په افغانستان کې د امریکایي ځواکونو لوړپوړي قوماندان اعلان کړی چې متحده ایالات له افغانستان سره دی او ورسره پاتې به شي.
که څه هم د افغانستان لپاره د امریکا د نوې ستراتېژۍ اعلان ته ډېر وخت نهدی پاتې، خو د اسوشیټېډ پرس خبري اژانس د راپور له مخې په افغانستان کې د امریکا د لوړپوړي قوماندان جنرال جان نېکلسن له څرګندونو چې وایي، هېواد یې له افغانستان سره دی او ورسره پاتې به شي، داسې ښکاري چې ښایي د امریکا متحده ایالات به د افغانستان په جګړه کې ښکېل پاتې شي څو دا ډاډمنه کړي چې امریکا د هغو ترورېستانو له ګواښه په امان کې شي چې په افغانستان کې یې ځاله کړې ده.
سپینۍ ماڼۍ اعلان کړی چې د امریکا متحده ایالاتو ولسمشر ډونالد ټرمپ به د دوشنبې په ماښام د امریکا خلکو ته د افغانستان او جنوبي آسیا په اړه خپله نوې ستراتېژي اعلان کړي.
جنرال جان نېکلسن د یکشنبې په ورځ په هغو مراسمو کې چې په ترڅ کې یې د افغانستان د ځانګړو عملیاتو فرقه په قول اردو بدله شوه وویل، د افغانستان د ځانګړو عملیاتي ځواکونو ډېرېدل د جګړې د ګټلو لپاره مهم دی.
هغه زیاته کړه:
"زه تاسو ته ډاډ درکوم چې موږ په دې جګړه کې ستاسو سره یو او ستاسو سره به پاتې شو."
جنرال نېکلسن ویلي چې په افغانستان کې ماته به په امریکا کې امنیت کم او په ټوله نړۍ کې به تُندلاري پیاوړې کړي.
له همدې کبله د ده په خبره د امریکا متحده ایالات مرسته کوي چې د افغان کومانډو ځواکونو شمېر دوه برابره شي.
نوموړي زیاته کړه چې دغه مراسم د طالبانو د ماتې پیل ښیي.
په همدې حال کې په کابل کې یوه لوړپوړي امریکایي پوځي افسر ویلي چې په افغانستان کې د امریکایي سرتېرو شمېر ډېرول به پوځ ته اجازه ورکړي چې ژر تر ژره نور سلاکاران او هوایي ملاتړ د دوو هممهاله مأموریتونو لپاره ولېږي.
دغه امریکایي افسر چې د نوم نهښودلو په شرط خبرې کوي د نورو جزئیاتو له ورکولو ډډه وکړه.
په افغانستان کې د امریکا او ناټو د ځانګړو عملیاتي ځواکونو مشر جنرال جېمز لیندر «Gen. James Linder» ویلي، په هغو نېږدې څلور زره نورو سرتېرو کې چې پنټاګونیې افغانستان ته د استولو لپاره وړاندیز کړی، ۴۶۰ تنه روزونکي هم شامل دي چې د ځانګړو عملیاتي ځواکونو د شمېر په ډېرولو کې مرسته کوي.
د امریکا دفاع وزیر جېمز مټېس د یکشنبې په ورځ اردن ته پر لارې خبریالانو ته ویلي چې دی د افغانستان د جګړې په اړه د امریکا د نوې ستراتېژۍ څخه راضي دی، خو د ولسمشر ټرمپ لهخوا د ستراتېژۍ تر اعلان دمخهیې د نورو جزئیاتو ورکولو څخه ډډه وکړه.
مټېس ویلي ولسمشر ټرمپ ته د دې ستراتېژۍ په اړه ډېر انتخابونه وو، خو د هغو نومونهیې یاد نهکړل.
په همدې وخت کې انګېرنې دا دي چې یو انتخاب ښایي په ټولهییزه توګه له افغانستانه د امریکایي ځواکونو ایستل بل د امریکا د پوځ د دندې یوه برخه خصوصي امنیتي قراردادیانو ته ورکول او درېیم هم په افغانستان کې د امریکایي ځواکونو ډېرول وي.
