د لاسرسۍ وړ لېنکونه

تازه خبر
شنبه ۲۹ زمری ۱۴۰۱ کابل ۰۹:۱۶

افغانستان

د روغتيا نړيوال سازمان د افغانستان له زلزله ځپلو سره روغتيايي برخه کې د مرستو خبر ورکړی

د روغتيا نړيوال سازمان نښان

د روغتیا نړیوال سازمان وایي د پکتیکا او خوست د زلزله ځپلو د درملنې لپاره یې شپږو روغتیايي مرکزونو سره ملاتړ کړی.

دغه سازمان پرون د زلزله ځپلو خلکو د درملنې په اړه یو مفصل راپور خپور کړی.

په راپور کې راغلي چې د روغتیا د نړیوال سازمان په همکارۍ باندې په پکتیکا، خوست، پکتیا او غزني ولایتونو کې شپږ روغتونونه فعاله ساتل شوي او د ټپيانو او زیان لیدلو درملنه کوي.

په راپور کې د ټپیانو تازه شمېر ۲۹۴۹ تنه یاد شوی او د مړو بیا ۱۰۳۶ تنه ښودل شوی.

د روغتیا د نړیوال سازمان په هڅو سربېره د ملګرو ملتونو نور بنسټونه او خیریه سازمانونو هم واړه او سیار صحي ټيمونه تنظیم کړي او د ټپیانو او زیان لیدلو درملنه کوي.

د ورځې تازه خبرونه دلته ولولئ

لندن کې د افغانستان د خپلواکۍ کالیزه ونمانځل شوه

ارشیف: په لندن کې د افغانانو له غونډې یو انځور

تېره شپه سلګونو افغانانو د لندن په لوېدیځ کې د ساوت هال په سیمه کې له بریتانیا څخه د افغانستان د خپلواکۍ د اخیستو جشن جوړ کړ.

واټونو ته د سلګونو کسانو د راوتلو له کبله ګڼ سړکونه په ساعتونو بند شول.

تر دې وړاندې د لندن په همدې سیمه کې، چې اکثره اوسېدونکي یې هندیان او پاکستانیان دي، د اګست په څوارلسمه پاکستانیانو او د اګست په ۱۵ مه هندیانو د خپلو هېوادونو خپلواکۍ ونمانځلې.

تېره شپه په ساوت هال او شاوخوا سیمو کې یې پولیسو د شپې تر ناوخته پورې واټونه بند کړي وو چې په دغه ځای کې افغانان په اسانه د خپلواکۍ جشن ونمانځي.

د سیمې د پولیسو مشر دورمیرز ویلز خلکو ته پرون خبر ورکړی و چې ساوت هال براډوې به د جمعې په ورځ د مازدیګر له ۶ بجو د شنبې د سهار تر ۳ بجو بنده وي.

د طالبانو حکومت د کاني موادو ګمرکي محصول لوړ کړی

ارشیف: د بلخاب کان

د طالبانو د حکومت د مالیې وزارت وايي، د کاني موادو ګمرکي محصول یې ۲۵ سلنې ته لوړ کړی دی.

د دغه وزارت په وینا د ناپروسس شویو معدني موادو پر صادراتو مالیه پخوا ۵ سلنه وه.

دا وزارت وايي چې تعرفه یې د دې لپاره لوړه کړې چې د کاني موادو بیه د نړیوالو بازارونو له بیې سره برابره شي.

د طالبانو حکومت له روسیې سره د بارتري سوداګرۍ غوښتنه کړې

د طالبانو بیرغ

د روسیې ریا نووستي خبري اژانس وايي، په افغانستان کې د طالبانو د حکومت چارواکو له روسیې سره د بارتري سوداګرۍ غوښتنه کړې ده.

د اژانس پر اساس، طالبانو وړاندیز کړی چې د روسیې د تېلو او نورو محصولاتو په بدل کې به دغه هېواد ته منرالونه، ممیز او طبي بوټي صادر کړي.

د طالبانو د حکومت د سوداګرۍ او صنعت وزیر نورالدین عزیزي ویلي چې که د روسیې او افغانستان ترمنځ بارتري سوداګري ممکنه نه شوه د سوداګرو په وسیله به د پیسو د انتقال له لارې له روسیې تېل واخلي.

د طالبانو پر حکومت د امریکا د بندیزونو له کبله افغانستان ته د پیسو انتقال له ستونزو سره مخامخ دی.

یونیسف: ۱۳ میلیونه افغان ماشومان بشري مرستو ته اړتیا لري

په کابل کې وچې ډوډۍ ته منتظرې مېرمنې او ماشومان. January 24, 2022

د ماشومانو د ملاتړ لپاره د ملګرو ملتونو مرستندوی صندوق یا یونیسف وايي، پر افغانستان د طالبانو د ولکې له ټینګولو کال وروسته هم ۱۳ میلیونه ماشومان بشري مرستو ته اړتیا لري.

یونیسف پرون ناوخته په یوه ټوېټ کې ویلي، دوی به په افغانستان کې د هر ماشومام ملاتړ ته ژمن پاتې شي.

ملګرو ملتونو ویلي چې په افغانستان کې نږدې درې نیم میلیونه ماشومان له خوارځواکۍ کړېږي.

رسنۍ: طالبانو په بدخشان کې ۳ وسله وال وژلي

د افغانستان په عمومي نقشه کې د بدخشان موقعیت

د طالبانو تر ولکې لاندې باختر اژانس خبر ورکړی، چې تېره شپه په بدخشان کې د یوه کمین په نتیجه کې ۳ تنه چې اژانس «بغاوتګر» بللي وژل شوي دي.

د بدخشان لپاره د طالبانو د اطلاعاتو او فرهنګ رئیس معزالدین احمدي ویلي، په دې پېښه کې چې په راغستان ولسوالۍ کې درې نور کسان ټپیان شوي دي.

طالبان خپلو مخالفو وسله والو ته یا هم د بغاوتګرو یا هم خوارجو اصطلاحات کاروي.

د افغانستان په ځینو برخو کې د طالبانو پرضد وسله وال مقاومتونه روان دي، چې طالبان یې زیات مهال کم اهمیته ښيي.

د افغانستان په یو شمېر ولایتونو کې د شدیدو ورښتونو اټکل شوی

ارشیف: په پنجشېر کې د سېلابونو له امله د اوښتو زیانونو یو انځور

د افغانستان د هوا پېژندنې ادارې وړاندوینه کړې چې نن جمعه او سبا شنبه به د هېواد په یو شمېر ولایتونو کې شدید ورښتونه وشي.

د دې ادارې پر اساس، نورستان، کونړ، بدخشان، ننګرهار، کاپیسا، پنجشېر، بغلان، تخار، کاپیسا، پروان، بامیان، سمنګان، کابل، میدان وردک، لوګر، پکتیا، غزني، زابل، ارزګان، غور، کندهار، او هلمند هغه ولایتونه دي چې د سختو ورښتونو او په نتیجه کې یې د سېلابونه د جاري کېدو اټکل کېږي.

د هواپېژندنې دادارې له وړاندوینې سره سم، په ځینو سیمو کې ممکن تر ۷۰ میلي مترو پورې باران واوري.

په افغانستان کې وروستیو سېلابونو سلګونه کسان مړه کړي او ژوبل کړي، لسګونه زره جریبه کرنیزه مځکه او سلګونه کورونه یې ویجاړ کړي دي.

چارواکي: د بغلان د سکرو په یوه کان کې ۳ کارګر مړه شوي

ارشیف

چارواکي وايي، د بغلان ولایت د ده صلاح ولسوالۍ د سکرو په کان کې ۳ کارګر مړه شوي دي.

د طالبانو تر کنټرول لاندې باختر خبري اژانس د ده صلاح د ولسوال په قول ویلي چې دا درې تنه په الوګک کان کې د میتان ګاز د خپرېدو له کبله مړه شوي دي.

د سیمې اوسېدونکي وايي، له دغه کان څخه د ډبرو سکاره عموماً په غیر فني ډول استخراجیږي او په کان کې د سمڅو کلکوالي ته هم پام نه کوي.

په دایکنډي کې د ټرافیکي پېښې له امله ۱۶ کسانو ته مرګ ژوبله اوښتې

ارشیف

په دایکنډي ولایت کې پرون پنجشنبې ۱۶ تنه په یوه ټرافیکي پېښه کې مړه او ژوبل شول.

د طالب چارواکو په وینا، د شهرستان ولسوالۍ په تګابلور کې د یوه قلاینګ کوچ موټر د چپه کېدو په نتیجه کې ۵ تنه مړه شوي او ۱۱ نور ژوبل شوي دي.

په ټپیانو کې ۳ ماشومان هم شامل دي.

د لارو خرابوالی، د موټر چلوونکو بې احتیاطي او د ټرافیکي مقرراتو نه رعایت په افغانستان کې د اکثرو ټرافیکي پېښو عوامل بلل کېږي.

د ملګرو ملتونو سرمنشي افغانستان کې په وروستیو چاودنو اندېښنه وښوده

د ملګرو ملتونو سرمنشي انتونیو ګوتیریش

د ملګرو ملتونو سرمنشي په افغانستان کې د هغو چاودنو په اړه خپله ژوره اندېښنه وښوده، چې روانه میاشت یې له کبله د ماشومانو په ګډون تر ۲۵۰ زیاتو کسانو ته مرګ ژوبله اوښتې ده.

انتونیو ګوتیریش د تېرې چهارشنبې چاودنه هم په کلکو ټکو غندلې چې د کابل په ابوبکر جومات کې وشوه او د طالبانو په وینا تر ۲۰ زیات کسان یې په نتیجه کې ووژل شول.

د ملګرو ملتونو د پرونۍ اعلامیې له مخې، د ملګرو ملتونو سرمنشي د قربانیانو له کورنیو سره خواخوږي ښوولې او ټپیانو ته یې د عاجلې شفا غوښتنه کړې ده.

د ملګرو ملتونو په اعلامیه کې ویل شوي، د ټروریزم هر عمل جنایت او غیرموجه کار دی.

د اعلامیې په وینا، ټول افغانان په سوله کې د ژوند کولو او د خپلو مذهبي ازادۍ د تجربه کولو حق لري.

طالبانو کندهار کې غونډه جوړه کړې

کندهار کې د طالبانو له لوري جوړه شوې غونډه

په کندهار کې د سلګونو کسانو په ګډون یوه غونډه جوړه شوې، چې طالبان یې د خلکو لویه ولسي غونډه بولي.

باختر اژانس چې د طالبانو په کنټرول کې دی وايي، په دې غونډه کې تر ۳۰۰۰ زیاتو قومي مشرانو، دیني عالمانو، فرهنګیانو او دولتي چارواکو ګډون کړی دی.

داسې ښکاري چې دې غونډې ته هم د طالبانو پلوي کسان وربلل شوي او باختر اژانس یې د ویناوو هغه برخې خپروي چې د طالبانو د حکومت په پلوي وي.

څه باندې میاشت مخکې کابل کې هم د دیني عالمانو یوه غونډه رابلل شوې وه، چې د طالبانو په خبره تر ۳۵۰۰ زیاتو کسانو په کې برخه اخیستې وه.

د بشردوستۍ نړیواله ورځ؛ اوچا په افغانستان کې خپل کارکوونکي وستایل

ارشیف: په افغانستان کې د مرستې رسولو بهیر څخه یو انځور

د ملګرو ملتونو د بشري مرستو د همغږۍ ادارې اوچا د بشردوستۍ نړیوالې ورځې په درشل کې د خپلو ټولو کارکوونکو په ځانګړي ډول ښځینه همکارانو مننه کړې چې په افغانستان کې په خورا سختو شرایطو کې د خلکو تر څنګ ولاړ دي.

سبا د اګست ۱۹مه د بشردوستۍ نړیواله ورځ په داسې حال کې لمانځل کېږي چې د ملګرو ملتونو د بېلابېلو ادارو په خبره په افغانستان کې بشري بحران په پراخېدو دی او د دغه هېواد تر نیمايي زیات وګړي عاجلو بشري مرستو ته اړتیا لري.

د افغاني سرې میاشتې ټولنه وايي، په لوګر کې له ۸۴ سېلاب ځپلیو کورنیو سره د غیرخوراکي توکو مرسته وشوه.

په وروستیو کې د افغانستان په بېلابېلو ولایتونو کې تر سختو اورښتونو وروسته سېلابونه بهېدلي چې خلکو ته یې د سر او مال زیانونه اړولي دي.

د لوګر چارواکي وايي، چې په دې ولایت کې ۶۰ کورونه په بشپړ ډول او ۲۴ نور کورونه یو څه تخریب شوي دي.

ملګري ملتونه: په افغانستان کې د بېځایه شویو او زیانګالو ډلو ملاتړ ته ژمن یو

ارشیف: په کابل کې د بېځایه شویو کډوالو انځور

د کډوالو په چارو کې د ملګرو ملتونو لویه کمېشنري وايي، له خپلو شریکانو سره یوځای په افغانستان کې درې نیم میلیونه داخلي بېځایه شویو او نورو زیانګالو ډلو ملاتړ ته ژمن دي.

د دغې ادارې د پروني ټویټ له مخې دغه شمېر کسان د شخړو او نورو ستونزو له کبله د خپلو مېنو پرېښودو ته مجبوره شوي دي.

د کډوالو په چارو کې د ملګرو ملتونو لویه کمېشنري وايي، د دغو کسانو د اړتیاوو پوره کولو لپاره دوی پر خپلو تمویلوونکو حساب کوي، ځکه د دوی عاجل ملاتړ ته اړتیا لیدل کېږي.

که څه هم په افغانستان کې امنیتي وضعیت نسبتاً ښه شوی، خو په لسګونو زره کورنۍ لا هم نه دي توانېدلي خپلو اصلو مېنو ته ستنې شي.

ملګري ملتونه: میلیونونه افغان مېرمنې رواني ملاتړ ته اړتیا لري

ارشیف: د معترضو افغان مېرمنو انځور

په افغانستان کې د ملګرو ملتونو د وګړو صندوق وايي، په دغه هېواد کې دوه ملیونه او ۲ لکه زیانګالې مېرمنې او نجونې چې عمرونه یې د ۱۵ او ۴۹ کلونو ترمنځ دي رواني ملاتړ ته اړتیا لري.

د ملګرو ملتونو دغې ادارې پرون په خپل رسمي ټویټر کې لیکلي، چې دغه ښځې او نجونې د خوندیتوب او ښې روغتیا لپاره هم لاسنیوي ته اړتیا لري.

وروسته له هغې چې طالبانو کال مخکې پر افغانستان ولکه ټینګه کړه، د نجونو پرمخ یې تر شپږم پورته ټولګي وتړل او ګڼې ښځې یې له کاره منع کړې.

په ځینو راپورونو کې ویل شوي، چې دې وضعیت د افغان نجونو او ښځو پر وضعیت په رواني لحاظ ډېر منفي تاثیرات کړي دي.

په افغانستان کې د کرونا ویروس ۲۰۰ تازه مثبتې پېښې ثبت شوي

آرشیف

د روغتیا نړیوال سازمان وايي، کرونا ویروس یا کوویډـ۱۹ ناروغي لا هم ختمه شوې نه ده.

په افغانستان کې د روغتیا نړیوال سازمان څانګې پرون په یوه اطلاعیه کې له ځوانانو غوښتنه کړې چې له کرونا ویروس د خوندیتوب لپاره پخوانۍ سپارښتنې رعایت کړي، چې هغه د ماسک کارول، د کرونا ضد واکسین لګول، له نورو د جسمي فاصلې رعایتول، په وار- وار په صابون لاس مینځل او له نورو خلکو سره د خپلو وسایلو نه شریکول دي.

د ولدومیټرز ویبسایټ په وینا، په افغانستان کې د کرونا ویروس مثبتې پېښې نږدې یو لک او ۹۰زرو ته رسېږي او پرون هم د څه باندې ۲۰۰ مثبتو پېښو راپور ورکړل شوی دی.

افغان کرکټ ملي لوبډلې خپله وروستۍ لوبه ایرلنډ ته وبایلله

افغان کرکټ لوبډله

ایرلنډ افغانستان ته د کرکټ په پرونۍ شل اووره مسابقه کې په ماتې ورکولو سره د دې لوبلړۍ ګټونکی شو.

پرونۍ لوبه افغانستان پیل کړه، چې په ۱۵ اوورونو کې یې د ۵ لوبغاړو په سوځېدو سره ۹۵ منډې وکړې.

لوبه د باران له کبله وځنډېده او بالاخره پرېکړه وشوه، چې ایرلنډ به په ۷ اوورونو کې ۵۶ منډې کوي.

افغانستان د دغو پنځو مسابقې دوې هغه ګټلې او ۳ یې ایرلنډ وګټلې.

نور راوښيه

XS
SM
MD
LG