روسیه وایي، د اوکراین د سمندري ځواکونو درې بې پيلوټه الوتکې یې چې د کریمیا پر پله یې برید کاوه، نسکورې کړې دي.
دا هغه پل دی، چې کریمیا ټاپوزمه د روسیې له خاورې سره وصلوي.
بل لور ته اوکرایني پوځیان وایي دوی هڅه کوي، چې د جنوب ختیځ ښار میلیتوپول پر لور مخته شي او له کریمیا سره د وصل شوي پله لاره قطع شي.
د روسیې د دفاع وزارت په وینا، اوکراین د بې پيلوټه الوتکې په واسطه یو ځل د سپتمبر د لومړۍ نیټې په شپه او دوه ځله نن هڅه وکړه چې د کریمیا پر پله حمله وکړي.
کییف تر اوسه د دې بریدونو په اړه څه نه دې ویلي، خو د راپورونو له مخې د حملو له وېرې پر دې پله د درې ساعتونو لپاره د موټرو تګ راتګ بند شوی و.
اوکراین بیا بیا دا خبره کړې ده، چې د موټرو او ریلګاډو دا پل چې په اوکراین کې د روسیي ځواکونو لپاره د اکمالاتو استفاده ترې کیږي، د دوی مشروع نظامي هدف دی.
اوکراین چې کله د جولای په میاشت کې د کریمیا په لور د غځیدلي پله د موټر د تګ یوه برخه لږ ویجاړه کړه د روسیې له سخت غبرګون سره مخامخ شوه، حتی د اوکراین بیړۍ یې غرقې کړې.
د بې پيلوټه الوتکو د دغو بریدونو او د هغوی د ویشتلو راپورونه په داسې وخت کې خپاره شوې دي، چې اوکرایني ځواکونه هڅه کوي د اوکراین په جنوب ختیځ کې د زاپروژیا په سیمه کې پرمختګ وکړي او له دې لارې له کریمیا ټاپوزمه سره د روسیې له خاورې د وصل شوي پله لاره قطع کړي.
کریمیا ټاپوزمه روسیې په دوه زره څوارلسم کال کې له خپلې خاورې سره یوځای کړه او اوکراین اوس وایي چې د خپلې خاورې د دې برخې د نیولو هڅې کوي.
اوکرایني پوځیانو نن خبر ورکړ چې جنوب ختیځ کې یې د میلیتوپول د ښار په لور پرمختګ کړی دی.
د جمعې په ورځ د سپینې ماڼۍ د ملي امنیت ویاند جان کربي هم خبر ورکړ، چې اوکرایني ځواکونو د زاپروژیا په سیمه کې په وروستیو ورځو کې د پام وړ پرمختګونه کړي دي.
