د افغانستان دفاع وزارت وايي، په افغان جګړه کې د امریکا د متحدو ایالتونو د کامیابۍ لپاره پر پاکستان فشار راوړل مهم دي.
د افغانستان د دفاع وزارت ویاند دولت وزیري د چهارشنبې په ورځ له ازادي راډیو سره په خبرو کې وویل چې په تېرو کلونو کې له ترهګرۍ څخه د نهملاتړ په برخه کې پر پاکستان لازم فشار نهدی راوړل شوی.
نوموړی وايي، پکار ده چې د امریکا متحده ایالتونه د افغانستان په اړه پر خپلې نوې ستراتیژۍ کې دې مسئلې ته پام وکړي او پر پاکستان لازم فشارونه راوړي.
ښاغلي وزیري زیاته کړه:
"هغه څه چې ډېر ضروري و، هغه پر استخباراتي کړیو او یا پر پاکستان فشارونه وو، څو د ترهګرو له ملاتړه لاس واخلي، خو لازم فشار پرې را نه وړل شو او جګړې دوام وکړ، امریکا باید د نوې ستراتیزۍ په جوړلو کې دې مسئلې ته پام وکړي او پر پاکستان لازم فشارونه راوړي، څو هغوی د ترورېزم له ملاتړه لاس واخلي."
دا څرګندونې په داسې کې مطرح کېږي چې د امریکا دفاع وزیر د سې شنبې په ورځ د خپل هېواد سنا مجلس ته ویلي چې په افغانستان کې جګړه د کامیابۍ په حال کې نه ده.
جېمز متېس همدا راز ویلي چې طالبانو ښه کال شاته پرېښود او په خبره یې چې دښمن د پراختیا په حال کې دی او په دې برخه کې عاجلو اقداماتو ته اړتیا ده.
نوموړي همدا راز د افغانستان په اړه د امریکا پر اوسنۍ ستراتیژۍ نیوکې کړي او دا یې ویلي چې د امریکا نوې ستراتیژي به تر راتلونکې یوې میاشتې اعلان شي.
بلخوا د مشرانو جرګې د اداري پلاوي یو شمېر غړي وايي، امریکا باید د افغانستان په اړه نوې ستراتیژي داسې چمتو کړي چې د ترهګرو ځالي په هر ځای کې چې وي، لهمنځه یوسي.
د دغې جرګې منشي نجیبي حسیني ازادي راډیو ته وویل چې د امریکا د ستراتیژۍ څرنګوالی باید د افغانانو په ګټه تمام شي.
ښاغلي حسیني وویل:
"دغه ستراتیژي باید داسې چمتو شي چې د پاکستان په ګډون په هر ځای کې چې د ترورېزم او ترهګرو د روزنې مرکزونه موجود وي، د امریکا متحده ایالتونه او ملاتړي یې باید پرې هوايي حملې وکړي او لهمنځه یې یوسې او دا یوه حللاره کیدای شي."
دا په داسې حال کې ده چې شااوخوا دوه میاشتې وړاندې د افغانستان د ستراتیژیکو مطالعاتو مرکز د افغان حکومت لپاره د «پر ګټونکې ستراتیژۍ د بایلونکې ستراتیژۍ د بدلون» پېشنهادي مقاله خپره کړه.
په دغه مقاله کې راغلي چې بریا د دښمن د لهمنځه وړلو په معنا نه، بلکې د سیاسي او ستراتیژیکې غلبې او پر د ښمنانو د خپلو غوښتونو د ملنو په معنا هم کېدای شي.
راپور: محمد حدیث پردېس
