یو شمېر افغانان وايي، د طالبانو له بیا ځلي واکمنۍ وروسته، نه امنیت ښه شو او نه هم د خلکو په اقتصادي وضعیت بدلون راغی، بلکې سربېره پردې نجونې له زدهکړو هم محرومې شوې.
په افغانستان کې د انساني او اقتصادي ناورین په ګډون، په کابل، مزار شریف او کندز کې وروستیو چاودنو د خلکو اندېښنې لا پسې زیاتې کړي دي.
یو شمېر افغانان وايي، له دې وېرېږي چې امنیتي وضعیت له دې خراب او ان مدیریت یې د طالبانو له ولکې ووځي.
جمیله بهادري د کابل په لویدیځ کې د دشت برچي اوسېدونکې ده. هغه سیمه چېرته چې تېره اوونۍ د عبدالرحیم شهید ښوونځي او ممتاز ښوونیز مرکز کې چاودنې وشوې او زدهکوونکو ته په کې مرګژوبله واوښته.
په دې ډول چاودنو او بریدونو کې د جمیلې د کورنۍ څو غړي وژل شوي او یا هم ټپیان شوي. هغه د نورو بریدونو په اړه اندېښمنه ده.
نوموړې وايي:
"هزارهګان هېڅ ځای خوندي نهدي. نه جومات او نه هم ښوونځي او کورس کې. ان پر سړک د تلو پر مهال هم د امنیت احساس نه کوي."
پر افغانستان د طالبانو له بیا ځلې واکمنۍ له اتو میاشتو زیات وخت کېږي. په دومره وخت کې د تېر په پرتله چاودنې او ځانمرګي بریدونه د پام وړ کم شوي وو، خو وروستیو کې یې یو ځل بیا زور اخستی، سره له دې چې طالبان خپله یوازینۍ او لویه لاس ته راوړنه د خلکو لپاره د ټولیز امنیت راوستل ښيي.
خو کابل مېشتی عبدالله بیا وايي، وروستیو نا امنیو دا ادعا تر پوښتنې لاندې راوستې.
ښاغلی عبدالله وايي:
"امنیت ورځ تر بلې خرابېږي. نا امني د دې لامل کېږي چې زموږ ډېری هېوادال له وطنه غیرقانوني سفر وکړي. "
کندهار کې د بشري حقونو یوه ملاتړې شبنم نورزۍ بیا وايي، وروستۍ امنیتي پېښې ښيي چې هېڅ یو افغان خوندي نه دی.
نوموړې وايي:
"دا په اصل کې پر ټولو افغانانو بریدونه دي. دا د افغانستان امنیت ته صدمه رسوي. طالبان د امنیت په راوستو کې پاتې راغلي."
خو د طالبانو ویاند ذبیحالله مجاهد بیا د دې نیوکو په ځواب کې ازادي راډیو ته وویل:
"دا داسې قضایاوې دي چې طبیعا له وړاندې یې مخنیوی سخت دي، خو د تکرار مخه به یې نیسو او د عاملینو پر وړاندې به یې جدي چلند کوو. "
دا نیوکې داسې مهال مطرح کېږي چې د تېرې اوونۍ په وروستیو درې ورځو کې په کابل، مزار شریف او کندز کې لږ تر لږه ۶۴ تنه ووژل شول او ۱۶۴ نور ټپيان شول.
