د لاسرسۍ وړ لېنکونه

تازه خبر
جمعه ۱۰ وری ۱۴۰۳ کابل ۰۸:۰۵

د امريکا پرلپسې اندېښنې: افغانستان کې د داعش فعاليت زموږ ګټې ګواښلی شي


د امريکا د کانګرس ودانۍ
د امريکا د کانګرس ودانۍ

د امریکا د دفاع وزارت چارواکي ټینګار کوي چې په افغانستان کې د داعش یا اسلامي دولت نومې وسله والې ډلې وړتیا په دې کچه ده چې کولای شي د دوی ګټې وګواښي.

د دغه وزارت ویاند جان کربي د پنجشنبې شپه د مې په ۱۹مه نېټه په یوه خبري ناسته کې د یوې افغانې خبریالې د پوښتنې په ځواب کې وویل: "زموږ دریځ ښکاره او ثابت دی چې نه غواړو په افغانستان کې د داعش - په ځانګړې توګه د داعش خراسان څانګې بېرته حضور وګورو. دوی لا د مخه شتون لري، مګر زما مطلب دا دی، تاسو پوهېږئ، د دوی په وړتیاوو کې داسې وده لیدل کېږي چې زموږ ګټې به وګواښي، او موږ چې څومره کولی شو دوی به له نږدې څارو."

دی وايي امریکا به د افغانستان له لوري د دوی پر وړاندې بل ګواښ ونه مني او له همدې امله د ترهګرۍ پر وړاندې د مبارزې پر وړتیاوو کار کوي.

هغه زیاته کړه: "هغه څه چې موږ یې نه شو منلی هغه زموږ د هېواد لپاره یو بل ګواښ دی چې له افغانستان څخه راپورته کیږي او له همدې امله موږ به د دې ډاډ ترلاسه کولو باندې متمرکز پاتې شو چې موږ دې سره د مقابلې لپاره له لرې هم د مبارزې وړتیا لرو."

ښاغلي کربي دا هم وویل چې دوی د داعش ډلې د څارولو لپاره د وړتیاوو د زیاتېدو په تړاو له خپلو سیمه ییزو ملګرو سره خبرې کوي.

د امريکا د دفاع وزارت ویاند جان کربي
د امريکا د دفاع وزارت ویاند جان کربي

هڅه مو وکړه د دغه امریکایي چارواکي د ادعاوو او اندېښنو په اړه د طالبانو د حکومت نظر ولرو خو د راپور تر خپرېدو مو ځواب تر لاسه نه کړ.

خو وړاندې د طالبانو د حکومت ویاند ذبیح الله مجاهد ازادي راډیو سره خبرو کې ویلي وو دوی داعش ډله ځپلې او ډاډ یې ورکړی وو چې د افغانستان له خاورې به د هېڅ هېواد پر ضد استفاده ونه شي، هغه څه چې د امریکا او طالبانو تر منځ د دوحې د تړون یوه برخه هم ده.

هغه ادعا چې په افغانستان کې پر جوماتونو او روزنیزو مرکزونو د داعش په وروستیو حملو سره ننګول شوې ده.

دا په داسې حال کې ده چې د روانې مې میاشتې په ۱۷ پنټاګون د دفاعي معلوماتو په یوه برخه کې په افغانستان کې د داعش او القاعدې د فعالیتونو په اړه اندېښنې ښودل شوې وې او ویل شوي وه چې له افغانستانه د امریکايي پوځیانو په وتلو او د ترهګرۍ ضد عملیاتو په کمېدو سره، داعش په دغه هېواد کې خپل حضور او بریدونه زیات کړي دي.

مزار شريف کې هغه مسجد چې تېره روژه کې داعش وسله والو خونړی بريد پر وکړ.
مزار شريف کې هغه مسجد چې تېره روژه کې داعش وسله والو خونړی بريد پر وکړ.

د امریکایي چارواکو په خبره،که د داعش خراسان څانګه له اوسني وضعیت ګټه پورته کړي، نو په راتلونکو ۱۲-۸ میاشتو کې به د امریکا په ګډون د لوېدیځ په نښه کولو لپاره د بهرني عملیات ترسره کولو توانایې ولري.

دا په داسې حال کې ده چې داعش په دې وروستیو میاشتو کې په افغانستان کې د یو شمېر وژونکو بریدونو مسوولیت په غاړه اخیستی، چې په ترڅ کې یې لسګونه ملکیان وژل شوي او ټپیان شوي، چې ډېری یې شیعه ګان دي.

XS
SM
MD
LG