اوکرایني چارواکو پر روسیې تور لګولی چې د دې هېواد په خرسون ښار کې پر دنیپر سیند جوړ د برښنا بند یې الوزولی دی.
اوکرایني چارواکو نن سهار د مسکو تر ولکې لاندې خرسون ښار کې پر دنیپر سیند، د نوو کاخوفکا په نوم د پخواني شوروي اتحاد د مهال د برښنا پر لوی بند د روسیې د برید خبر ورکړ او ویې ویل، د دې سیند له الوزولو وروسته میلیونونه لیتره اوبه د سیمې پر لور ور خوشې شوي.
د نووا کاخوفکا ښاروال ولودیمیر کووالینکو د ازادي راډیو له اوکراینۍ څانګې سره په خبرو کې وویل، یو ژوبڼ، یو سټوډیوم، یوه سینما او یو پارک لا د مخه سېلاب ځپلي او د معمارۍ د صنعت له پلوه ارزښتنمې ودانۍ د زیاتېدونکو اوبو له ګواښ سره مخامخ دي.
په داسې حال کې چې احتمالا دې پېښې به د زاپوریژیا اټومي بټۍ هم له ګواښ سره مخامخ کړې وي، ولسمشر ولودمیر زیلینسکي په دې اړه د خبرو لپاره د ملي امنیت د شورا او د دفاعي شورا غونډه راوبلله.
د اټومي انرژۍ د نړیوالې ادارې مشر د زاپوريژیا بټۍ ته د احتمالي زیانونو پر اوښتو اندېښنه ښودلې.
رافایل ګروسي د د اټومي انرژۍ د نړیوالې ادارې د مشرتابه ډلې ته په خپلو نننیو څرګندونو کې وویل، د نوا کاخوفکا بند سخت زیانمن شوی او په نتیجه کې یې د بټۍ د سړولو لپاره د اوبو په زېرمه کې د پام وړ کموالی راغی.
ګروسي زیاته کړه چې د دې بټۍ د لیدنې په هدف اوکراین ته خپل سفر رامخکې کوي.
نوموړي ويلي: "د زاپوریژیا اټومي بټۍ ته زما سفر د راتلونکې اوونۍ لپاره پلان شوی و، خو اوس دا موضوع ډېره مهمه ده. زه به اوس ولاړ شم."
اوکرایني چارواکي وايي، د دې برید له کبله په ځینو سیمو کې د اوبو سطح تر لسو دولسو مترو پورې لوړه شوې ده.
د چارواکو په وینا نن سهار له برید وروسته له خرسون څخه چې ډېرې سیمې یې سېل لاندې کړي، لسګونه زره کسان له خپلو کورونو وایستل شول.
ولسمشر زیلینسکي پر روسیې د تروریزم تور ولګاوه او ویې ویل چې دې پېښې ټولې نړۍ ته د دې اړتیا ثابته کړه چې روسیه د اوکراین د خاورې له ګوټ ګوټ څخه باید واېستل شي.
زیلینسکي پر ټویټر د نړېدلي بند او او روانو اوبو ویډیو هم خپره کړې او ورسره یې لیکلي چې، مسکو غواړي د اوکراین د خاورې له هر متر څخه د ترور په هدف کار واخلي، نو د ده په وینا باید یو متر یې هم د روسانو په ولکه کې نه وي.
مسکو د دې حملې تور رد کړی او برعکس ادعا یې کړې چې، دا د روسیې پر ضد د تبلیغاتو لپاره د کییف عمدي اقدام دی.
