په روانه اوونۍ کې د هېواد د ملي، دفاعي ځواکونو له درنو تلفاتو وروسته افغان حکومت وايي چې وسلهوالو مخالفینو په هوايي حملو کې د درنو تلفاتو له لیدو وروسته خپل تکتیک بدل کړی او د جبههيي جګړو پرځای یې انتحاري حملو ته مخه کړې ده.
وسلهوالو طالبانو په روانه اوونۍ کې د کندهار په میوند ولسوالۍ، د پکتیا په مرکز ګردېز او د غزني په اندړو ولسوالۍ کې خونړۍ حملې وکړې.
د راپورونو له مخې په دې حملو کې چې مسؤلیت یې وسلهوالو طالبانو ومانه له ۱۳۰ زیات سرتېري وژل شوي او شاوخوا ۲۵۰ نور ټپیان دي.
افغان حکومت وايي طالبانو د جبههيي جګړو پرځای انتحاري حملو ته مخه کړې.
دا حملې په داسې حال کې وشوې چې د عمان په پلازمېنه مسقط کې د افغانستان د سولې پر لارو چارو د بحث لپاره څلور اړخېزه غونډه روانه وه.
ایا د دې پراخو ناڅاپي حملو مقصد د مسقط د بهیر شنډول و؟
د افغان حکومت د اجرائیه ریاست مرستیال ویاند جاوید فیصل له ازادي راډیو سره په خبرو کې دا احتمال رد کړ. ښاغلي فیصل وویل، د افغان هوايي ځواک په حملو کې د ګڼ شمېر وسلهوالو طالبانو له وژلو وروسته دې ډلې خپل تکتیک بدل کړی او د جبهه یي جنګ پرځای یې انتحاري حملو ته مخه کړې.
ښاغلي فیصل زیاته کړه:
"طالبانو د افغانستان د خلکو دښمنان دي او له دې مخکې یې هم د افغانانو پر ضد تروریستي حملې کړي دي مګر د هغوی په جنګي تکتیک او ستراتیژۍ کې تغیر راغلی دی- په دې معنی چې دوی نور، نو مخامخ له افغان ځواکونو سره په جګړه کې زیات تلفات درلودل او د افغان هوايي ځواک په عملیاتو کې یې د دوی تلفات زیات وو. نو ځکه یې اوس ډېر تمرکز لکه چې لیدل کېږي پر ځانمرګو بریدونو او موټربم بریدونو باندې دی."
د ملي شورا ځینو وکیلانو او یو شمېر څارونکو د مسقط له خبرو سره په یو وخت کې د طالبانو له حملو وروسته پر افغان حکومت سخت انتقادونه وکړل او ویې ویل چې د سولې هڅې باید له یوه پیاوړي دریځ څخه وشي.
دوی همدا راز له وسلهوالو مخالفینو سره د سولې د خبرو د سمدستي ځنډولو غوښتنه وکړه.
خو د اجرائیه ریاست مرستیال ویاند ښاغلی فیصل وايي چې حکومت به د سولې هڅو ته د پخوا په شان دوام ورکړي.
ښاغلي فیصل وویل، د سولې د هڅو یوه برخه د جګړې په وسیله د هغو وسلهوالو ځپل دي چې د سولې پر خبرو باور نهلري.