د اسلاماباد محکمې تر راتلونکې میاشتې پورې د پخواني صدراعظم عمران خان د ضمانت غوښتنه ومنله.
د عمران خان د تحریک انصاف ګوند یوه ویاند احمد جنجوعه نن وویل، د تروریزم ضد محکمې د حکم له مخې خان د جون تر اتمې نېټې نه نیول کېږي.
عمران خان په روانه مې میاشت کې د تحریک انصاف ګوند د پلویانو د اعتراضونو پرمهال د تروریزم په ګډون په اتو قضیو کې تورن دی.
که څه هم خان د ضمانت په بدل کې د دوو اونیو لپاره خوشې شوی، خو د نړیوالو خبري اژانسونو د راپورونو له مخې دا احتمال شته چې دی بیا ونیول شي، ځکه له سلو په زیاتو قضیو کې تورن دی.