د لاسرسۍ وړ لېنکونه

تازه خبر
سه شنبه ۲۹ غبرګولی ۱۴۰۳ کابل ۰۳:۱۰

افغانستان کې د بې‌وزلي او وزګارتیا زیاتوالی؛ سره صلیب پرې اندېښنه ښودلې


ارشیف: په کابل کې بې وزله مېرمنې او ماشومان
ارشیف: په کابل کې بې وزله مېرمنې او ماشومان

د سره صلیب نړیوالې کمېټې په افغانستان کې د بېوزلۍ او وزګارتیا د پراخېدو په اړه اندېښنه ښودلې ده.

د سره صلیب نړیوالې کمېټې د راپور له مخې په افغانستان کې د بې‌وزلۍ او وزګارتیا پراخېدو د ډېرو خلکو ژوند اغېزمن کړی دی.

په دغه راپور کې چې پرون خپور شو راغلي چې د دې ستونزې د پراخېدو یو علت د څو کلونو وچکالي، د سېلابونو او زلزلو په څېر طبیعي افتونه، د نړیوالو مرستندویانو له خوا د مالي مرستو ځنډول او د افغانستان پر بانکوني سکټور محدودیتونه دي.

د سره صلیب نړیوالې کمېټې د افغانستان څانګې په خپل راپور کې د ماشومانو د خوندیتوب ادارې یا 'سیف دي چلډرن' وروستي راپور ته اشاره کړې چې په کې راغلي، په هرو پنځو افغان کورنیو کې، یوه یې د عوایدو د سرچینو د کمېدو له کبله مجبوره شوې چې په خپلو ماشومانو کارونه وکړي.

په کابل کې کارګر ماشومان. 01 June 2023
په کابل کې کارګر ماشومان. 01 June 2023

'سیف دي چلډرن' ویلي چې د اټکل له مخې یو میلیون ماشومان په کارونو بوخت دي او د زیاتو دغو کورنیو سرپرستي د ښځو لخوا کېږي.

د سره صلیب نړیوالې کمېټې ویلي، د افغانستان اقتصادي ستونزې درک کوي چې له کبله یې د دغه هېواد نیمايي وګړي بشري مرستو ته سخته اړتیا لري.

بابه کریم په کابل کې لاسي ګاډی چلوي چې رویټرز خبري اژانس ته یې ویلي کار و بار نه شته او اوس نه پوهېږي خپل پنځه اولادونه څنګه ماړه کړي.

بابه کریم په کابل ښار کې لاسي ګاډی چلوي.
بابه کریم په کابل ښار کې لاسي ګاډی چلوي.

هغه وویل: "کراچي چلوم. له سهاره تر ماښامه پر سړکونو ګرځم. کاروبار اصلاً نه شته. مخکې ښه وو. پیسې وې خلکو خرید و فروش کاوه، خو اوس ټوله ورځ ممکن ۱۵۰ افغانیو کار وکړم هغه هم که پیدا شي. ډېر اندېښمن یم، د شپې له اندېښنو خوب نه راځي، راتلونکی به مو څه کېږي؟"

د سره صلیب نړیوالې کمېټې په خپل راپور کې د ۴۳ کلن ګل حضرت خبرې هم رااخیستي چې وايي له لاسي ګاډۍ سره د سړک غاړې ته د کار په تمه کېني او په ورځ کې له ۱۰۰ تر ۱۵۰ افغانۍ ګټي، چې د کورنۍ د ضروري شیانو د رانیولو لپاره کفایت نه کوي.

سور صلیب وايي، د ګل حضرت په څېر په افغانستان کې زیات شمېر کسان کار نه شي پیدا کولی او د دوی د خرید ځواک کم شوی دی.

ملګرو ملتونو مخکې ویلي، په افغانستان کې ۲۹ میلیونه او دوه لکه کسان بشري مرستو ته اړتیا لري.

ارشیف: په ارزګان کې پر بې وزله کورنیو خوراکي توکي وېشل شوي.
ارشیف: په ارزګان کې پر بې وزله کورنیو خوراکي توکي وېشل شوي.

دا په داسې حال کې ده چې ژمي ته شا و خوا دوې اوونۍ پاتې دي او د افغانستان په ځینو برخو کې له وړاندې هوا سړه شوې ده.

د خوړو نړیوال پروګرام ویلي، د افغانستان په ځینو برخو کې د ژمي پر مهال د درنې واورې له کبله لارې تړلي وي او اړو کسانو ته د بشري مرستو رسول ستونزمن کېږي.

اړوند مطالب

XS
SM
MD
LG