د پاکستان د بهرنیو چارو وزارت وایي چې د پاکستان دننه تروریستي بریدونه د افغانستان له خاورې تنظیمېږي.
د پاکستان د بهرنیو چارو وزارت وایي، د دغه هېواد پر امنیتي اډو بریدونو ته ډېر اندېښمن دی.
د دې وزارت ویاندې زهرا بلوچ د جمعې په ورځ خبرې غونډې ته وویل چې دا ګواښونه د افغانستان له خاورې پاکستان ته متوجه دي.
دې زیاته کړه چې دا اندېښنې یې د طالبانو له چارواکو سره په افغانستان کې شریکې کړې دي او خبرې روانې دي.
بلوچ ادعا وکړه چې په افغانستان کې ډېره امریکایي وسله پاتې چې یو برخه یې د ترهګرو لاسونو ته لوېدلې ده.
خو د امریکا د ملي امنیت شورا دا تور رد کړ.
د دې شورا ویاند جان کربي د پنجشنبې په ورځ وویل چې د دوی ځواکونو محدود شمېر تجهیزات د کابل په هوایي ډګر کې پرې ایښي وو چې هغه هم د استفادې وړ نه و.
بل لور ته په افغانستان کې طالبانو بیا بیا د پاکستان تور رد کړی دی او وایي چې اسلام اباد د دې په ځای چې نور ملامته کوي، خپل امنیت دې سم ټینګ کړي.
طالبانو دا خبره هم په کراتو کړې چې چا ته اجازه نه ورکوي چې د افغانستان له خاورې د ګاونډیو او د نړۍ د نورو هېوادو پر ضد برید وکړي.
د چهارشنبې په ورځ د پاکستان په چترال کې پراخ برید وشو چې د پاکستاني ځواکونو په وینا، د دوی څلور عسکر په کې ووژل شول.
په چترال کې د پولیسو مشر محمد علي فرانس پرېس اژانس ته وویل چې په سلګونو برید کوونکي د افغانستان له نورستانه د پاکستان خاورې ته داخل شول او په سپکو او درنو وسلو یې پر دوو امنیتي مرکزونو حملې وکړې.
په همدې ورځ په تورخم کې د پاکستاني پوځيانو او افغان طالبانو ترمنځ نښته وشوه چې دا لاره ورسره بنده شوه.
د پاکستان د بهرنیو چارو د وزارت ویانده زهرا بلوچ وایي، د پاکستان دننه ناامنیو ته اندېښنې د دې سبب کېږي چې پولې وتړل شي.
د تورخم له بندېدو سره په زرګونو تنه د ډیورنډ کرښې دواړو لوریو ته ایسار دي.
په دې ډله کې یو هم سمیعالحق نومېږي چې د خبرو له لارې د دې لارې د پرانیستو غوښتنه کوي.
هغه وویل: "موږ مسافر یوو. کله دلته کله هلته ایسارېږو. د هېڅ لورې پلوي نه کوو. د همدې ستونزې له امله پاتې شوي یوو او دا ستونزه تجربه کوو. اوبه او ډوډۍ نه لرو. له دواړو حکومتونو غواړو چې دا ستونزه سره هواره کړي."
د طالبانو د واکمنۍ له پیله تر اوسه په تېرو دوو کلونو کې څو ځله له پاکستاني ځواکونو سره پر پوله نښتې شوې دي.
د طالبانو د کورنیو چارو د وزارت ویاند عبدالمتین قانع تازه ویلي چې په تېرو دوو کلونو کې نژدې پنځوس ځله د افغانستان له ګاونډیو هېوادونو سره په سرحدونو کې نښتې رامنځته شوي دي.
