پاکستان وايي، نن (یکشنبې) کابل کې بیرته قونسلي چارې پیلوي.
د پاکستان سفارت پر خپل ټویټر لیکلي چې د ډیسمبر له 29 مې نېټې څخه به په کابل کې دوی بشپړ قونسلي خدمتونه بېرته پیل شي.
په دې اړه سفارت نور جزئیات نه دي ورکړي.
خو تر دې مخکې افغان چارواکو اعلان کړی و چې په پېښور کې یې تړلې قونسلګري بېرته پرانیستې ده.
په عین حال کې پاکستاني رسنیو راپور ورکړی چې یو پنځه کسیز افغان پلاوی په اسلام اباد کې له پاکستاني چارواکو سره د افغان مارکیټ د مسلې او نورو موضوعاتو په اړه خبرې کړي او لا هم په دې هېواد کې دی.
د افغانستان د بهرنیو چارو وزارت یوې سرچینې چې نه یې غوښتل نوم یې یاد شي، پرون ماښام ازادي راډیو ته په پېښور کې د افغانستان د قونسلګرۍ پرانېسته تائید کړه او دا یې هم وویل چې د افغانستان یو پلاوی پاکستان ته تللی او لا هم هلته دی.
د کابل او اسلام اباد ترمنځ سفارتي کړکېچ وروسته له هغې زیات شو چې د پاکستان یوې محکمې پرېکړه وکړه چې په پېښور ښار کې افغان مارکیټ دې چې افغان دولت یې خپل ملکیت ګڼي دې د شوکت کشمیري په نوم یو کس ته چې پرې ادعا یې درلوده وسپارل شي.
د محکمې دې حکم او له افغان مارکیټ څخه د پاکستاني پولیسو له خوا د افغانستان د بیرغ د ښکته کولو په عکس العمل کې افغان حکومت د اکټوبر په 13 مه پېښور کې خپله قونسلګري وتړله.
ورپسې د نومبر په لومړیو کې پاکستان په کابل د خپلو کارکونکو ځورونه پلمه کړه او دغلته یې افغانانو ته د ویزې ورکړه او قونسلي چارې وځنډولې.
د افغانستان د بهرنیو چارو وزارت په دې اړه له تبصرې ډه ډه وکړه چې ایا په کابل کې د پاکستان سفارت له خوا د قونسلي چارو بېرته پیل د دواړو لورو ترمنځ د خبرو پایله ده.
خو په اسلام اباد کې ازاد خبریال طاهرخان د ازادي راډیو مشال څانګې ته د دواړو هېوادونو ددې متقابلو اقداماتو په اړه وویل: "زما نظر دادی چې کله ترینګلتیا ډېره زیاته شوې وه، نو بیا سفرونه شوي وو، د پاکستان د استخباراتو مشر او د بهرنیو چارو سکرتر کابل ته تللي وو او هلته یې خبرې کړې وې، له هغې وروسته بیا د افغانستان پلاوی اسلام اباد ته راغی، نو دواړو به په خبرو کې په دې سلا کړي وي چې د تګ راتګ لپاره سهولتونه برابر کړي او په مسالو خبرې وشي."
په پېښور کې د افغانستان او په کابل کې د پاکستان د قونسلګریو تړل کېدو، د دواړو هېوادونو خلکو په ځانګړې توګه افغانانو ته چې پاکستان ته د ګڼو اړتیاوو له کبله ډیر تګ راتګ کوي، زیاتې ستونزې جوړې کړې وې.
په ځانګړې توګه هغه افغان ناروغانو چې په افغانستان کې د روغتیايي اسانتیاوو د کموالي له کبله اړ دي پاکستان ته د درملنې لپاره سفر وکړي.
همدارنګه د سوداګرو او د دواړو هېوادونو ترمنځ د تجارت لپاره یې هم ستونزې سېوا کړې وې.
