افغان حکومت د جنیوا کنفرانس د بریالیتوب خبر ورکوي او وايي چې پهدې کنفرانس کې نړیوالې ټولنې یو وار بیا له افغانستان سره خپلې ژمنې تازه کړې.
افغان حکومت پهدې ناسته کې له دغه هېواد سره د اروپايي ټولنې او د اسیا نړیوال بانک اعلان شوې مرسته لاسته راوړنه بولي او وايي چې پهدغه ناسته کې ګډون کوونکو هېوادونو د افغان حکومت له کړنو خپل ملاتړ اعلان کړ.
اجرائیه ریاست وايي، د افغان حکومت د سولې په اړه له وړاندې شوې طرحې د نړیوالو ملاتړ د دغه کنفرانس بله لاسته راوړنه وه.
د اجرائیه ریاست مرستیال ویاند فریدون خوځون د پنجشنبې په ورځ پهدې اړه ازادي راډيو ته وویل:
"په جنیوا کنفرانس کې مهمه خبره دا وه چې نړیوالې ټولنې په افغانستان کې د خپل موجودیت او خپلو مرستو په اړه ډاډ ورکړ، بله مهمه مسئله د سولې د پروسې وه چې ټولو ګډون کوونکو هېوادونو په یوه خوله د افغان ولسمشر او اجرائیه رئیس له لوري د سولې له وړاندې شوې طرحې ملاتړ وکړ، یعنې په ټوله کې ویلی شو چې د دغه کنفرانس ټولو ګډون کوونکو هېوادونو په یوه خوله د افغان حکومت له هلو ځلو او په بېلابېلو برخو کې له رامنځته شوېو اصلاحاتو څخه هرکلی وکړو."
د جنیوا ناسته تېره ورځ ناوخته پای ته ورسېده.
پهدې کنفرانس کې د افغان ولسمشر غني، اجرائیه رئیس عبدالله عبدالله او لوړپوړو افغان چارواکو ترڅنګ د نېږدې ۶۰ هېوادونو او ۳۵ نړیوالو سازمانونو استازو برخه اخېستې وه.
د جنیوا ناسته چې دوه ورځې يې دوام وکړ، د افغانستان پر سولې، اقتصادي ځان بساینې او پهدې هېواد کې پر بېلابېلو برخو کې د شوېو پرمختګونو په اړه پهکې بحثونه وشول.
وړاندې ویل کېدل چې پهدغه کنفرانس کې به افغان حکومت د بروکسل په کنفرانس کې د شوېو ژمنو په اړه هم نړیوالې ټولنې ته حساب ورکړي.
د اجرائیه ریاست مرستیال ویاند فریدون خوځون وايي، پهدې برخه کې د افغان حکومت حساب نړیوالو ته د قناعت وړ وو، خو د لا عملي کولو سپارښتنې يې وکړې.
د جنیوا په کنفرانس کې اروپايي ټولنې په افغانستان کې د ۴۷۴ میلیونه یورو په ارزښت د مرستو اعلان وکړ.
راپورونه وايي چې دغه مرستې به د دولت جوړولو، د عامه سکټور د اصلاحاتو، روغتیا، عدالت، انتخاباتو او دغه شان د مهاجرت او بېځایه کېدو په برخو کې مصرف شي.
تېره ورځ چې د یاد کنفرانس وروستۍ ورځ وه افغان ولسمشر محمد اشرف غني د کنفرانس له ګډونوالو سره د افغان حکومت د سولې طرحه هم وړاندې کړه.
که څه هم د اجرائیه ریاست مرستیال ویاند فریدون خوځون وايي، له دغه طرحې نړیوالو ملاتړ وکړ، خو د افغانستان د ولسي جرګې د نړیوالو اړیکو د کمېسیون یو شمېر غړي وايي چې پهدې برخه کې باید د افغانستان په جګړه کې په ښکېلو هېوادونو فشارونه زیات شي.
د دغه کمېسیون غړي نادر خان کټوازي د پنجشنبې په ورځ ازادي راډیو سره په خبرو کې د افغانستان لپاره د جنیوا کنفرانس یو بریالی کنفرانس وباله.
نوموړي زیاته کړه:
"د سولې په اړه ټولو په یوه غږ د افغان حکومت د پرېکړو ملاتړ وکړ او له ټولو ښکېلو خواوو او هېوادونو يې وغوښتل چې د افغان سولې په مسئله کې همکاري او مرسته وکړي، نو که لنډه يې درته ووایم زه د دغه ناستې نتایج د افغانستان لپاره ګټور بولم."
خو د نړیوالو چارو یو شمېر افغان کارپوهان بیا وايي، کومې هيلې چې د جنیوا له کنفراسه موجودې وې ترلاسه نه شوې.
له ډلې یې انتظار خادم ازادي راډيو ته وویل، که څه هم په زماني لحاظ د جنیوا کنفرانس د افغانستان لپاره ښورا مهم بلل کېده، خو په خبره یې، افغان حکومت نړیوالو ته د بروکسل په ناسته کې د شوېو ژمنو حساب ورنهکړای شو.
راپور: اکرام الله اکرام
