د لاسرسۍ وړ لېنکونه

تازه خبر
سه شنبه ۲۹ غبرګولی ۱۴۰۳ کابل ۰۲:۴۴

اوکراین سره د ډنمارک او هالنډ د جنګي الوتکو مرسته؛ زلنسکي: که بریالي نه شوو، روسیه به ټول ګاونډیان وګواښي


د اوکراین ولسمشر د ډنمارک له صدراعظمې سره د هغه هېواد په یوه مرسته کړې جنګي الوتکه کې
د اوکراین ولسمشر د ډنمارک له صدراعظمې سره د هغه هېواد په یوه مرسته کړې جنګي الوتکه کې

د اوکراین ولسمشر ولودمیر زلنسکي نن دوشنبه د ډنمارک په پلازمېنه کوپنهاګن کې له کیف سره د ډنمارک او هالنډ تازه پوځي مرستې وستایلې.

زلنسکي ویلي، ډنمارک اوکراین ته د ۱۹ پرمختللو جنګي الوتکو د ورکړې پریکړه کړې او په خبره یې هالنډ هم دوی ته د دوه څلویښتو ( ایف-۱۶) جیټ الوتکو د ورکړې هوکړه کړې ده.

د ازادي راډیو د خبر مرکزي څانګې لیکلي چې د هالنډ صدر اعظم مارک ریوټه ( Mark Rutte ) هم د ۴۲ ایف-شپاړس الوتکو د چمتوالي خبره کړې، خو معلومه نه ده چې دا ټولې به اوکراین ته ورکړي او که نه.

اوکراین له خپلو لویدیځو متحدانو څخه په وار وار د ایف شپاړس جنګي الوتکو غوښتنه کړې ده، خو د ازادي راډیو د خبر مرکزي څانګې لیکلي، ډنمارک او هالنډ لومړني هېوادونه دي چې دغې غوښتنې ته ځواب وایي.

د اوکراین ولسمشر ولودمیر زلنسکي وایي، دوی پر دې کار کوي چې اوکراین پیاوړی او هوایي مدافع سیستم یې لا خوندي کړي.

د اوکراین ولسمشر د ډنمارک له مرسته شویو جنګي الوتکو د لیدنې پر مهال
د اوکراین ولسمشر د ډنمارک له مرسته شویو جنګي الوتکو د لیدنې پر مهال

زلنسکي د دوشنبې په ورځ د ډنمارک د پارلمان غړو ته په وینا کې ویلي:

" که اوکراین بریالی نه شي، د روسیې ټول ګاونډي هېوادونه تر ګواښ لاندې دي."

پر اوکراین د روسیې د ناموجه یرغل دادی نژدې اتلس میاشتې پوره شوې، خو لا هم دغه جګړه دوام لري او هره ورځ د دواړو لورو پوځیانو او دغه راز عامو کسانو ته زیان اړوي.

پر اوکراین سربیره په روسیه کې هم د دغې جګړې اغیزې کله نا کله ښکاري او همدا نن دوشنبه هم د مسکو دوو لویو هوایي ډګرونو د لنډ وخت لپاره د الوتکو ناسته او پرواز ځنډولی و.

دغو هوایي ډګرونو وروسته تر دې فعالیت وځنډوه چې د روسیې دفاع وزارت وویل، د مسکو پر فضا یې د اوکراین یوه بې پیلوټه الوتکه ویشتلې او نسکوره کړې ده.

له تېرو څو اونیو راهیسې، دا څویم ځل دی چې د مسکو هوایي ډګرونه د اوکراین د بې پيلوټه الوتکو له ویرې د لنډ وخت لپاره خپل فعالیتونه دروي.

ډنمارک او هالنډ چې د ناټو غړي هېوادونه دي د اګست په شلمه په یوه ګډه اعلامیه کې له اوکراین سره د پوځي مرستو خبر ورکړی دی.

د اوکراین ولسمشر د هالنډ له صدراعظم سره د خبری ناستې پر مهال
د اوکراین ولسمشر د هالنډ له صدراعظم سره د خبری ناستې پر مهال

ډنمارک ویلي، دوی به له شپږ میاشتنۍ روزنې وروسته خپلې ایف-۱۶ الوتکې اوکراین ته ورکړي او هالنډ هم ویلي، هر کله چې اوکرایني عمله چمتو شي، دوی الوتکې ورسپاري.

ډنمارک او هالنډ د لویدیځ دهغه ایتلاف غړي دي چې په خپله خاوره کې اوکرایني پیلوټان روزي.

روسي چارواکو بیا اوکراین ته د ډنمارک او هالند له خوا دغه پوځي مرسته غندلې ده.

په ډنمارک کې د روسیې سفیر ولادمیر باربین ویلي، دغه مرسته به جګړه نوره هم تاوجنه کړي او اوکراین ته به له جګړې پرته نور غوراوي سخت کړي.

XS
SM
MD
LG