د افغانستان د ازادو رسنیو د ملاتړه اداره 'نی' وایي، په دې هېواد کې د روانو ناامنیو په ترڅ کې په هرو دوو میاشتو کې درې خبریالان وژل کېږي چې دا وضعیت د نه زغم وړ بولي.
د دې ادارې مشر مجیب خلوتګر تېر ماښام (چهارشنبه-د غويي ۲۹مه) ازادي راډیو ته وویل چې دا وضعیت له یوه کال راهیسې دوام لري او باید مخه یې ونیول شي.
ښاغلي خلوتګر له افغان حکومته وغوښتل چې د خبریالانو خوندیتوب په خپلو کاري لومړیتوبونو کې راولي او د هغو د امنیت لپاره یوه ګډه امنیتي پالیسي له رسنیو سره شریکه کړي.
حکومت دې د خبریالانو خوندیتوب په خپلو کاري لومړیتوبونو کې راولي.
نوموړي وویل: "له دولته غواړو چې یوه امنیتي پالیسي جوړه کړي چې له مخې یې هره رسنۍ د هغه سره په همغږۍ خپل امنیتي تدابیر ونیسي او له دولت سره مخصوصاً د امنیتي ادارو سره په همغږي ډول کار وکړي."
سره له دې چې نړیوالې ټولنې، د بشري حقونو او خبریالانو د خوندیتوب سازمانونو په وار- وار په دې هېواد کې پر رسنیزو فعالیتونو او کار کوونکو بریدونه په کلکه غندلي او له وسله والو یې غوښتي چې د بې طرفه بنسټونو په توګه د خبریالانو په نښه کولو ډډه وکړي او هغوی پرېږدي چې خپل فعالیت په ډاډمنه فضا کې ترسره کړي.
د بشري حقونو او د خبریالانو د خوندیتوب نړیوالو سازمانونو پرون چهارشنبه (د غويي ۲۹مه) په یوې ګډې اعلامیې کې پر نړیوالو او هغو کسانو چې د افغانستان په سولې کې ښکېل دي غږ کړی چې د افغان خبریالانو پر وړاندې د تاوتریخوالي د کمولو لپاره اړین اقدامات وکړي.
خو طالبانو د روانې مې میاشتې په سر کې یو شمېر رسنیو ته خبرداری ورکړ او ویې ویل چې د حکومت له پلویتوبه دې ډډه وکړي.
د طالبانو ویاند ذبیح الله مجاهد خبرداری ورکړی و چې که د رسنیو له لوري د ده په وینا د ناسمو خبرونو خپرېدل ادامه پیدا کړي، مسوولیت به یې بیا د دوی د مسوولینو او کارکوونکو پر غاړه وي.
د افغانستان د ازادو رسنیو د ملاتړ ادارې 'نی' تېر ماښام له ازادي راډیو سره په خبرو کې له نړیوالې ټولنې وغوښتل چې د خبریالانو په وژنو تورن طالبان دې نړیوالو محاکمو ته معرفي شي او هم یې د افغانستان د سولې له بهیره د هغو طالبانو د لېرې کېدو اقدام وکړي چې په یو ډول د خبریالانو په وژنو کې ښکېل دي.
مجیب خلوتګر وویل: "له نړیوالو غواړو هغه کسان چې په سوله کې دخیل دي پر طالبانو فشار راوړي او هغه طالبان چې د خبریالانو په وژنو کې ښکېل دي نړیوالو محاکمو ته معرفي کړي او هغه طالبان چې یو ډول د افغانستان په سوله کې ښکېل دي او تورن دي د خبریالانو په وژنه کې، باید د سولي له نوملړ څخه لېرې شي."
تېرکال په افغانستان کې د ازادي راډیو د خبریال الیاس داعي په ګډون ۱۱ خبریالان او د رسنیو کار کوونکي ووژل شول. سږکال تراوسه څلورخبریالان د امنیتي پېښو پرمهال وژل شوي دي.
په دوه زره شلم کال کې افغانستان د خبریالانو لپاره دوهم مرګونی هېواد وبلل شو .
