چارواکو ویلي چې د خیرسون په سیمه کې د اوبو کچه څو متره لوړه شوې، په لسګونو کسان یې په خپلو کورونو کې ایثار کړي او له امله یې په سلګونو څاروي هم تلف شوي دي.
روغتیایي چارواکو ویلي، د دنیپر سیند د لوی بند ویجاړېدو د دې ترڅنګ چې ناڅاپي سیندونه یې بهولي، په لسګونو زره کسان یې له خپل سیمو بې ځایه کېدو ته اړ کړي دي.
دوی همدارنګه د څښاک د اوبو د احتمالي ککړتیا خبرداری ورکړی دی.
د اوکراین ولسمشر ولادمیر زیلینسکې نن وویل چې د دنیپر د سیند پر سر د ویجاړ شوي بند په نتیجه کې په سلګونو زره کسان د څښاک له اوبو بې برخې شوې دي.
زیلینسکي په ټیلګرام کې لیکلي چې د روسیې تر یرغل مخکې په سیمه کې لږترلږه سل زره کسان اوسېدل او زیاته کړې یې ده چې اوس هم لږترلږه لسګونه زره کسان هلته اوسي.
کییف او مسکو د کاخوفکا د بند چې د شوروي په وخت کې د اوکراین د خیرسون په جنوبي سیمه کې جوړ شوی و، د ویجاړولو پړه پر یو بل اچوي.
د اوکراین ولسمشر ولادمیر زیلینسکي دا پېښه د روسیې له خوا په قصدي توګه د ویجاړی یو عمل او د ډله ییزې وژنې چاپېریالي بم یاد کړی دی.
د اوکراین د بېړنیو چارو دولتي ادارې نن وویل، په داسې حال کې چې په ځینو سیمو کې د اوبو کچه لوړه شوې، د دنیپر سیند په پاسنۍ برخه کې د اوبو کچه مخ په کمېدو ده.
دې ادارې ویلي چې له دغې پېښې وروسته نن سهار د خیرسون په مرکزي برخه کې د اوبو کچه شاوخوا پنځه متره لوړه شوې او په نیکوپول کې هم د اوبو کچه څه باندې دوه متره را ټیټه شوې ده.
نیکوپول د ویجاړ شوي بند د پاسه ۱۲۵ کیلومتره لیرې پروت دی.
چارواکو اټکل کړی چې په راتلونکو ۲۰ ساعتونو کې به د سیند په لاندنۍ برخه کې د اوبو کچه یو متر نوره هم لوړه شي.
د مسکو تر کنټرول لاندې د خیرسون د برخې چارواکو نن په سیمه کې بېړنی حالت اعلان کړی دی.
د اوکراین د روغتیا وزارت همد اشان خبرداری ورکړ چې د دې احتمال شته چې په څاګانو او د اوبو په خلاصو ویالیو کې به اوبه ککړې شوې وې.
اوکرایني چارواکو اټکل کړی چې شاوخوا ۴۲ زره کسان به د سېلابونو له خطرسره مخ وي.
د روسیې له خوا ګومارل شوي ښاروال نووا کاخوفکا ویلي چې د سېلابونو له امله به د دنیپر سیند په لاندنۍ برخه کې په یوه طبیعي ملي پارک کې په زرګونه څاروي تلف شوې وي.
د ملګرو ملتونو سرمنشي انټونیو ګوټېرېش په یوه بیان کې د دغه بند ویجاړول یو لوی بشري، اقتصادي او چاپېریالي ناورین بللی، خو په مستقیمه توګه یې پر روسیې له تور لګولو ډډه کړې ده.