د پکتيا اوسېدونکي، مدني فعالان، قومي مخور او د ولايتي شورا وکيلان اندېښنه څرګندوي، که په دغه ولايت کې د تېرو لويو پېښو او بريدونو د تحقيقاتو پايلې معلومې نهشي ښايي په دې ولايت کې تر دې ستر امنيتي مشکلات پېښ شي.
د پکتيا ولايتي شورا وکيل تاج محمد منګل وايي، دوی په پرلهپسې ډول تمه لرله چې مرکزي اداره به د هغو پېښو د څېړنو پايلې اعلان کړي چې دوی او ولسونو يې توقع لرله.
دی وايي:
"يو د جانيخېلو ولسوالۍ د سقوط مسئله وه چې موږ يې په وخت د څېړنو د اعلان غوښتنه کړې وه. هغه څه چې لازمه ونهشوه او ولسوالۍ يې په پايله کې څوارې نوره هم سقوط شوه او بله لويه مسئله دا وه چې پر امنيه قوماندانۍ بريد و چې د څېړنو نتيجهيې اعلان نهشوه او بدبختانه له هغه وروسته ټکان ورکوونکې بيا پر امنيه قوماندانۍ بريد و، موږ يې د څېړنو پايلو ته منتظر يو څنګهيې چې ملي ګټې ايجابوي او د پکتيا ولسونهيې غواړي خصوصاً د قربانيانو کورنۍ چې کومه غوښتنه لري بايد هغسې اعلان شي."
د پکتیا په ګردېز کې د خونړۍ حملې انځورونه
دی وايي، تر دې مهاله مرکزي حکومت په پکتيا کې د شويو ټولو لويو پېښو د څېړنو پايلې نهدي اعلان کړي چې پر اساسيې وخت پر وخت ګڼې امنيتي ستونزې پيدا شوې دي.
منګل زياتوي که مرکزي حکومت په تېرو پېښو کې د شويو څېړنو نتايج اعلان او ځيني مربوط هغه مسؤلينيې د غفلت په تور عدلي او قضايي ارګانونو ته معرفي کړي وی، ښايي وروستۍ پېښې نهوی ترسره شوې.
يو ځل بيا تاج محمد منګل وايي:
"هر هغه چا چې په دغې پېښه کې د امنيه قوماندانۍ په داخل کې غفلت کړی وي، لطفاً دې عدلي او قضايي ارګانونو ته معرفي او دندې دې وځنډول شي تر څو په راتلونکي کې د داسې ډول لويو پېښو مخنيوی شوی وي. که مخکېنۍ څېړنې اعلان او عاملينيې نيول شوي وی، ښايي دا پېښې نهوی تکرار شوې."
يوازې د ولايتي شورا يو يا دوه وکيلان دا نظر نهلري د دې شورا ډېره برخه وکيلان په امنيه قوماندانۍ د شوي بريد د څېړنو په اړه د حکومت اعلان ته په تمه دي او تر څنګيې د جانيخېلو د سقوط او له هغه مخکې پر امنيه قوماندانۍ او زون قوماندانۍ د بريدونو د څېړنو د اعلان غوښتنه هم کوي.
د پکتيا پر امنيه قوماندانۍ د بريد د څېړنو په اړه د کورنيو چارو وزارت ارشد امنيتي معين مراد علي مراد وايي، د دوی تحقيقات روان دي او مخکې له وخت څخهيې په اړه څه نهشي ويلی.
دی وايي:
"تحقيقات تر اوسه پورې ادامه لري، زه نهشم کولای چې مخکې له مخکې څه ووايم، انشاءالله نتيجهيې په لاس راځي او د خلکو، حکومت او د امنيتي ځواکونو قناعت به حاصل کړي."
د ده په خبره د دوی د څېړنو نتيجې به ژر ولسونو، ولايتي شورا او ولايتي ادارې ته په واک کې ورکړل شي او په پېښه کې د پړو کسانو په اړه به اقدامات وکړي.
د يادونې وړ ده چې د روان ۲۰۱۷ ميلادي کال د اکټوبر مياشتې په ۱۷مه نېټه د پکتيا په مرکز ګردېز کې پر امنيه قوماندانۍ وسلهوالو طالبانو ډلهیيز ځانمرګي بريدونه وکړل چې په پايله کې يې د امنيه قوماندان مل پاسوال توريالي عبدياني په ګډون ۲۰۶ تنو نظامي او ملکي کسانو ته مرګ ژوبله او ګڼ مالي زيانونه واړول.
راپور: داود تپان
