوبلې نیوکه کړې ده.
د اسراییل صدر اعظم بنیامن نتنیاهو یو ځل بیا د حماس د ریښې وچولو تر وخته د جګړې د دوام خبره کړې او ویلې یې دي، جګړه به تر هغو روانه وي چې د دوی ټول یرغمل شوي کسان خوشې او په خبره یې دا ډاډ رامنځته شي چې غزه به بیا "د ترهګرۍ په مرکز" نه بدلېږي.
