په افغانستان کې د وروستۍ مرګونې زلزلې یوه لویه برخه قربانیان ماشومان دي، چې ملګرو ملتونو یې د مړو شویو او ټپیانو شمېر شاوخوا څلور سوه تنه ښودلی دی.
ملګري ملتونه په افغانستان کې په وروستۍ مرګونې زلزله کې د په سلګونو لویانو ترڅنګ د لږترلږه ۱۵۵ ماشومانو د مړه کېدو او د دونیم سوه نورو د ټپي کېدو خبر ورکوي.
د ملګروملتونو د بشري مرستو همغږه کونکې ادارې، اوچا ویلي د ریښتر په کچه د ۶،۱ درجې دغې زلزلې چې د تېرې چهارشنبې د ورځې سهار وختي د پکتیکا او خوست ولایتونو غرنۍ سیمې ولړزولې، په سلګونو کورونه یې له خاورو سره یو کړي او ځینو سیمو کې یې ځمکې را ښویولي دي.
ماشومانو ته ډېره مرګ ژوبله د پکتیکا په سخته ځپلې ګیاني ولسوالۍ کې رسېدلې، چې له زلزلې څو ورځې وروسته ژوند په کې بېرته عادي بڼه نه ده خپله کړې او هره خوا کنډوالې ښکاري.
د رحمت په نوم د ګیاني ولسوالۍ یو اوسېدونکی وایي، په کلي کې یې لس دولس کورونه و، چې تقریباً ټول یومخ وران شوي دي.
نوموړي ده او کلیوالو ته یې د اوښتو زیانونو په اړه ازادي راډیو ته وویل: "شپږ شهیدان دي، تقریباً ۶۵ کسه زخمیان دي. څوک مو کابل ته وړي، څوک مو پېښور ته وړي دي. ځینې دلته د خوست هوایي ډګر ته راغلي دي. کورونه مو په مکمله توګه ړنګ دي. یو مې خپل بچی په کې شهید دی."
د دغې زلزلې د تلفاتو دقیقه او وروستۍ شمېره تراوسه نه ده معلومه.
د طالبانو د حکومت چارواکو د مړو شویو شمېر شاوخوا ۱۱۵۰ تنه ښودلی خو د ملګرو ملتونو ادارو د ۷۷۰ تنو د مړه کېدو خبره کړې خو خبرداری یې ورکړی چې ښایي دغه شمېره لوړه شي.
دغې زلزلې د خوست ترڅنګ تر ټولو زیات د پکتیکا په ګیاني او برمل ولسواليو کې خلکو ته ډېر ځاني او مالي تلفات اړولي چې د ټپیانو شمېره یې شاوخوا درې زره تنه ښودل شوې ده.
اوچا دغه راز ویلي، چې د دغه طبیعي افت په نتیجه کې نور ۶۵ ماشومان بې موره او بې پلاره شوي دي.
د ملګروملتونو د ماشومانو د ساتنې ادارې سېف دې چلډرن ویلي ، هڅه کوي هغه ماشومان بېرته له خپلو کورنیو سره یوځای کړي چې د زلزلې په ګډوډۍ کې یوله بله سره جلا شوي دي.
دغې ادارې همدارنګه د یتمیو ماشومانو وضعیت ته هم اندېښنه ښودلې او ویلي، چې ښایي دغه زیانګالي ماشومان د ناوړه چلندونو ښکار شي، ځکه دوی اوس کوم سرپرست نه لري.
دغه راز په زلزله ځپلو سیمو کې د کولرا یا نس ناستې د ناروغۍ چې تر ډېره په ماشومانو کې ژر خپرېږي، د خپرېدو خبرداری هم ورکړل شوی دی.
