وروسته له دې چې امنیت شورا د ایران پر ضد د وسلو بندیز د مودې له اوږدېدو سره مخالفت وکړ، امریکا وویل چې راتلونکې اوونۍ به یو وار بیا د ایران پر ضد د وسلو بندیز د اوږدېدو هڅه وکړي.
د ایران پر ضد دا بندیزونه د اکټوبر په میاشت کې نرمېږي.
د امریکا ولسمشر ډونالډ ټرمپ وايي، امریکا پر ایران د ټولو بندیزونو د بېرته لګولو میکانېزم فعالوي.
ټرمپ د شنبې په ورځ خبریالانو ته وویل، راتلونکې اوونۍ به ټول دا اقدام وویني.
ولسمشر ټرمپ دا څرګندونې یوه ورځ وروسته له دې وکړې چې د ملګروملتو د امنیت شورا ۱۵ غړي هېوادونه پر ایران د وسلو د بندیز د اوږدولو پر سر موافقې ته ونه رسېدل او د امریکا په شمول د دې شورا یوازې دوو غړیو مثبته رایه ورکړه.
ویل کېږي، دې اقدام د امنیت شورا غړي له سیاسي پلوه له سخت حالت سره مخامخ کړي دي.
د امریکا ولسمشر د یوې پوښتنې په ځواب کې چې ایا له ایران سره د کړکېچ د کمولو په خاطر د روسیې د ولسمشر ولادیمیر پوتین له لوري په وړاندیز شوې غونډه کې کوي، وویل، دا احتمال نه ویني.
په تهران کې د ایران ولسمشر حسن روحاني د شنبې په ورځ وویل، د امریکا متحد ایالتونه په خپله دسیسه کې ناکام شو.
امریکا د ۲۰۱۸ میلادي کال په مې میاشت کې له ایران سره له اټومي موافقې ووته او پر دغه هېواد یې بندیزونه بېرته ولګول.
د ملګرو ملتو د امنیت شورا د ۲۲۳۱ نمبر پرېکړه لیک پر اساس د ایران پر ضد بندیزونه په تدریجي ډول د اکټوبر له میاشتې نرمېږي.
دا بندیزونه په ۲۰۱۵ میلادي کال د ایران او نړیوالو قدرتونو ترمنځ له اتومي موافقې وروسته تصویب شول.
تر دې وړاندې ښاغلي پومپیو د جون ۳۰ د امنیت شورا په غونډه کې چې د ایران د وسلو بندیزونو پر اوږدولو د غور لپاره جوړه شوې وه، د ایران د بندیزونو پای ته رسېدا د ملګرو ملتونو له مسؤلیت سره خیانت وباله.
ده خبرداری ورکړ چې که پرېښودل شي چې د بندیز موده پای ته ورسېږي، په منځني ختیځ کې به بېثباتۍ رامنځته شي.
د ایران پر ضد د ملګرو ملتونو د امنیت شورا بندیز د سږ کال په اکټوبر کې پای ته رسېږي.
پومپیو همداراز وویل: "یوازې زما یا د امریکا د متحده ایالاتو مه اورئ د سیمې د هېوادونو خبره واورئ، د اسراییل، د خلیج، د منځني ختیځ د هغو هېوادونو چې د ایران له ډېر خطر سره مخامخ دي، خبره واورئ چې په یوه غږ یې کوي."
روسیې او چین چې په امنیت شورا کې د ویتو حق لري، ویلي و چې د ایران د بندیزونو د غځولو په اړه د امریکا له غوښتنې سره مخالف دي.
دوی ویلي چې امریکا له قانوني نظره د ملګرو ملتونو بندیزونه تمدیدولی نهشي.
