د امریکا د بهرنیو چارو وزارت وایي موازي حکومتونه به د افغانستان خلک زیانمن کړي.
امریکا یو ځل بیا ټينګار کوي چې افغان رهبران (ولسمشر محمد اشرف غني او عبدالله عبدالله چې ځانیې ولسمشر اعلان کړی) دې سره تفاهم ته ورسېږي.
د دغه هېواد د بهرنیو چارو وزارت د جنوبي اسیا برخې لپاره سرپرست مرستیالې الېس پر خپله ټویټرپانه لیکلي، موازي حکومتونه د افغانستان خلکو ته زیان رسوي، افغان رهبران باید ملي یووالی وساتي او د حاکمیت پر سر رامنځته شوی خنډ باید پای ته ورسېږي.
له دې سره د افغانستان د سولې لپاره د امریکا ځانګړي استازي زلمي خلیلزاد هم په خپله ټویټرپاڼه لیکلي، اوسیې وخت دی چې افغانان باید سره جوړجاړی وکړي، خپلمنځي اختلافات حل او هغه سیاسي کړکېچ چې د انتخاباتو د دوو تحلیفغونډو له امله رامنځته شوی لیرې کړای شي.
زلمي خلیلزاد لیلکي دغه سیاسي کړکېچ به د افغانانو امنیت ته زیان ورسوي او افغان سیاستوال دې د کرونا ویروس جدي ونیسي او د خلکو ژوند ته دې لومړیتوب ورکړي.
ښاغلي خلیلزاد اوس هم د ولسمشر غني او عبدالله ترمنځ د سیاسي تفاهم په هدف منځګړیتوب کوي.
له دې سره د عبدالله عبدالله د ټیم یو غړي دین محمد د پنجشنبې په ورځ «۱۳۹۸ کال د کب ۲۹» ازادي راډيو ته وویل د افغانستان لپاره د امریکا ځانګړی استازی زلمی خلیلزاد یو ځل بیا کابل ته راغلی او تېره ورځیې له عبدالله عبدالله سره د سیاسي تفاهم په اړه خبرې کړې دي.
ښاغلی دین محمد زیاتوي: "تر دې مخکې چې خبرې شوې وې دا وې چې د انتخاباتو له لارې نه، بلکې د سولې تر راتګه محمد اشرف غني دې په خپل ځای (ولسمشر) او عبدالله عبدالله دې هم په خپل موقف (اجرائیه رئیس) وي، د دې لپاره عبدالله عبدالله د خپل موقف د ضمانت لپاره له نړیوالو همکاري غوښتې چې امتیازات ترې وانهخیستل شي، په ټوله کې موږ په دې باور یو چې یو سیاسي تفاهم به وشي."
هڅه مو وکړه په دې اړه د افغانستان د جمهوري ریاست نظر هم ولرو، خو دوی تر دې دمه په دې اړه ازادي راډیو ته څه نهدي ویلي.
تر دې وړاندې هم په افغانستان کې د یو شمېر امریکایي استازو او چارواکو او مخکېني ولسمشر حامد کرزي او جهادي مشر عبدرب الرسول سیاف لهخوا د محمد اشرف غني او عبدالله عبالله ترمنځ د جوړجاړي ټینګار شوی دی.
د سیاسي چارو پوه داوود مایار بیا په دې باور دی چې که د دواړو لورو ترمنځ تفاهم وشي بریالی حکومت به وي.
ښاغلی مایار وايي: "هغه وخت به یو پیاوړی حکومت رامنځته شي چې د ټولنې ټولو نورو اقشارو ترڅنګ موافق او مخالف لوري په حکومت کې ونډه ولري که دا د حکومت په چوکاټ کې وي او که د اپوزېسیون، ظاهراً ولسمشر غني په دې قانع دی چې حاکمیت تأمین وي او ټول اړخونه په حکومت کې خپله ونډه ولري."
افغان ولسمشر محمد اشرف غني د افغانستان د انتخاباتو خپلواک کمېسیون لهخوا د نتایجو د پایلو په اعلان سره د ولسمشرۍ د انتخاباتو ګټونکی اعلان شوی، خو انتخاباتي سیالیې عبدالله عبدالله دا پایلې نهمني او وايي د پاکو رایو له مخې يې ټاکنې ګټلي او ځانیې د ټولشموله حکومت ولسمشر اعلان کړی چې د لوړې مراسمیې هم له ښاعلي غني سره په یو ورځ ارګ سره جوخت په سپېدار مانۍ کې ترسره کړل.
