د لاسرسۍ وړ لېنکونه

تازه خبر
جمعه ۱۰ وری ۱۴۰۳ کابل ۱۰:۰۲

د حکومت او حزب اسلامي ترمنځ د ګډ اجرائیوي کمېسیون مسؤلیتونه


په کابل کې د حزب اسلامي استازی امین کریم وايي، د حکومت او حزب اسلامي ترمنځ د سولې توافق د عملي کېدو لپاره مشترک اجرائیوي کمېسیون به په راتلونکو دوه درې ورځو کې کار پیل کړي.

د نوموړي په وینا حزب اسلامي د دې کمېسیون لپاره خپل درې غړي ټاکلي او دولت به هم په یوه دوه ورځو کې دې کمېسیون ته درې دایمي استازي معرفي کړي.

امین کریم وايي، د دوی او حکومت ګډ اجرائیوي کمېسیون د سولې د لاسلیک شوي موافقې د یو شمېر مادو د عملي کولو لپاره شریک کار کوي او د دې کمېسیون د کار لپاره یې د یوې کړنلارې ابتدايي مسوده هم برابره کړې ده.

د حزب اسلامي د بندیانو خوشې کول، پر دې ډلې د نړیوالو بندیزونو د لیرې کولو لپاره کار او لږ تر لږه د شل زرو په شا او خوا کې د کډوالو د راستنېدو لپاره شرایط برابرول د افغان حکومت او حزب اسلامي ترمنځ د ګډ اجرائیوي کمېسیون د کار مهمې برخې دي.

د ښاغلي کریم په وینا په دې اړه په ابتدايي پریکړې کې ویل شوي چې له هر لوري څخه به درې کسان ددې کمېسیون دایمي غړي اوسي.

همدارنګه د نوموړي په وینا دا شریک اجرائیوي کمېسیون به د موضوع تخصص ته په پام نورې فرعي کمېټې جوړوي.

د بېلګې په توګه ښاغلي کریم د بندیانو د خوشې کولو لپاره د یوې عدلي کمېټې یادونه وکړه چې په کې به دولتي قاضیان او د اسلامي حزب استازي شامل وي.

د نوموړي په وینا دا کمېټه به هغه لیست چې حزب اسلامي دولت ته سپارلی وڅېړي او د دوو میاشتو څخه په کمه موده کې به د حزب اسلامي ټول سیاسي او نظامي بندیان خوشې کړي.

د حزب اسلامي استازي د دې اجرائیوي کمېسیون د څو نورو کمېټو په اړه زیاته کړه:

امین کریم
امین کریم

"په همدې ترتیب، د بندیزونو د لیرې کولو لپاره یوه کمېټه جوړېږي چې په کې به د افغانستان د بهرنیو چارو وزارت، حزب اسلامي او د ملي امنیت د شورا استازي غړیتوب ولري، دوی به د بندیزو د لیرې کولو موضوع تعقیبوي، همدارنګه به یوه کمېټه په سمدستي توګه د افغانستان بېلابېلو سیمو ته د شل زرو کډوالو د راستنولو لپاره د یو یا دوو کلونو په موده کې سرپناه او نور شرایط برابروي."

که څه هم تر دې مخکې د سولې د شورا مرستیال مولوي عبدالخبیر اوچقون ویلي و چې دا ګډ اجرائیوي کمېسیون به په د شنبې په ورځ کار پیل کړي، خو د حزب اسلامي استازي د جمعې په مازیګر ازادي راډیو ته وویل چې د بروکسل کنفرانس ته د حکومت چمتووالی ددې سبب شو چې د دې مشترک کمېسیون د کار پیل یوه یا دوه ورځې نور هم وځنډېږي.​

د حزب اسلامي له پلوه په دې اجرائیه کمېسیون کې امین کریم، غیرت بهیر او یو بل تن چې ښاغلي کریم یې نوم یاد نه کړ استازیتوب کوي.

نوموړي وویل چې د افغان حکومت له پلوه به ښايي خپله د ملي امنیت سلاکار حنیف اتمر او یا یې مرستیال او دوه نور کسان ددې ګډ کمېسیون د دایمي غړو په توګه معرفي شي.

د حزب اسلامي د مشر ګلبدین حکمتیار او افغان ولسمشر اشرف غني تر منځ د سولې موافقه د پنجشنبې په ورځ لاسلیک شوه.

د سولې د لاسلیک شوې موافقې له مخې به حزب اسلامي له وسله وال مخالفت لاس اخلي او په بدل کې یې حکومت یو شمېر غوښتنې منلي دي.

XS
SM
MD
LG