د ازبکستان په پایتخت تاشکند کې د افغانستان په اړه د نړیوال کنفرانس ګډونوالو پر طالبانو غږ وکړ چې د افغان حکومت د سولې پېشنهاد ومني او له نړیوال ترورېزم سره خپلې اړیکې پرې کړي.
د دې کنفرانس په پرېکړهلیک کې طالبانو ته د افغان حکومت د سولې له پېشنهاد څخه بشپړ ملاتړ شوی دی او پهدې ټینګار شوی چې سیاسي حل د افغانستان د روانې جګړې د پای ته رسېدو تر ټولو غوره لار ده.
د جمهوري ریاست د ویاند دفتر سرپرست شاه حسین مرتضوي د تاشکند د کنفرانس د پرېکړو په اړه تېره شپه ازادي راډیو ته وویل:
"د تاشکند د غونډې په وروستي بیان کې د افغان حکومت په مشرۍ د سولې په خبرو اترو ټینګار شوی دی. دغهراز له افغان حکومته ملاتړ څرګند شوی دی او دا هم ویل شوي دي چې هر ډول پوځي مرستې چې کېږي هغه باید د افغان حکومت له لارې وي. طالبانو ته هم ویل شوي چې د سولې لار خپله کړي، ځکه چې د جګړې له لارې هېڅ نهشي ترلاسه کېدای."
د تاشکند کنفرانس دغهراز ویلي دي چې له ترورېزم او نشهيي موادو سره ګډه مبارزه او سیمهییزه همکاري به نهیوازې په افغانستان، بلکه په ټوله سیمه کې د سولې او ثبات زمینه برابره کړي.
د کنفرانس په اعلامیه کې د افغانستان په ځمکنۍ بشپړتیا، د دې هېواد په چارو کې د نورو په نهمداخلې، اساسي قانون ته په درناوي، ملي یووالي او په سیاسي، امنیتي، اقتصادي چارو کې د ښځو په پراخې ونډې هم ټینګار شوی دی.
په تاشکند غونډه کې د افغان حکومت په مشرۍ د سولې په خبرو اترو ټینګار شوی.
د کابل پوهنتون د سیاسي علومو او حقوقو د پوهنځي استاد نصرالله ستانکزی وايي، افغان حکومت وتوانېد چې پهدې کنفرانس کې خپل اهداف ترلاسه کړي.
نوموړی وايي:
"زه فکر کوم چې دې کنفرانس د کابل پروسې اهداف او طرحې تأیید کړې او د هغې په عملي کېدو يې تینګار وکړ. افغان دولت پهدې ډول وتوانېد چې هغو اهدافو ته ورسېږي چې د کابل پروسې په غونډه کې مطرح کړي وو."
ښاغلي ستانکزي وویل، دا کنفرانس پر طالبانو سیاسي فشار راوستی شي، خو تر کومې پورې چې د افغانستان په اړه د سیمې د هېوادونو دریځونه نږدې نهشي دا ډول غونډې د پام وړ پایلې نهشي لرلی.
کابل پروسه: طالبانو ته د سولې د پلان مهم وړاندیزونه!
افغان ولسمشر محمد اشرف غني په تېره فبرورۍ میاشت کې د کابل پروسې په دوهمه غونډه کې طالبانو ته د سولې پېشنهاد وکړ چې متحده ایالاتو، ملګرو ملتونو او ناټو تړون ترې ملاتړ څرګند کړ.
وسلهوالو طالبانو تر اوسه په رسمي ډول د افغان حکومت د سولې پېشنهاد ته ځواب نهدی ویلی.
