- ډېلي مېل
بریتانيايي ورځپاڼې ډېليمېل د لوګر ولايت یوه افغان چارواکي وژل کېدو ته کتلي دي.
د ورځپاڼې په وينا، وروسته لهدې چې طالبانو د خپلو پسرلنيو حملو زياتولو اعلان وکړ، د لوګر مرستيال والي قمرالدين شکېب ووژل شو.
په همدې حال کې د کندز ولايت چارواکو ويلي چې طالبانو پهدې ولايت کې ۱۵ تنه امنیتي ځواکونه وژلي دي.
ډېليمېل لیکلي چې طالبان تر ډېر فشار لاندې دي چې ولسمشر غني ورته د سولې وړانديز وکړ.
خو د چهارشنبې په ورځ دې ډلې په يوه اعلاميه کې د سولې په اړه هېڅ نهدي ويلي.
نړيوالو او افغان کارپوهانو ډېليمېل ورځپاڼې ته ويلي، د خندق په نوم د طالبانو د عملیاتو اعلان په ظاهره د ولسمشر غني د وړانديز د ردولو په معنی دی. دا کارپوهان وړاندوينه کوي چې د سږکال جنګي فصل ښايي تر پخوا شديد وي.
- ډيفینس پوسټ
امریکا چاپ ډيفینس پوسټ خپرونې هم د طالبانو د پسرلنیو عملیاتو اعلان ته کتلي دي.
د خپرونې په وينا يوازې په يوه ورځ کې طالبانو پر افغان ځواکونو د ګڼو حملو مسؤليت ومانه.
ډيفينس پوسټ لیکلي چې په کندز او فاریاب کې ۲۰ افغان سرتېري د خندق عملیاتو له اعلان سره سم وژل شوي دي.
دا خپرونه د لوګر د مرستيال والي قمرالدين شکېب وژل کېدو په اړه لیکي:
دی په محمداغه ولسوالۍ کې په يوه کمين کې هدف ګرځېدلی.
د ډيفينس پوسټ په وينا، طالبانو د خپلو عملیاتو له پيل سره د افغانستان د ولسمشر د سولې وړانديز رد کړی، ځکه په فبرورۍ مياشت کې دې ډلې له امريکا سره د مستقيمو خبرو غوښتنه کړې وه.
- واشنګټن پوسټ
واشنګټن پوسټ ورځپاڼې د یوې داسې افغانې کورنۍ ژوند ته کتلي چې په امریکا کې ژوند کوي.
د ورځپاڼې په وينا، اميري کورنۍ اصلاً د افغانستان هزارهګان دي چې په ۲۰۰۴میلادي کال کې يې په کوټه ښار کې ژوند کاوه.
دوی له دوو کلونو راهيسې په شمالي ډيکوټا کې اوسي او د بيس مارک ښار د اوسېدونکو لپاره پخلی کوي چې ځان ته روزي وګټي.
محمد اميري چې له خپلې مور او دريېو خويندو سره پهدې سیمه کې اوسي، واشنګټن پوسټ ته ويلي: کله چې شمالي ډيکوټا ته ورسېدل، هېڅ څوک یې نه پېژندل او هېڅ چا ورسره تګ راتګ نه کاوه.
خو اوس د ۲۲ کلن محمد اميري په وينا د بیس مارک ښار ټولنه له دوی سره مرسته کوي،دی خپل کار او عايد له همدغو خلکو ګڼي.
د واشنګټن پوسټ په وينا، ټاکل شوې ده اميري کورنۍ د مې مياشتې په څلورمه، د بيس مارک ښار اوسېدونکو ته د قابلي او بېلابېلو قورمو په ګډون افغان خواړه پاخه کړي او د هغوی د همکاريو درناوی وکړي.