افغانستان ته د پاکستان د ځانګړي استازي اصف دراني له سفر وروسته، د پاکستان د بهرنیو چارو وزارت وايي، هیله لري چې د طالبانو حکومت له ترهګرۍ سره د مبارزې په اړه پر خپلو ژمنو عمل وکړي.
د دې وزارت ویاندې زهرا بلوچ پرون، په پاکستان کې د وروستیو بریدونو په تړاو د افغانستان د خاورې د کارول کېدو په اړه د یوې پوښتنې په ځواب کې وویل، پاکستان له طالب چارواکو سره د خپلو اندېښنو په اړه خبرې کړي او دوام به ورکړي.
هغې زیاته کړه، د طالبانو حکومت د ترهګرۍ د ځپلو په برخه کې له پاکستان او نړیوالې ټولنې سره ژمنې کړي او دا ډاډ یې دوی ته ورکړی چې خاوره به یې د پاکستان پر ضد د ترهګرۍ لپاره نه کارول کېږي.
د افغانستان لپاره د پاکستان ځانګړی استازی اصف درانی د جولای له ۱۹مې تر ۲۱مې په کابل کې و.
هغه له طالب چارواکو سره د امنیتي موضوعاتو په ګډون په بېلابېلو مسایلو بحثونه کړي.
دراني کابل ته له سفر وړاندې ویلي وو، چې یو مهم بحث به یې د هغو اندېښنو په اړه وي چې ګنې پاکستاني طالبان په پاکستان کې د بریدونو لپاره د افغانستان له خاورې ګټه اخلي.
د طالبانو حکومت دا تورونه رد کړي دي.