د لاسرسۍ وړ لېنکونه

تازه خبر
شنبه ۵ لیندۍ ۱۴۰۱ کابل ۱۰:۵۰

د کانکور ازموينه؛ يوه اوونۍ مخکې ياده ازموينه کې د ګډون په موخه ۵۳ زده‌کوونکې ووژل شوې


د کانکور صحنه - ارشيف

نن د افغانستان په ۳۳ ولایتونو کې د کانکور ازموینه په داسې حال کې پیل شوه، چې اووه ورځې وړاندې په دغه ازموینه کې د ګډون لپاره د چمتووالي پر مهال ۵۳ د دولسمو ټولګیو فارغان ووژل شول.

هاجر چې د کاج ښوونیز مرکز زده کوونکې وه له خپلې ښوونکې سره يې ژمنه کړې وه چې تر راتلونکي کاله پورې به خپلې هیلې پوره کړي، خو له دې نه خبره نه وه چې هیلې به یې هیلې پاتې شي.

د هاجر ماما ظاهر مدقق ازادي راډيو ته وویل، هاجر او د هغې ملګرې مرضیې غوښتل چې انجینرانې شي او دواړو د کانکور په وروستۍ ازمایښتي ازموینه کې د ۳۲۵ او ۳۳۰ نمرو په ترلاسه کولو سره خپلې موخې ته نږدې شوي وه.

نوموړي وويل: "په دې وروستیو ورځو کې ډېرې خوشحاله وې ځکه کومې نمرې یې چې غوښتلې، دوې اخیستې وې، د انجینرۍ نوم اورم د کانکور نوم اورم زما رنځ او درد تازه کیږي، ټولو انجونو ته مې پیغام دا دی چې تاسو د مرضیې او هاجر هیلې پوره کړئ هغه کسان چې نن د کانکور ازموینه ورکوي هغوی دې موږ ته ووایي، چې که نن موږ هاجر او مرضیه له لاسه ورکړي نورې هاجر او مرضیې شته چې د هغوی نیمکړې لارې تعقیب کړي."

هاجر او مرضيه چې پر کاج ښوونيز مرکز بريد کې ووژل شوې.
هاجر او مرضيه چې پر کاج ښوونيز مرکز بريد کې ووژل شوې.

دا په داسې حال کې ده، چې نن له کابل پرته د افغانستان په ۳۳ ولایتونو کې د کانکور ازموینه پیل شوې او ټاکل شوې، چې د روانې میاشتې په ۲۱مه نېټه په کابل ښار کې هم د کانکور ازموینه ترسره شي.

د کاج ښوونیز مرکز یوه زده کوونکې اذر ازادۍ راډیو ته وویل، د خپلو ملګرو زده کوونکو لاره تعقیبوي او هڅه کوي چې دا خپله او یا هم د دغه مرکز بل زده کوونکي په ازموینه کې اول نمره شي.

نوموړې وايي: "زموږ یوازینۍ هیله دا ده چې د کانکور په ازموینه کې بریالۍ شو، که موږ امتحان ورنه کړو او په کور کېنو دا معنا چې موږ ماته منلې، خو موږ ماته نه منو، موږ ازموینه ورکوو او دعا کوو چې د کانکو اول نمره هم زموږ له ښونیز کورس څخه وي. تر څو ټول خلک پوه شي چې دوی ماته نه مني."

کاج ښوونيز مرکز چې تېره جمعه پرې ځانمرګی بريد وشو
کاج ښوونيز مرکز چې تېره جمعه پرې ځانمرګی بريد وشو

خو د کابل په دشت برچي سیمه کې د کاج پر ښوونیز مرکز د تېرې جمعې ورځې برید کې ټپي شوي یو شمېر زده کوونکي د کابل ښار د کانکور په ازموینه کې ګډون نه‌شي کولی.

د دې ښوونیز مرکز یو تن استاد نجیب الله ازادي راډیو ته وویل: "ډېر شمېر زده کوونکې ولایتونو ته لاړل او د کانکور په ازموینه کې ګډون کوي، موږ د هغوی د ښو پایلو په تمه یو. موږ د کانکور د ازموینو د ادارې له مشر سره خبرې کړې دي چې له ټپي زده کونکو څخه څه موده وروسته ازموینه واخلي، ځکه هغوی اوس له فزیکي اوذهني اړخه ازموینې ته نه دي چمتو."

د کانکور ازموینه نن له پلازمېنې پرته د افغانستان په ۳۳ ولایتونو کې پیل شوې او ټاکل شوې چې د میزان په ۲۱مه په کابل کې هم واخیستل شي.

که څه هم د طالبانو د حکومت د کورنیو چارو وزارت په افغانستان کې د کانکور د ازموینې د امنیت د ټینګښت ډاډ ورکړی، خو د دې ازموینې یو شمېر ګډونکونکي لا هم د ازموینې د ځایونو د امنیت په اړه اندېښمن دي.

په افغانستان کې د ملګرو ملتونو د سیاسي استازولۍ دفتر یونما د راپور له مخې، د جمعې په ورځ د کابل په لویدیځ کې د کاج پر ښوونیز مرکز په برید کې ۵۳ تنه وژل شوي او ۱۱۰ تنه نور ټپیان شوي دي.

XS
SM
MD
LG