د لاسرسۍ وړ لېنکونه

تازه خبر
دوشنبه ۴ زمری ۱۴۰۰ کابل ۰۵:۰۶

خبرونه

افغان او بهرنیو خاصو ځواکونو په جلال اباد ښار کې یو تن وژلی

د ننګرهار ولایت د مطبوعاتو د څانکې کارمند سنګرخان ازادۍ راډیو ته وویل،چې تېره شپه افغان خاصو ځواکونو د ځانګړو عملیاتو په ترڅ کې ورته د تره زوی فرید الله وژلی.

دی وآيي،چې مخکې هم امنيتي ځواکونو د ده تره زوی نیولی و،ولې هیڅ ډول اسناد او ثبوت يې پرې نه درلودل او راخوشې يې کړل.

سنګر وايي،دده تره زوی له هیچا سره اړیکه نه درلوده خو دا ځل بیا افغان اوبهرنیو خاصو ځواکونو داسې مهال د فریدالله په کور چاپه وهلې،چې په کور کې زنانه او ماشومان د اختر په تیاری لګیا وو، او دفریدالله په نامه کس يي وواژه.

د ورځې تازه خبرونه دلته ولولئ

د ننګرهار والي: جګړو کې د وژل شویو ۳۹ پاکستانيانو جسدونه پاکستان ته یوړل شول

په جګړو کې د وژل شویو پاکستاني جنګیاليو تابوتونه

د ننګرهار والي وايي په جګړو کې د وژل شویو ۳۹ پاکستاني وګړو جسدونه رسماً د سرې میاشتې له لارې پاکستان ته وړل شوي.

د افغان ولسمشر ستر سلاکار او د ننګرهار والي ضياءالحق امرخېل نن ویلي دغو پاکستانیانو د وسله‌والو طالبانو په لیکو کې جګړه کوله.

هغه زیاته کړې په دغو ۳۹ پاکستانیانو سربېره چې رسماً یې جسدونه سرې میاشتې وړي د لسګونه نورو پاکستاني جنګیالیو مړي هم له نورو بېلابېلو لارو پاکستان ته لېږدول شوي.

امرخېل ویلي افغان پوځیان د خپل هېواد دفاع کوي او که څوک د وژنو او لوټماریو لپاره راځي د ده په خبره همداسې به‌یې جسدونه لېږدول کېږي.

تر دې مخکې هم افغان چارواکو ادعاوې کړي چې د لسګونه پاکستاني جنګیالیو مړي پاکستان ته انتقال شوي.

پاکستاني چارواکي که څه هم نه‌مني چې د دوی اتباع په افغان جګړه کې ښکېل دي، خو هره ورځ په خواله رسنیو د دغه هېواد له بېلابېلو سیمو د هغو خلکو د جنازې اعلانونه کېږي چې د افغانستان په جګړه کې وژل شوي.

د المپیک سیالۍ؛ امریکا د تکواندو په برخه کې د سرو زرو یو مډال وګاټه

د المپيک تکواندو سیالۍ

د امریکا متحده ایالاتو د المپیکي لوبو په دوهمه ورځ د تکواندو په برخه کې د سرو زرو یو مډال وګاټه.

دا مډال اناستاسیا زولوتیک د ۵۷ کیلو وزن په پایلوبه کې د روسۍ لوبغاړې تاتیانا مینینا په ماتولو خپل کړ.

د تکواندو په بله پایلوبه کې ازبکستاني لوبغاړي اولګبیګ رشیدوف په ۶۸ کیلو وزن کې بریتانوی لوبغاړی برډلي سنډن مات کړ او د سرو زرو مډال‌یې وګاټه.

د المپيکي لوبو په دوهمه ورځ په ۱۰ ورزشي رشتو کې د سرو زرو د ۱۸ مډالونو په سر لوبې شوي.

سهار وختي بیا په نښې ویشتلو کې د افغانستان استازي مهدي یاوري ماته وخوړه.

یاوري د ۱۰ متره بادي ټوپک په نښې ویشتلو کې ګډون کړی و.

هغه له نورو نه کمې نمرې واخیستې او وروستیو پړاوونو ته له ورتګه پاتې راغی.

د توکیو په المپیکي لوبو کې پنځو افغان لوبغاړو برخه اخیستې.

تمه ده سې شنبه فرزاد منصوري د تکواندو په برخه کې سیالۍ پيل کړي.

د جولای په ۳۰مه فهیم انوري لامبو کوي او کیمیا یوسفي هم په ۱۰۰ متره منډو کې برخه اخلي.

د جولای په ۳۱مه به شاه محمود نورزی د ځغاستې یا اتلتیک لوبو کې ګډون وکړي.

کندهار کې '۳۳ مدني فعالان، قومي مشران او خبریالان' وژل شوي

ارشیف، د کندهار یوه روغتون کې بستر شوي ټپيان

د بشر حقونو خپلواک کمېسیون وايي، په کندهار کې د جون له ۲۴مې د جولای تر ۶مې پورې ۳۳ مدني فعالان، قومي مشران او خبریالان وژل شوي.

دا خبره د یاد کمېسیون ویاند ذبیح‌الله فرهنګ نن ازادي راډیو ته کړې.

هغه ویلي د راپورونو په اساس چې د بشر حقونو خپلواک کمېسیون ټول کړي دا هدفي وژنې په دواړو هم د طالبانو او هم د حکومت تر کنټرول لاندې سیمو کې شوي.

د بشري حقونو خپلواک کمېسیون په دغو وژنو جدي اندېښنه ښودلې او له طالبانو او هم حکومتي چارواکو یې غوښتي چې د ملکیانو خوندیتوب ته پوره پام وکړي.

تر دې څو ورځې مخکې د افغانستان د کورنیو چارو وزارت هم طالبان تورن کړي و چې د سپین بولدک د نیولو پر مهال‌یې ۴۰۰ کسان له کورونو ایستلي او له ډلې یې له ۱۰۰ زیات وژلي دي.

طالبانو په کلکه رد کړې چې د دوی ډلې دې دا وژنې کړې وي او د افغان چارواکو تورونه‌یې بې‌ځایه بللي دي.

د افغانستان دفاع وزارت: تېر یوه شپه او ورځ کې ۱۷۵ طالبان وژل شوي

ارشیف، د افغان هوايي ځواکونو حمله

د افغانستان دفاع وزارت ادعا کړې چې تېر یوه شپه او ورځ کې ۱۷۵ طالبان وژل شوي او ۸۴ نور ټپیان دي.

د دغه وزارت مرستیال ویاند فواد امان نن په خپل ټوېټر په دې اړه یو بیان ورکړی.

د امان په خبره وسله‌والو طالبانو ته دا مرګ‌ژوبله په ننګرهار، پکتیکا، لوګر، غزني، کندهار، هرات، بلخ، جوزجان، سمنګان، سرپل، هلمند، بدخشان، کندز او بغلان کې د افغان دفاعي او امنیتي ځواکونو په بریدونو کې اوښتې ده.

د دفاع وزارت دغه ویاند همداراز ویلي چې افغان پوځیانو د سړک غاړې نهه ماینونه هم شنډ کړي دي.

وسله‌والو طالبانو په دې لوی شمېر د افغان ځواکونو له‌خوا د وراوښتې مرګ‌ژوبلې په تړاو د افغان حکومت د ادعا په غبرګون تر اوسه څه نه‌دي ویلي.

د راپورونو له مخې جګړو د اختر تر لنډې وقفې وروسته چې په‌کې بریدونه لږ څه کم شوي وو یو وار بیا زور اخیستی دی.

د هند مهاراشترا ایالت کې ځمکې ښویېدنې او سېلابونو ۱۱۳ کسان مړه کړل

هند کې سېلاب

هندي چارواکي وايي په مهاراشترا ایالت کې ځمکې ښویېدنې او د سېلابونو راوتلو ۱۱۳ کسان مړه کړي.

د مهاراشترا د حکومت یوې ویاندې ساندیا ګرواري نن رسنیو ته ویلي چې ۵۰ نور کسان ټپیان شوي هم دي.

د هغې په خبره ژغورونکي ټیمونه په دې توانېدلي چې له شااوخوا ۹۰۰ زیانمنو شویو کلیو نه یو لک او ۳۰ زره کسان وژغوري او خوندي ځایونو ته‌یې بوځي.

مهاراشترا ایالت د هند یو مهم اقتصادي مرکز هم ګڼل کېږي.

معمولاً د کال همدې میاشتو جولای یا تر هغه مخکې جون کې د هند موسمي اورښتونه یا مونسن فصل پیلېږي چې په‌کې پخوا هم ګڼې ځمکې او کورونه لاندې شوي او خلکو ته په‌کې درنه مرګ‌ژوبله اوښتې.

د امریکا دفاع وزیر: افغان ځواکونه دې د طالبانو د پرمختګونو مخنیوی وکړي 

د امریکا دفاع وزیر لوید استېن

د امریکا دفاع وزیر ویلي افغان ځواکونه په دې برلاسي دي چې د طالبانو د پرمختګونو مخه ونیسي.

لوید استېن چې په الاسکا ښار کې د افغانستان د وضعیت په تړاو خبریالانو ته غږېده دا خبره وکړه.

ده وویل: "هغوی وړتیاوې لري. دا ظرفیت لري چې پرمختګ وکړي او واقعاً په دې وتوانېږي چې د طالبانو د ځینو پرمختګونو مخه ډب کړي، خو وبه ګورو چې څه کېږي."

هغه زیاته کړه افغان مشرتابه په دې لګیا ده چې د ګڼ مېشتو سیمو شاوخوا خپل پوځ ځای پر ځای کړي.

د استېن په خبره مهمه دا ده چې د طالبانو د مخنیوي لپاره ډاډ حاصل شي چې د دې ډلې سرعت کم کړای شي.

هغه داسې وخت دا خبره کړې چې افغان پوځيان د راپورونو له مخې په ۲۸ ولایتونو کې له طالبانو سره په جګړو بوخت دي.

کابل کې د اختر په لومړۍ ورځ د راکټي بریدونو طراح او ملګري یې ونیول شول

نیول شوي کسان

د افغانستان کورنیو چارو وزارت وایي، د اختر په لومړۍ ورځ د راکټي بریدونو طراح‌یې نیولی دی.

دا خبره د یاد وزارت ویاند میرویس ستانکزي نن په پيغام کې رسنیو ته کړې ده.

ښاغلی ستانکزی وايي: "د کورنیو چارو وزارت د پولیسو ځانګړي ځواکونه وتوانېدل چې د پنځمې ناحیې په مربوطاتو کې د طالبانو د ترهګرې ډلې یو سرګروپ د مومن په نامه سره له درېیو تنو نورو همکارانو یې ونیسي. دا ترورېستان د اختر په ورځ د راکټي بریدونو له طراحانو او ترسره کوونکو څخه دي. دوی د پغمان ولسوالۍ په نورو هدفي وژنو او ترهګریزو بریدونو کې هم لاس درلود."

د اختر په لومړۍ ورځ د کابل ښار په درېیو سیمو باندې راکټي بریدونه وشول، خو د معلوماتو له مخې چا ته په‌کې مرګ‌ژوبله ونه‌رسېده.

د اسلامي دولت ډلې یا داعش، د دغو راکټي حملو مسؤلیت ومانه.

د فرانسې خبري اژانس په حواله، داعش ډلې په خپل ټلګرام کې د دې حملې مسؤلیت منلی دی.

دغه راکټي حملې داسې وخت وشوې چې په جمهوري ریاست کې د لوی اختر لمونځ روان و.

د اختر د لمانځه له ترسراوي وروسته ولسمشر اشرف غني د دغو راکټي بریدونو په غبرګون طالبانو ته په خطاب وویل چې د راکټونو په زور واک ته نه‌شئ رسېدلی.

طالبانو لا په دې تړاو څه نه‌دي ویلي.

المپيک لوبې؛ د افغانستان لومړني استازي مهدي یاوري ماته وخوړه

د توکیو په المپيکي لوبو کې د افغانستان لومړنی استازی مهدي یاوري

د توکیو په المپيکي لوبو کې د افغانستان لومړني استازي مهدي یاوري ماته وخوړه.

یاوري د ۱۰ متره بادي ټوپک په نښې ویشتلو کې ګډون کړی و.

هغه له نورو نه کمې نمرې واخیستې او وروستیو پړاوونو ته له ورتګه پاتې راغی.

د توکیو په المپیکي لوبو کې پنځو افغان لوبغاړو برخه اخیستې. تمه ده سې شنبه فرزاد منصوري د تکواندو په برخه کې سیالۍ پيل کړې.

د جولای په ۳۰مه فهیم انوري لامبو کوي او کیمیا یوسفي هم په ۱۰۰ متره منډو کې برخه اخلي. د جولای په ۳۱مه به شاه محمود نورزی د ځغاستې یا اتلتیک لوبو کې ګډون وکړي.

سوریه کې دوه ترکي پوځیان وژل شوي او دوه نور ژوبل دي

ارشیف، سوریه کې یو شمېر ترکي پوځیان

ترکیه وايي، دوه پوځیان‌یې د سوریې په شمال کې وژل شوي او دوه نور ژوبل شوي دي.

د ترکیې دفاع وزارت پرون/ شنبه وویل، پوځیانو ته‌یې هغه مهال مرګ‌ژوبله واوښته چې د هغو پر کاروان برید وشو.

دغه وزارت همداراز ویلي چې له دې پېښې وروسته د ترکیې ځواکونو غچ اخیستونکي عملیات پیل کړي چې لا هم دوام لري.

ویل شوي چې پر ترک پوځیانو د ترکیې د شمال په الباب سیمه کې برید شوی دی.

سیستان او بلوچستان کې د ایران د سپاه پاسداران څلور وسله‌وال غړي ووژل شول

د ایران د سپاه پاسداران نښان

د راپورونو له مخې، په یوه وسله‌واله نښته کې د ایران د سپاه پاسداران څلور وسله‌وال غړي د دغه هېواد په سیستان او بلوچستان ولایت کې وژل شوي دي.

نښته د سیستان او بلوچستان ولایت د خاش په بلوڅ مېشته سیمه کې شوې، خو د هغې د څرنګوالي په اړه نور جزئیات نه‌شته.

ایراني رسنیو پرون/ شنبه د سپاه د ځمکني ځواک په قول د دغو څلورو وسله‌والو د وژل کېدو دلیل د دولت له وسله‌والو مخالفانو سره نښته بللې چې دوی یې اشرار بولي.

خاش د سیستان او بلوچستان ولایت له مرکز زاهدانه ۱۸۵ کیلومتره لیرې جنوب خوا ته دی.

المپیک سیالۍ؛ افغان لوبغاړی مهدي یاوري د نښې ویشتنې برخه کې سیالۍ ته وځي

افغان لوبغاړی مهدي یاوري

ټاکل شوې ده چې نن د توکیو د ۲۰۲۰ کال په المپیک سیالیو کې افغان لوبغاړی مهدي یاوري د نښې ویشتنې په برخه کې سیالۍ ته ووځي.

د افغانستان د المپیک ملي کمېتې ویاندې بنفشې فیضي ازادي راډیو ته وویل، له افغان لوبغاړي مهدي سره سیالۍ ته د بېلابېلو هېوادونو ۴۵ نور لوبغاړي ولاړ دي.

دا سیالۍ چې وړمه ورځ پيل شوې د راتلونکې اګسټ میاشتې تر ۸مې نېټې دوام کوي.

د افغانستان د المپیک ملي کمېټې د معلوماتو له مخې، په دې سیالیو کې به د افغانستان په ګډون له ۲۰۷ هېوادونو څخه ۱۱ زره ۳۰۰ لوبغاړي په بېلابیلو سیالیو کې ولوبېږي.

له افغانستانه پنځه لوبغاړي د المپیک په سیالیو کې ګډون لري چې يوه‌یې مېرمن ده.

روس او تاجکستاني چارواکي د 'طالبانو د ګواښ' د مخنیوي پر اقداماتو غږېدلي

د افغانستان او تاجکستان پوله کې ځای پر ځای شوي روسي ټانکونه

تاس خبري اژانس راپور ورکړی چې د روسیې او تاجکستان د دفاع وزیرانو د هغو ګډو اقداماتو په اړه خبرې کړې دي چې هدف‌یې د دوی په وینا د افغانستان او تاجکستان له ګډ سرحد څخه د طالبانو د ګواښ مخنیوی دی.

تاس د روسیې د دفاع وزارت د سرچینو په حواله وايي، سرګي شوېګو او شېر علي میرزا پرون شنبه د افغانستان او تاجکستان په ګډ سرحد کې د روان وضعیت او د افغانستان د ناامنیو له کبله د احتمالي ګواښونو د مخنیوي لپاره د ګډو تدابیرو په اړه بحث وکړ.

په داسې حال کې چې له افغانستانه د نړیوالو ځواکونو د پوره وتلو د وخت له نږدې کېدو سره د افغانستان امنیتي وضعیت په خرابېدو دی، روسیې د جمعې په ورځ ژمنه وکړه چې له تاجکستان سره به مرسته وکړي څو د افغانستان په سرحد کې یوه نوې سرحدي قرارګاه جوړه کړي.

روسیه او تاجکستان همداراز په پام کې لري چې په راتلونکې میلادي میاشت کې د ګډ سرحد په اوږدو کې پراخ پوځي تطبیقات وکړي.

شاه محمود قریشي له چینايي مشرانو سره د 'افغانستان سولې' په اړه بحث کوي

د پاکستان د بهرنیو چارو وزیر شاه محمود قریشي (ښی) او د چین د بهرنیو چارو وزیر وانګ یي

د پاکستان د بهرنیو چارو وزیر وايي چې پیکېنګ ته د سفر پر مهال به له چینايي مشرانو سره د افغانستان د سولې په اړه بحث وکړي.

شاه محمود قریشي پر ټویټر په یوه بیان کې لیکلي، خوشحاله دی چې په چین کې دی او له خپل ورور د چین د بهرنیو چارو له وزیر وانګ یي سره د ستراتېژیکو دوه اړخیزو اړیکو، اقتصادي او امنیتي همکاریو، د افغانستان د سولې او پخلاینې او نورو مسایلو په اړه د بحث لپاره ګوري.

ښاغلي قریشي په یوه جلا ټویټ کې سوله او ثبات د افغانستان د ټولنیز اقتصاد د پرمختګ او سوکالۍ لپاره مهم بللی او لیکلي یې دي، دی له ټولو ښکېلو اړخونو غواړي چې اوربند وکړي او په ګډه کار وکړي څو هر اړخیز، ټول‌شموله او د خبرو له لارې سیاسي حل ته ورسېږي.

پاکستان ته چې د طالبانو په ملاتړ تورن دی، د افغانستان سولې په بهیر کې د یوه مهم لوبغاړي په سترګه کتل کېږي. همداراز چین د افغانستان د سولې په مسئله کې ډېره لېوالتیا ښودلې.

د شبرغان ښار د جامع جومات خطیب ووژل شو

ارشیف، شبرغان ښار کې یو وژل شوی کس

د شبرغان ښار د جامع جومات خطیب په ډزو ووژل شو.

د جوزجان د امنیه قوماندانۍ ویاند مسعود ندیم تېر ماښام ازادي راډیو ته وویل، مفتي رفیع‌الله پرون شنبه ماښام مهال د څو وسله‌والو کسانو له‌خوا چې په سیمرغ ډوله موټرو کې سپاره وو، په جومات کې دننه د کلاشنیکوف په ډزو ووژل شو.

ښاغلي ندیم زیاته کړه چې د دې قتل علت تر اوسه نه‌دی معلوم، خو د تحقیقاتو لپاره یوه ډله مؤظفه شوې ده.

د امنیه قوماندانۍ ویاند زیاته کړه چې بریدکوونکي له سیمې څخه تښتېدلي دي او د پېښې په تړاو تر اوسه څوک نه‌دي نیول شوي.

د جوزجان د ارشاد، حج او اوقافو د ریاست چارواکي وايي چې د شبرغان ښار د مولانا جلال‌الدین مېنې د جامع جومات خطیب یو بې‌پرې سړی و او له چا سره‌یې دښمني نه‌لرله.

مفتي رفیع‌الله په دې وروستیو کې په خپل مالي لګښت د نجونو او هلکانو لپاره یوه دیني مدرسه جوړه کړې وه.

ایران د څو اعتراض کوونکو د وژل کېدو په اړه د ملګرو ملتونو انتقادونه رد کړل

د ایران خوزستان ولایت کې اعتراضونه

د ایران حکومت په خوزستان ولایت کې د اعتراضونو په ترڅ کې د څو کسانو د وژل کېدو په اړه د ملګرو ملتونو انتقادونه رد کړل.

د ملګرو ملتونو د بشري حقونو لویې کمېشنرې میشل باشلې د جمعې په ورځ په خوزستان کې چې د تېلو پراخې زېرمې لري د تېرو څو اوونیو اعتراضونو په ترڅ کې د یو شمېر کسانو وژنه او د ډېرو نورو نیول وغندل.

د ایران د بهرنیو چارو وزارت ویاند سعید خطیب‌زاده پرون شنبه د مېرمن باشلې وینا غیر مسلکي او د ایران په کورنیو چارو کې لاسوهنه وبلله.

په تېره یوه اوونۍ کې د خوزستان خلک لارو او واټونو ته راووتل او د اوبو د کمښت پر وړاندې یې چې علت‌یې وچکالي ده په لاریونونو لاس پورې کړ.

په عین حال کې پر ټولنیزو رسنیو په خپرو شویو وېډیوګانو کې ښکاري چې د دې اعتراضونو لمن نورو ولایتونو ته هم غځېدلې ده.

وچکالۍ او د کرونا وبا خپرېدو له یوې خوا او د نړیوالې ټولنې بندیزونو له بلې خوا د ایران اقتصاد سخت ځپلی دی.

نور راوښيه

XS
SM
MD
LG