د پاکستان سترې محکمې پرون پنجشنبې د مخکیني صدراعظم عمران خان نیونه غیرقانوني وبلله او د هغه د فوري خوشې کېدو حکم یې ورکړ، خو دې محکمې په عین حال کې عمران خان ته ویلي چې نن جمعه د اسلاماباد استېناف محکمې ته حاضر شي.
عمران خان د سهشنبې په ورځ د اسلاماباد د استېناف محکمې له مخې ونیول شو چې له کبله یې د نوموړي پلویان وپارېدل او په ټول پاکستان کې یې په اعتراضونو پیل وکړ.
د سترې محکمې ریيس عمرعطا بندیال په محکمه کې عمران خان ته وویل چې دی په غیرقانوني ډول نیول شوی دی.
خو عمران خان بیا ویلي، نوموړی د اسلاماباد له استېناف محکمې څخه تښتول شوی او په ډنډو وهل شوی دی.
پر عمران خان د فساد تورونه لګول شوي، خو ده دا تورونه رد کړي او ویلي یې دي چې په سیاسي انګېزه نیول شوی دی.
د مسلم لیګ د ن ډلې یوې مشرې مریم نواز د عمران خان د خوشي کېدو پر پرېکړې په غبرګون کې ویلي چې عمران خان فتنه دی او د سترې محکمې رییس یې دفاع کړې ده.
د عمران خان پر نیول کېدو هم ډېرو غبرګونونه څرګند کړي وو.
د افغانستان د سولې لپاره د امریکا پخواني ځانګړي استازي زلمي خلیلزاد پرون په څو ټویټونو کې هیله څرګنده کړه چې د پاکستان مشران دا درک کړي چې اوسنۍ لاره یې نېغ په نېغه یوې کندې ته ځي.
له بلې خوا د طالبانو د بهرنیو چارو وزارت د پاکستان پر حالاتو، چې د عمران خان له نیول کېدو وروسته سخت کړکېچن شوي، خواشیني ښکاره کړې ده.
د دغه وزارت مرستیال ویاند حافظ ضیااحمد تکل په یوه ویډیويي پیغام کې پرون وویل: "اسلامي امارت په پاکستان کې د وروستیو تحولاتو په خاطر چې په لړ کې یې تاوتریخوالي شوي، خواشیني څرګندوي. د افغانستان اسلامي امارت په پاکستان کې ثبات د سیمې او نړۍ په ګټه او د پاکستان د مسلمان ملت په خیر بولي. د افغانستان اسلامي امارت په پاکستان کې خپلو ټولو ډیپلوماتیکو استازولیو ته لارښوونه کړې چې په دغه هېواد کې د افغانانو خوندیتوب ته جدي پام وکړي."
د عمران خان د نیونې په اعتراض کې د نوموړي د پلویانو په پرونیو اعتراضونو کې لږ تر لږه ۹ تنه وژل شوي او تر ۲ زره ډېر نور نیول شوي دي.
د راپورونو له مخې، په مظاهرو، په تېره بیا په خیبر پښتونخوا او پنجاب ایالتونو کې سلګونه تنه ټپیان شوي هم دي.