ګارډين:
له بریتانیا خپرېدونکې ګارډين ورځپاڼې د سالنګ تونل دننه د ټانکر چاودېدو او له کبله یې اوښتې مرګ ژوبلې باندې تمرکز کړی دی.
ګارډین لیکلي، د کابل ښار په ۱۳۰ کیلومترۍ کې پروت سالنګ تونل کې د تېلو ټانکر چاودېدو د ښځو او ماشومانو په ګډون لږ تر لږه ۱۹ تنه وژلي او ۳۲ نور یې ټپیان کړي دي.
ورځپاڼې د یکشنبې په ماښام د ځایي چارواکو په حواله لیکلي و چې یو شمېر کسان لا هم په تونل کې بند پاته دي او امکان شته چې د مرګ ژوبلې شمېر زیات شي.
ګارډین د پروان د روغتیایي چارواکو په حواله ویلي، یو شمېر جسدونه دومره سوځېدلي چې د پېژندنې نه دي.
سالنګ تونل په ۱۹۶۰ کال کې د پخواني شوروي اتحاد له خوا جوړ شوی چې د افغانستان د جنوب او شمالي سیمو د نښلېدو اصلي لاره ده.
تراوسه د دغه ټانکر د چاودلو دلیل روښانه نه دی او چاروکو هم د پېښې د لامل په اړه څه نه دي ویلي.
بزنس سټندرد:
بزنس سټندرد ورځپاڼې بیا په افغانستان کې په تعزیري سزاګانو له هغې ډلې دورو وهلو باندې د ملګرو ملتونو اندېښنې ته کتنه کړې.
ورځپاڼې لیکلي، له کله چې د طالبانو مشر ملا هبت الله اخوندزاده خپلو قاضیانو ته وویل چې قصاص عملي کړي، عام محضر کې د دغه ډول سزاګانو پېښې زیاتې شوې.
مطلب کې د ملګرو ملتونو د تېرې جمعې ورځې اعلامیې ته اشاره شوې چې له طالبانو نه یې غوښتي، سملاسي دې دا ډول سزاګانې بندې کړي.
طالبانو د تعزیري سزاګانو د عملي کولو ننګه کړې او د اسلامي شریعت د تطبیق هڅه یې بللې، خو ځینو دیني پوهانو هم نیوکه کړې چې له اسلامي پلوه د دغو سزاګانو عملي کولو ته اوس شرطونه نه دي برابر.
د دغو دیني علماوو یو استدلال دا دی چې طالبان دا مهال حاکمیت لري، خو دغه حاکمیت یې کورنی او بهرنی مشروعیت نه لري.
دوی وایي، د تعزیري سزاګانو حقوقي شرط دا دی چې عملي کونکی حکومت یې باید مشروعیت ولري.
