په کابل کې یو شمېر شعیه ګان د محرم په لسیزه کې د احتمالي ګواښونو په اړه اندېښمن دي.
نن یکشنبه د محرم میاشتې دوهمه نېټه ده، د دې میاشتې له پیلېدو سره افغان شیعه ګان د خپلو مذهبي مراسو د امنیت په اړه اندېښمن دي.
د دوی اندېښنې وروسته له هغه ډېرې شوې دي، چې نن سهار د کابل په شېرپور کې په یوه کور راکټ ولګېد.
د طالبانو حکومت د کورنیو چارو وزارت مسوولان وايي، چې دې پېښې تلفات نه درلودل.
د کابل یو تن اوسېدونکی چې نه غواړي د امنیتي ګواښونو له امله یې په راپور کې نوم یاد شي، ازادي راډيو ته یې وویل: "له بده مرغه خبر شوم چې په کابل کې راکټونه لګېدلي دي. د محرم پيل دی او موږ شیعه ګان خپل مراسم نیسو. په همدې خاطر ډېر اندېښمن یوو."
یو بل شیعه وګړی چې د کور ترڅنګ د محرم په مناسبت خلکو ته چای، شیدې او شربت وېشي، وايي، د هر ډول ګواښونو سره هم دوی ژمن دي چې د محرم مذهبي مراسم ولمانځي.
ده زیاته کړه، چې د طالبانو حکومت تر اوسه د دوی لپاره د مذهبي مراسم د جوړولو په برخه کې مزاحمت نه دی کړی او کسانو یې تېره ورځ د محرم د مذهبي مراسم جوړونکو ته د هغوی د پېژندلو لپاره فورمونه هم وېشلي دي.
هغه زیاتوي: "هر څنګه چې شي خلک مذهبي مراسم له پامه نه غورځوي او هېڅ وخت باید دا کار و نه کړي. په هر وخت او ځای کې که ګواښ هم وي، خلک له دې کاره لاس اخیستلی نه شي، حتا که د ځان، مال یا د بل هر څه په بیه هم وي."
په تېرو کلونو کې په افغانستان کې د شیعه ګانو په مذهبي مراسمو په ځلونو بریدونه وشول، په همدې خاطر مخکېني حکومت خلکو ته هم ونډه ورکړې وه چې د محرم د مراسمو په امنیت ساتلو کې برخه واخلي.
اوس یو شمېر شیعه ګان د طالبانو له حکومت څخه هم ورته غوښتنه لري.
یوه تن وویل: "وسله دې راکړي چې خلک خپله په جوماتونو کې امنیت وساتي، له چاودنو او ځانمرګو بریدونو ډېر وېرېږو."
خو د طالبانو حکومت ویاند ذبیح الله مجاهد وايي، دوی به د خلکو په مرسته د محرم مراسمو امنیت ونیسي.
مجاهد زیاته کړه: "هو د مراسمو اجازه زموږ اهل تشیع ورونو ته خامخا ورکول کېږي، امنیت یې هم نیول کېږي. ټولې تیارۍ نیول شوې دي او د خلکو په مرسته به امنیت تامین شي."
د محرم په مراسمو تر ټولو خونړۍ حمله په ۱۳۹۰ کې ابوالفضل ته په منسوب زیارت کې وشوه چې ۵۰ تنه په کې ووژل شول او ۱۵۰ تنه ټپیان شول.
