د لاسرسۍ وړ لېنکونه

تازه خبر
سه شنبه ۲۵ زمری ۱۴۰۱ کابل ۰۶:۴۲

افغانستان

جنوب ختیځ کې زلزله ځپلي د څښاک پاکو اوبو او خوراکي موادو ته اړتیا لري

په پکتیکا کې د وروستۍ زلزلې له امله د نړېدلي کور انځور

د طالبانو د حکومت د روغتیا وزارت وایي، د افغانستان په جنوب ختیځ کې په زرګونه کسان چې وروستۍ مرګونې زلزلې اغېزمن کړي، د څښاک پاکو اوبو او خوراکي موادو ته اړتیا لري او د ساري ناروغیو د خپرېدو له خطر سره مخامخ دي.

تر دې مخکې د ملګروملتونو د بشري مرستو همغږې کونکې ادارې اوچا په سیمه کې د کولرا یا نس ناستې ناروغۍ د خپرېدو خبرداری ورکړی و.

د دغې زلزلې له امله چې د چهارشنبې د ورځې سهار وختي وشوه، په تر ټولو زیاتو اغېزمنو پکتیکا او خوست ولایتونو کې لږترلږه زرو کسانو خپل ژوند له لاسه ورکړی، دوه زره تنه ټپیان شوي او شاوخوا لس زره کورونه ویجاړ شوي دي.

اوچا په زلزله ځپلو سیمو کې د کولرا د خپرېدو په اړه خبرداری ورکړی او په دې اړه جدي اندېښنه څرګنده کړې.

د طالبانو د روغتیا وزارت ویاند شرافت زمان رویترز خبري آژانس ته ویلي، چې خلک زښت زیات خوړو او پاکو اوبو ته اړتیا لري او زیاته یې کړه چې چارواکو اغېزمن شویو ته روغتیایي خدمات رسولي خو هغوی چې خپل کورونه یې له لاسه ورکړي، له ډېرو ستونزو سره مخامخ دي.

زمان پر نړیوالې ټولنې او د بشري مرستو پر سازمانونو او ادارو غږ وکړ، چې د خوراکي موادو او درملو په برخه کې ورسره مرسته وکړي او د دې خطر ډېر زیات دی چې د دغې زلزلې په ژوندي پاتې شویو کې ناروغۍ خپرې شي ځکه اغېزمن شوي خلک سم کورونه یا سرپناوې نه لري چې په کې واوسي.

د ورځې تازه خبرونه دلته ولولئ

د خوړو نړيوال پروګرام: د توکو د بيو لوړوالی به ګڼې کورنۍ د لوږې له ګواښ سره مخ کړي

کابل کې يو شمېر بې‌وزله مېرمنې

د افغانستان لپاره د خوړو نړیوال پروګرام یا ډبلیو اف پي وایي، په افغانستان کې د خوراکي موادو د بیو بېساری لوړوالی به په دې هېواد کې ډېرې نورې کورنۍ له لوږې سره مخامخې کړي.

ډبلیو اف پي په یوه ټویټ کې ویلي چې په افغانستان کې په اوس وخت کې نږدې نولس ميلیون وګړي د خوړو له شدید نه خوندیتوب سره مخامخ دي او شپږ ميلیونه یې هم قحطۍ ته ورنږدې دي.

ډبیلو اف پي ویلي، له دغو اړمنو کسانو سره د مرستو د دوام لپاره د روان کال تر پایه ۹۶۰ ميلیون ډالرو ته اړتیا لري.

د خوړو نړیوال پروګرام ډبیلو اف پي پرون په یوه بل ټویټ کې ویلي چې روان کال یې په افغانستان کې له ۲۱ ميلیون زیاتو زیانګالو خلکو سره مرستې کړي خو له دغو مرستو سره سره لوږه نه‌ده کمه شوې او اوس هم په ميلیونونو کسان هره شپه وږي بیدیږي.

اوچا له افغانستان سره د استراليا هېواد د يولس ميليون ډالرو مرستې له امله مننه کړې

ډالر - ارشيف

د افغانستان لپاره د ملګرو ملتونو د بشري مرستو همغږه کونکې ادارې یا اوچا د استرالیا د یولس ميلیون استرالیایي ډالرو نوې مرستې مننه کړې.

اوچا ويلي دي چې د استراليا د دغې دوامداره مرستې به په افغانستان کې د خلکو ژوند وژغوري.

اوچا په یوه ټویټ کې ویلي چې استرالیا په دغو نویو مرستو سره هغه بسپنه ورکونکی هېواد دی چې د افغانستان لپاره د بشري مرستو له صندوق سره یې د مرستو اندازه ۶۳ ملیون استرالیایي ډالرو ته رسیږي.

اخوا ملګري ملتونو ويلي دي، چې د مرستو سره سره تر نيمايي ډېر افغانان د لوږې له ګواښ سره مخ دي.

ميليسه فليمينګ: تېر يو کال کې افغان نجونې او مېرمنې ډېرې ځورېدلي

يو شمېر افغان مېرمنې

د یوې سوله‌ییزې، باثباته، عادلانه او انسانۍ نړۍ د رامنځته کولو لپاره د ملګرو ملتونو د نړیوالو اړیکو مشره میلیسه فلیمینګ وایي، په تېر یوه کال کې د افغانستان خلک په تېره ښځې او نجونې ډېرې ځوریدلې دي.

هغې داخبره په یوه ټویټ کې چې د افغانستان لپاره د ملګرو ملتونو مرستندویه دفتر یوناما په خپله ټویټرپاڼه کې خپور کړی، کړې ده.

مېرمن فلیمنیګ ویلي چې موږ باید افغان ښځې او نجونې هېرې نه‌کړو.

د هغې په خبره ملګري ملتونه به هیڅکله هم له دې ټینګار لاس وانه‌خلي چې نجونې په هره سویه ښوونځي ته لاړې شي او هغوی ته په مسلکي ژوند کې د ګډون لپاره وسایل ورکړي.

پر افغانستان د طالبانو له بیا واکمنېدو راهیسې چې نن یې دوهم کال پیل شوی، ډېرو ښځو په دولتي او نورو ادارو کې خپلې دندې له لاسه ورکړي او له شپږم ټولګي پورته نجوني ښوونځي ته له تلو محرومې شوي دي.

نيډ پرايس: د افغانستان د کنګل شوې شتمنۍ د ازادېدو او لګښت پر لارو چارو غور کوو

د امريکا د بهرنيو چارو وزارت وياند نیډ پرایس

د امریکا د بهرنیو چارو وزارت وایي، متحده ایالات په پام کې نه‌لري چې د افغانستان کنګل شوې درې نیم ملیارډ ډالره شتمني ازاده او د طالبانو تر کنټرول لاندې د افغانستان بانک ته وسپاري.

خو هغه لارې چارې لټوي چې له دغو پیسو د افغانستان خلک مستقیماً ګټه پورته کړي.

د بهرنیو چارو د وزارت ویاند نیډ پرایس په واشنګټن کې په یوه خبري کنفرانس کې وویل، په اوس وخت کې موږ فکر نه کوو چې په لنډ مهال کې د افغانستان بانک پانګه زیاته شي.

د تېر کال د اګست له میاشتې چې طالبان پر افغانستان بیا واکمن شوي، د افغانستان بانک شاوخوا اوه ملیارد ډالره شتمني د امریکا په بانکونو کې کنګل شوې ده.

د دغې شتمني نیمایي یعنې درې نیم ملیارد ډالره یې د امریکا د ولسمشر جو بایډن په امر، پر امریکا د ۲۰۰۱ کال د سپټمبر د یوولسمې د تروریستي بریدونو د قربانیانو د کورنیو حقوقي دعواوو ته ځانګړې شوې ده.

افغان کرېکټ لوبډلې له ايرلنډ دويمه شل اوريزه لوبه هم وګټله

افغان کرېکټ ملي لوبډله

د افغانستان د کرېکټ ټیم پرون (دوشنبه) د ایرلنډ لوبډلې ته په ۲۸ منډو ماتې ورکړه.

دا د دوو لوبډلو ترمنځ څلورمه شل اوره سیالي وه. تر دې وړاندې لومړۍ دوې شل اوره سیالۍ ایرلنډ او یوه افغانستان ګټلې وه.

پرونۍ مسابقه د باران د ورېدو له کبله یوولس اورونو ته کمه شوه، افغانستان په ټاکل شویو یوولس اورونو کې د ۶ لوبغاړو د سوځېدو په بدل کې ۱۳۲ منډې جوړې کړې.

د افغانستان لپاره تر ټولو ډېرې منډې نجیب ځدراڼ وکړې چې په ۲۴ توپونو ۵۰ منډې وکړې خو راشد خان نه یوازې دا چې په لسو توپونو ۳۱ ناسوځېدلې منډې وکړې، په باولینګ کې ۲ لوبغاړي وسوځول او د لوبې غوره لوبغاړی وګڼل شو.

اوس دواړه ټیمونه مساوي دي او پنځمه مسابقه به، چې سبا (چهارشنبه) کېږي، د دې لړۍ ګټونکی وټاکي.

دا مسابقې د ایرلنډ په کوربه‌توب په بلفاست ښار کې کېږي.

طالبانو د اريانا نيوز خبريال صبور روفي وهلي ډبولی دی

اريانا نيوز

طالبانو پرون د اریانا نیوز یو خبریال صبور روفي په داسې حال کې وواهه چې نوموړي د چاودنې د ځای تصویر اخیست.

پرون د اریانا نیوز ټلوېزیون د ودانۍ مخته چاودنه وشوه چې په لړ کې یې څو تنه ژوبل شول.

خو کله چې روفي غوښتل پر خپل موبایل ټليفون د پېښې ویډیو واخلي، طالبانو وواهه.

په خپرو شویو تصویرونو کې د روفي له سره پر مخ بهېدلې وینې ښکاري.

طالبانو د خپلې دويم ځلي واک يوه کلنه موده کې لسګونه خبريالان وهلي، شکنجه کړي او بنديان کړي دي.

پرون د طالبانو د بيا ځلي واک د يوې کلنۍ په مناسبت نړيوالو بنسټونو له طالبانو وغوښتل چې له خبريالانو سره تاوتريخوالی ودروي.

حامد کرزی: نږدې ده چې لور مې له ښوونځي محرومه شي

حامد کرزی

د افغانستان پخوانی ولسمشر حامد کرزی وايي، لور یې له ښوونځي څخه محرومېدو ته نژدې ده ځکه چې طالبان له شپږم ټولکي پورته نجونو ته د زده کړو حق نه ورکوي.

ښاغلي کرزي د جرمني له دویچې ویلې سره په مرکه کې وویل چې د ده لس کلنه لور، ملاله له شپږم ټولګي څخه فارغېدو ته نږدې ده او له شپږم پورته به درس نه شي ویلی.

طالبانو تېر کال له واک ته رسېدو وروسته ویلي و چې په نوي تعلیمي کال کې به د نجونو ټول ښوونځي پرانیزي خو خپله ژمنه یې د نړیوالو له فشارونو سره سره په ځای نه کړه.

پرون د طالبانو د بيا ځلي واک کال پوره شو، خو لا هم له شپږم ټولګي پورته د نجونو ښوونځي تړلي دي.

پر کور دننه او بهر په ځلونو له طالبانو غوښتنه وشوه چې د نجونو ښوونځي خلاص کړي، خو طالبانو ويلي چې په دې اړه د خپل مشرتابه امر ته انتظار دي.

سيما بحوث: د طالبانو واکمنۍ کې د نجونو او مېرمنو وضعيت لا هم ناوړه دی

يو شمېر معترضې افغان مېرمنې

د ملګرو ملتونو د ښځو د چارو مشره وايي، د طالبانو له واکمنۍ یو کال وروسته د افغان ښځو او نجونو وضعیت لا هم ناوړه دی.

سیما بحوث پرون (دوشنبه) د طالبانو د واک ته رسېدو له لومړۍ کالیزې سره هم‌مهاله په یوه بیان کې وویل، افغان ښځې او نجونې له کار او تعلیمه بې برخې کړای شوي، روغتیايی اسانتیاوې یې محدودې شوي، او تاوتریخوالی پرې زیات شوی دی.

دې له ښځو سره د طالبانو چلند د جنسیت پر اساس تشدد وباله.

اغلې بحوث پر طالبانو غږ وکړ چې د نجونو ښوونځي پرانیزي او ښځو ته د کار د اجازې ترڅنګ په حکومت کې ونډه ورکړي.

ملګري ملتونه: اوس هم وخت شته چې طالبان د افغانستان د ستونزو په اړه فکر وکړي

ارشيف

ملګرو ملتونو پرون له طالبانو وغوښتل چې لا هم فرصت شته چې له ستونزو څخه د افغانستان د ایستلو لپاره فکر وکړي.

په افغانستان کې د ملګرو ملتونو مرستندوی ماموریت یا یوناما د طالبانو د واک ته رسېدو د کال له پوره کېدو سره هم‌مهاله همدا راز وویل، که بدلون را نه‌وړل شي، وضعیت ښايي لا خراب شي.

یوناما پر خپله ټویټرپاڼه لیکلي چې نړیواله ټولنه له هغو کسانو سره تعامل کوي چې بشري حقونه رعایتوي او د ټولو افغانانو استازیتوب کوي.

پرون طالبانو د واک ته رسېدو د لومړۍ کالیزې په مناسبت له نړیوالې ټولنې څخه د همکارۍ غوښتنه وکړه.

رينا اميري: افغانان پراخ بنسټه حکومت غواړي

د افغانستان د ښځو، نجونو او بشري حقونو لپاره د امریکا ځانګړې استازې رينا اميري

د افغانستان د ښځو، نجونو او بشري حقونو لپاره د امریکا ځانګړې استازې وایي، نړۍ دې د افغانانو د یوه پراخ بنسټه حکومت د جوړولو د غوښتنې ملاتړ وکړي.

رینا امیري نن پر خپله ټویټرپاڼه لیکلي، افغانان داسې پراخ بنسټه حکومت غواړي چې د ټولو خلکو حقونو ته درناوی ولري.

میرمن امیري وایي، اوسمهال ګڼ شمېر افغانان په ځانګړې توګه ښځې او نجونې له عامه نظره څنډې ته شوي او "د تاوتریخوالي تر سیوري" لاندې ژوند کوي.

امیري د افغانستان راتلونکې لار اوږده او له ننګونو ډکه بللې، خو زیاته کړې ده چې امریکا د افغانانو ترڅنګ دریږي.

په خوست کې د ازادۍ راډ‌یو پخوانی خبریال امیر بهیر د ناڅاپي ناروغی له کبله ومړ

امير بهير

امیر بهیر شاوخوا ۶۳ کاله عمر درلود او ۱۲ کاله یې له ازادي راډیو سره کار وکړ.

نوموړي اوس مهال د خوست د لوړو زده کړو په یو شمیر موسسو کې د حقوقو او سیاسي علومو پوهنځي استاد وو.

امیر بهیر د څو کلونو لپاره په خوست کې د خبریالانو د یوې خپلواکې ټولنې مشر وو او د رسنیزو بنسټونو او خبریالانو د حقوقو په دفاع کې يې مهمه ونډه درلوده.

د امیر بهیر مړی نن د دوشنبې په ورځ په خپله پلرنۍ هدیره کې خاورو ته وسپارل شو.

د نوموړي د جنازې په مراسمو کې د ځايي خلکو سربېره د دې سیمې یو شمېر روڼ اندو، د رسنیو استازو او د مدني ټولنو فعالانو برخه اخیستې وه.

د خوړو نړيوال پروګرام: روان کال مو ۲۱ ميليون زيان‌ګالو افغانانو سره مرستې کړي

مرستې - ارشيف

د خوړو نړیوال پروګرام ډبیلو، اف، پي وایي، روان کال یې په افغانستان کې له ۲۱ ميلیون زیاتو زیانګالو خلکو سره مرستې کړي دي.

خو ډبیلو اف پي نن په یوه ټویټ کې ویلي چې له دغو مرستو سره سره لوږه نه‌ده کمه شوې او اوس هم په ميلیونونو کسان هره شپه وږي بیدیږي.

د خوړو نړیوال پروګرام ویلي چې د خوراکي مرستو د دوام لپاره ۹۶۰ ميلیون امریکایي ډالرو ته اړتیا لري چې په ژمي کې د اتلس ميلیونه کسانو لاس‌نیوی وکړي.

بل پلو د افغانستان لپاره د ملګرو ملتونو د خوړو او کرڼې اداره یا فاو وایي، په تېرو دولسو میاشتو کې یې په افغانستان کې له زیانګالو بزګرو سره د غنمو د اصلاح شویو تخمونو، کیمياوې سرې او تخنیکي روزنې مرستې کړي ترڅو د خوړو د نه خوندیتوب د بحران مخه ونیول شي.

فاو په یوه ټویټ کې ویلي چې غنم د افغانستان اصلي محصولات دي او د دې هېواد د وګړو د ټول مصرف شاوخوا اویاسلنه جوړوي.

ملګري ملتونه: د افغان نجونو او ښځو له وړتيا ګټه نه‌ده اخيستل شوې

يو شمېر افغان نجونې چې انځورګري کوي

د ملګرو ملتونو د جنسیتي مساواتو او د ښځو د پیاوړتیا د چارو ادرې ویلي، په افغانستان کې د ښځو او نجونو له وړتیاووهیڅ استفاده نه‌ده شوی.

دغې اداري نن په یوه ټویټ کې ویلي، تر هغو به افغانستان تلپاتې سولې او ثبات ته ونه رسیږي ترڅو د دې هېواد په ورځني ژوند کې د ښځو پر مساوي ګډون بندیز لیرې شوی نه وي.

له کله چې طالبان بیا پر افغانستان واکمن شوي، پر ښځو او نجونو د زده کړې او کار په برخو کې محدویتونه لګول شوي دي.

ډېرو ښځو خپلې دندې له لاسه ورکړي او له شپږم ټولګي پورته نجونې هم له زده کړو محرومې شوي دي.

اروپايي ټولنه: طالبانو د خپلې واکمنۍ په يو کال کې د ښځو له حقونو سرغړونه کړې

طالبانو څو ځل د مېرمنو د اعتراضونو مخه ونيوله

اروپایي ټولنه وایي، طالبانو د خپلې واکمنۍ په یوه کلنه دوره کې په افغانستان کې د ښځو او نجونو له حقونو څخه په کلکه سرغړونې کړي دي.

نن دوشنبې د زمري ۲۴مه، د اګست ۱۵ په افغانستان کې د طالبانو د واکمنۍ یو کال پوره شوه خو تر اوسه یې حکومت د نړۍ هیڅ یوه هېواد په رسمیت نه‌دی پېژندلی.

د اروپایي ټولنې یوې ویاندې نبیلا مسرالي پر افغانستان د طالبانو د واکمنۍ د کلیزې په ترڅ کې پرون یکشنبې په یوه بیان کې وویل، طالبان د یوه ټول شموله سیاسي نظام په رامنځته کولو کې پاتې راغلي او په دې توګه یې د افغانانو هیلې له خاورو سره یو کړي دي.

پر ښځو د نورو محدودیتونو ترڅنګ له شږم ټولګي پورته نجونې له منځنیو او ثانوي زده کړو محرومې شوې دي.

نړیوالو، بشري حقونو په تېره بیا د نجونو او ښځو زده کړې او کار ته درناوی، د یوه ټولشموله حکومت جوړېدا او ځینې نورشرطونه د طالبانو مخ ته ایښي دي.

ارزګان کې سېلابونو د سر او مال زيانونه اړولي

افغانستان کې راوتلي سېلابونه

په ارزګان کې د طالبانو چارواکي وايي، په دې ولایت کې سېلابونو د سر او مال زیانونه اړولي دي.

د ارزګان ولایت د والي ویاند مولوي علي جان پوهنیار نن ازادۍ راډيو ته وویل چې دغه سېلابونه پر خاص ارزګان او چنارتو ولسوالیو راغلي او په خاص ارزګان ولسوالۍ کې یې یو ماشوم مړ کړی دی.

نوموړی وايي، په چنارتو ولسوالۍ کې سېلابونو د مسافرو درې موټر وړي او سلګونه جریبه زراعتي ځمکه او لسګونه کورونه یې تخریب کړي، خو ځاني زیان چا ته نه دی رسېدلی.

له څو ورځو د افغانستان په نورو ولایتونو کې هم سېلابونو خلکو ته زیانونه اړولي دي.

نور راوښيه

XS
SM
MD
LG