د طالبانو د حکومت یوه مخالفه ډله "د ازادۍ جبهه" د کابل ښار د درېیمې حوزې اړوند په پل سرخ سیمه کې له طالبانو سره د نښتې او پکې د ۵ طالبانو د وژلو او ۲ نورو د ټپي کیدو ادعا لري.
د طالبانو د حکومت د امنیتي بنسټونو ویاندویانو په دې اړه د ازادي راډیو پوښتنو ته ځواب ونه وایه.
د پل سرخ د سیمې یو تن اوسیدونکی چې نه غواړي د امنيتي ستونزو له امله یې نوم په راپور کې خپور شي ،ازادۍ راډيو سره په خبرو کې د دې پېښې پخلى وکړ.
نوموړي وویل:"تېره شپه ۸:۲۳ دقیقې وې او موږ ډوډۍ خوړله، د چاودنې غږ مو واورېد، درې دقیقې وروسته جګړه پیل شوه او څلوېښت دقیقې یې دوام وکړ، ډېر شور وو، هغه سیمه کې چې چاودنه شوې وه ټوله خالي شوې وه ، دوکاندارانو خپل دوکانونه تړلي وو، له پل سرخ څخه دوه دقیقې لرې د پل وحدت په نوم یوه سیمه ده. هلته یو امنیتي مرکز دی په همدې پوسته برید شوی و."
خو ازادۍ جبهې په خپلې اعلامیه کې ادعا کړې، چې نښتې پنځلس دقیقې دوام وکړ او د دغې جبهې جنګېدونکو ته زیان نه دی رسېدلی.
ازادۍ جبهې دغه شان ادعا کړې، چې د جمعې په شپه ۱۱:۴۰ دقیقې یې د بغلان ولایت د پلخمري ښار د پل معدن په سیمه کې یې د طالبانو پر یوه قرارګاه عملیات کړي، چې په پایله کې یې دوه طالبان وژلي او څلور نور یې ټپیان کړي دي.
د دغې جبهې په وینا، چې یو رینجر ډوله موټر یې هم له منځه وړی دی.
په سيمه کې يوې سرچينې هم دغه پېښه ازادي راډیو ته تاييد کړې، خو د نورو جزياتو له ورکولو يې ډډه وکړه.
ازادي راډیو سیمې ته د بشپړ لاسرسي د نه لرلو له امله، په دې اړه خپلواکو سرچینو سره په خبرو ونه توانیده.
ومو غوښتل چې د دې ادعاوو په اړه د طالبانو د حکومت نظر هم واخلو خو د طالبانو د حکومت ویاند ذبیح الله مجاهد د دې راپور تر خپرېدو پورې په دې اړه د ازادي راډیو پوښتنو ته ځواب ونه وایه.
خو طالب چارواکو تر دې وړاندې دا ډول ادعاوې رد کړي او ویلي، چې د افغانستان په هېڅ کومه سیمه کې یې په هېڅ نوم وسله وال مخالفان موجودیت او پر کومې سیمې حاکمیت نه لري.
د افغانستان د ازادۍ جبهې تر دې مخکې هم د طالبانو پر پوستو د بریدونو او د طالب ځواکونو د وژلو او ټپي کولو ادعاوې کړې دي.
دغې جبهې په ۲۰۲۲ کال کې په افغانستان کې خپل موجودیت اعلان کړ.
تر دې وړاندې د افغانستان د ملي مقاومت جبهې هم د اسد میاشتې په لومړیو کې ادعا کړې وه، چې په کاپیسا کې یې درې طالبان وژلي، خو طالبانو په رسمي ډول دا موضوع نه ده تایید کړې.
