د افغانستان د انتخاباتو خپلواک کمېسیون اندېښنه ښودلې چې که د نوملیکنې بهیر په اوسني سرعت سره دوام وکړي، دا احتمال شته چې له درې میلیونو لږ کسان د ولسي جرګې او ولسوالیو د شوراګانو په انتخاباتو کې ګډون وکړي.
د انتخاباتو مسؤل چارواکي هیله لري چې د جون د میاشتې تر نیمایي پورې به د رأی ورکولو په شرایطو برابر شاوخوا ۱۴ میلیونه افغانان د ټول هېواد په کچه د رأی ورکولو په څه باندې ۷۰۰۰ مرکزونو کې د رأی ورکولو لپاره خپل نومونه ثبت کړي.
د انتخاباتو د خپلواک کمېسیون ویاند شفیع جلالي فرانسپرېس خبري آژانس ته ویلي چې کمېسیون د رأی ورکولو په پروسه کې د لږو خلکو د ګډون له کبله اندېښنه لري او ځکه یې په یو شمېر ولایتونو کې د هوا له لارې د تبلیغاتي پاڼو د خپراوي په ګډون د انتخاباتو په اړه د عامه پوهاوي د لوړولو هڅې پیل کړي دي.
څو ورځې مخکې چارواکو د جوماتونو له امامانو وغوښتل چې د جمعې د لمانځه په خطبو کې دې خلک د رأی ورکولو لپاره نوملیکنې ته وهڅوي.
د انتخاباتو خپلواک کمېسیون وايي، د شنبې تر ورځې پورې شاوخوا شپږ نیم لکه کسانو د رأی ورکولو لپاره خپل نومونه ثبت کړي.
د نوملیکنې اکثر مرکزونه په ښوونځیو او جوماتونو کې جوړ شوي دي او دې مسئلې خلک خورا زیات اندېښمن کړي.
د تېرې یکشنبې په ورځ د کابل د دشتبرچي سیمې په یوه ښوونځي کې چې د رأی ورکولو مرکز پهکې و، په یوه انتحاري حمله کې ۶۰ کسان مړه او نېژدې ۱۳۰نور ټپیان شول.
پرون یکشنبه غرمه مهال د جلالاباد ښار په څلورمه ناحیه کې یوه جومات ته نېژدې په زرنج موټرسایکل کې د ځای پرځای شوي بم چاودنې شپږ کسان ټپیان کړل.
لهدې پېښې وروسته جمهوري ریاست په یوه خبرپاڼه کې دا د هېواد د دښمنانو کار وباله، خو ټينګار یې وکړ چې دا به په انتخاباتو کې د خلکو پر حضور او ګډون هېڅ راز منفي اغېز ونهلري، بلکې برعکس افغانان به په لېوالتیا سره د نوملیکنې مرکزونو ته ځي.
د ولسمشر مرستیال ویاند دواخان مینهپال ازادي راډیو ته وویل چې د جلالاباد له چاودنې وروسته ولسمشر امنیتي چارواکو ته امر کړی چې د رأی ورکوونکو د نوملیکنې د مرکزونو لپاره اضافي امنیتي تدابیر ونیسي.
ښاغلي مینهپال د نوملیکنې پر بهیر د بې امنیتۍ د ناوړه اغېزو له کبله د اندېښنو په اړه وویل چې حکومت د انتخاباتو د امنیت مسؤل دی.
مینهپال زیاته کړه:
"د حکومت او ټاکنو د کمېسیون ترمنځ دندې ویشل شوي دي. تخنیکې پروسه د ټاکنو د کمېسیون او امنیت د حکومت دنده ده. افغان حکومت امنیتي او دفاعي ځواکونو ته دنده سپارلې چې د هېواد په کچه د نوملیکنې د مرکزونو امنیت وساتي."
د افغانستان د ولسي جرګې او ولسوالیو د شوراګانو انتخابات د تلې یا میزان د میاشتې په ۲۸مه نېټه په پام کې دي.
پهدې انتخاباتو کې د نوملیکنې بهیر د وري په ۲۵مه پهداسې حال کې پیل شو چې وسلهوالو طالبانو د جګړې په نوي فصل کې د خپلو حملو د زیاتولو ګواښ کړی دی.
