د ملګرو ملتونو سازمان، امریکا او ملګرو هېوادونو یې له حزب اسلامي سره د افغان حکومت د سولې هوکړهلیک له لاسلیک څخه هرکلی وکړ.
خو اصلي پوښتنه د ملګرو ملتونو د امنیت شورا او د امریکا د متحدو ایالتونو له تور لېسټه د حزب اسلامي د مشر او غړو د نومونو د ایستلو په باب مطرح شوه.
اوس امریکا وایي، دا موضوع به څېړي او په دې باب به د افغانستان د حکومت هره غوښتنه جدي ګڼي.
یو امریکایي چارواکي چې نه یې غوښتل نوم یې واخېستل شي رویټرز خبري اژانس ته ویلي، که د امنیت شورا فکر کوي چې په افرادو تحریم د افغانستان د سولې او ثبات په ګټه نه دی، امریکا هم اړتیا لري چې دا ډول اقدامات بیا وڅېړي.
حزب اسلامي ګوند ۱۵ کاله مخکې د امریکا لهخوا د نړیوالو ترهګرو په لېسټ کې شامل شو.
د افغانستان حکومت او حزب اسلامي تر منځ د هوکړهلیک په یوه ماده کې راغلي چې باید د حزب اسلامي د مشرانو او غړو نومونه د امریکا او امنیت شورا د تور لېسته وایستل شي.
تېره اوونۍ د امریکا او بریتانیا سفارتونو او په کابل کې د یوناما دفتر له حزب اسلامي سره د سولې هوکړهلیک د لاسلیک هرکلی وکړ.
خو په نیویارک کې د ملګرو ملتونو عمومي منشي بان کي مون یوه ویاند وویل چې د امنیت شورا ۱۵ واړه غړي باید د یوه مېز چاپیر کیني او په حزب اسلامي د تحریمونو د لېرې کولو په باب پریکړه وکړي.
د هوکړهلیک له لاسلیک وروسته د افغانستان د سولې شورا وایي، پر حزب اسلامي د تحریمونو لېرې کولو او له دغه ګوند سره د سولې هوکړهلیک د تطبیق لپاره، به سبا شنبې یو کمېسیون کار پیل کړي.
د سولې عالي شورا مرستیال مولوي عبدالخبیر اوچقون ازادي راډیو ته وویل، په حکمتیار او ځینو ملګرو یې د نړیوالو بندیزونو لېرې کول او دغه راز د حزب اسلامي ګوند د مشر راتګ ته تیاری، د دغه کمېسیون له اصلي کارونو څخه دي.
ښاغلي اوچقون زیاته کړه:
"د افغانستان اسلامي جمهوري دولت ژمنه کړې یو شمېر هېوادونو ته چې د حزب اسلامي رهبران یې په تور لېسټ کې شامل کړي وړاندیز وکړي څو هغوی له تور لېسټه وباسي. د شنبې له ورځې به یو اجرائیوي کمېسیون هم جوړېږي چې د سولې د تړون د مادو له پلي کېدو څارنه وکړي."
ولسمشر اشرف غني او ګلبدین حکمتیار د پنجشنبې په ورځ د یوه ویډیویي پیغام په ترڅ کې د سولې هوکړهلیک لاسلیک کړ.
د بشري حقونو ساتونکې ځینې ډلې له دغه هوکړهلیک او د ګلبدین حکمتیار اسلامي ګوند ته د قضایي مصئونیت په ورکولو نیوکه کوي.
د بشري حقونو د نظارت یوه څېړونکي پټریشیا ګوسمن وایي: د حکمتیار ستنېدل په افغانستان کې د مجازاتو د معافیت فرهنګ پیاوړی کوي.
دې دغه راز ویلي؛ له حکمتیار سره د هوکړهلیک لاسلیک کول، هغو کسانو ته توهین دی چې پخوا په افغانستان کې د دغه ګوند لهخوا وژل شوي او یا یې زیان لیدلی دی.
