د لاسرسي لېنکونه

مسیر: د امریکا په نوې تګلاره کې پر پاکستان فشار شته؟


د کابل چاپ نننیو ورځپاڼو د افغانستان په اړه د امریکا د نوې ستراتېژۍ او د هېواد روانو ترینګلو امنیتي حالاتو په اړه لیکنې او مقالې خپرې کړي دي.

مسیر:

خپلواکې ورځپاڼې په خپله سرمقاله کې د امریکا په نوې تګلاره کې پر پاکستان فشار شته؟ پوښتنه مطرح کړې ده او لیکلي دي؛ ویل کېدل چې تېره میاشت به د افغانستان په اړه د ټرمپ تګلاره اعلانېږي خو لا هم سپینه ماڼۍ په دې اړه څه نه وايي.

د سرمقالې لیکوال لیکي؛ د افغانستان د خلکو غوښتنه دا ده چې په افغانستان کې د جګړې پرځای پر سوله تمرکز وشي خو دا چاره د ټرمپ په نوې تګلاره کې نه ښکاري.

په سرمقاله کې د امریکا د دفاع وزیر جېمز متېس له قوله راغلي چې د امریکا نوې ستراتیژي به یوازې په جګړه ځپلي افغانستان تمرکز نه کوي بلکې سیمه ییزه به وي.

د سرمقاله لیکونکي په باور د ښاغلي متېس له خبرو داسې ښکاري چې نوموړی په پاکستان کې د وسله والو خوندي ځایونو ته اشاره کوي.

ملي ارمان:

خپلواکې ورځپاڼې پاکستان باید د ترورېستانو د ملاتړ کوونکي هېواد په توګه لا ډېر رسوا شي تر عنوان لاندې په خپلې سرمقاله کې کښلي چې پاکستان تر بل هر وخت د نړیوالو تر سخت فشار لاندې دی نو ځکه هڅه کوي چې د څو اړخېزو ناستو په ترسره کولو ځان له دې فشاره راوباسي.

سرمقاله وړاندې لیکي؛ که څه هم افغان حکومت دا ویلي چې له ترهګرو څخه د پاکستان د ملاتړ په اړه يې اسناد او شواهد ناټو او امریکايي سناتورانو ته وړاندې کړي خو افغان حکومت ته پکار ده چې د پاکستان د منزوي کېدو په برخه کې له رامنځ ته شوي فرصت څخه لا زیاته ګټه واخلي.

ویسا:

ورځپاڼې په خپله سرمقاله کې په هېواد کې وروستیو ناامنیو ته اشاره کړې او لیکلي دي چې ناامني اوس په ولایتونو کې نه ده بلکې د کابل وروستۍ غمیزې دا وښودله چې ټول هېواد ناامنه دی او د ارګ او څو پخو دیوالونو ترشاه د اوسېدونکو پرته چې د امن لپاره يې ښارونه په زندانونو بدل کړي دي نور ولسي وګړي هېڅ د امن احساس نه لري.

هېواد:

هېواد دولتي ورځپاڼې بیا افغان وګړي په پراخه کچه د خپل نظام تر څنګ ولاړ دي تر عنوان لاندې سرمقاله کې لیکي چې ولسمشر غني د کابل د وروستیو غمیزو وروسته د ملت له بېلابېلو قشرونو او استازو سره لیدنو ته زور ورکړی دی.

د سرمقاله لیکونکې په خبره په دغه لیدنو کې د بېلابېلو سیمو او قومونو استازو د نظام تر څنګ د ودرېدو هوډ تازه کړی او دا ډاډ يې ورکړی چې هېچا ته به اجازه ورنه کړي چې نظام له ننګونو سره مخ کړي او خنډونه رامنځ ته کړي.

XS
SM
MD
LG