د اسراییلو په شمال کې د روش پنا په ښارګوټي باندې حزبالله ډلې ته د منسوبو مرمیو په لګېدو سره لوی اور لګېدلی دی.
د اسراییل پوځ ویلي چې د حزبالله لهخوا شاوخوا ۱۶۰ مرمۍ په اسراییلو لګېدلي دي.
امریکا، د ایران له ملاتړه برخمن حزبالله ډله د یوه ترهګر سازمان په توګه پېژني او اروپايي ټولنې د دې ډلې پوځي څانګه په تور لېست کې اچولې ده.
د حزبالله سیاسي څانګه د لبنان په پارلمان کې څوکۍ هم لري.
د راپورونو له مخې اور وژونکو پرون د دې لوی اور د مړه کولو هڅې کولې.
لا د احتمالي مرګژوبلې په اړه رپوټ نه دی ورکړل شوی.
حزبالله د ۲۰۲۳م کال د اکټوبر له اوومې وروسته کله چې حماس پر اسراییلو برید وکړ د اسراییلو په لور توغندي او مرمۍ توغوي.
اسراییلو تر شاوخوا یوه کال هوايي بریدونو وروسته بلاخره د اکټوبر په لومړۍ په لبنان کې ځمکني عملیات هم پيل کړل.
د اسراییلو په بریدونو کې وروستۍ اوونۍ څه باندې ۱۷۰۰ کسان وژل شوي چې له څلورو یوه برخه یې ښځې او ماشومان دي.
پر لبنان د اسراییلو د بریدونو یو انځور
د حزب الله په بریدونو کې چې اکثر یې د ټانک ضد میزایلونه دي د اسراییلو پنځوس عسکر وژل شوي دي.
اخوا اسراییلي پوځ پرون هم په هغو سیمو چې دوی یې د حزبالله د قوماندې مرکز یاد کړی بریدونه کړي دي.
اسراییلو داسې وخت د حزبالله په اهدافو بریدونه کړي چې دا اوونۍ د اسراییلو د صدراعظم بنیامین نتنیاهو هستوګنځی په یوه ډرون برید سره هدف وګرځول شو.
نتنیاهو حزب الله ډله تورنه کړې چې د ده په کور یې برید کړی، خو ویلي یې دي چې د دې کار تاوان به ورکړي.
په لبنان سربېره، د راپورونو له مخې د غزې په شمال کې په بیت لاهیا سیمې باندې د اسراییلو په بریدونو سره د لږ تر لږه ۸۷ کسانو د وژل کېدو یا تري تم کېدو خبر ورکړل شوی دی.
لومړی ژغورونکو د ۷۳ کسانو د مړینې خبر ورکړی و.
دا سیمه کال مخکې پر غزې د اسراییلو د بریدونو په پيل سره له لومړنیو اهدافو و.
د حماس تر کنټرول لاندې غزې روغتیا وزارت دا هم ویلي چې لږ تر لږه ۴۰ نور کسان په بیت لاهیا باندې په دې برید سره ټپیان شوي دي.