په داسې حال کې چې په د سوډان کې کورنۍ جګړه نن نهمې ورځې او د دغه هېواد پلازمېنې خرطوم ته وغځېده، د طالبانو حکومت وايي په هغه هېواد کې د بندو ۱۲۰ افغانانو د را ایستلو هڅه کوي.
د طالبانو د حکومت ویاند ذبیحالله مجاهد که څه هم د يادو افغانانو په اړه چې څوک دي، ډېر جزیات نه ورکوي خو ازادي راډیو ته یې وویل، د دوی د بهرنیو چارو د وزارت له لوري یې د پېژندنې کار پیل شوی او که اړتیا شوه په خوندي ډول به له هغه هېواده وویستل شي.
"په دې اړه د بهرنیو چارو وزارت هڅې روانې ديمجاهد
نوموړی وايي: "په دې اړه د بهرنیو چارو وزارت هڅې روانې دي، په دې کې به هغه افغانان چې په سوډان کې دي تشخیص شي او هم به د خطر اندازه معلومه شي، که هلته دوی ته خطر موجود وو نو د را ایستلو کار به یې پیل شي او په خوندي ډول به راوویستل شي، په دې اړه د بهرنیو چارو وزارت په کار مصروف دی."
نوموړي په دې اړه ډېر جزیات ورنه کړل.
ذبيحالله مجاهد
ازادي راډیو هڅه وکړه، چې دا معلومات د طالبانو حکومت د بهرنیو چارو له وزارت تر لاسه کړي، خو د یاد وزارت مرستیال ویاند ضیا احمد تکل د راپور تر خپرېدو پورې زموږ پوښتنه ځواب نهکړه.
دغه شان د سوډان په جګړه کې د بندو پاتې افغانانو د کورنیو په موندلو او ورسره په خبرو کولو هم بریالي نهشوو.
د طالبانو د حکومت د بهرنیو چارو سرپرست وزیر امیر خان متقي هم تېره ورځ په خوست کې یوې غونډې ته د خبرو پر مهال ویلي وو، دوی د سوډان په جګړه کې د بندو ۱۲۰ افغانانو د را ایستلو هڅه کوي.
ښاغلي متقي ادعا وکړه چې حکومت یې له دې وړاندې په ایران، پاکستان او ترکیه کې زرګونه نور افغانان چې د قانوني اسنادو د نه درلودلو له امله هلته بندیان وو هم راخوشې کړي دي.
دا ادعا په داسې حال کې کېږي، چې د پاکستان په زندانونو د افغان بندیانو مدافع وکیلې منیزې کاکړ د وري په اته ویشتمه نېټه ازادي رادیو ته ویلي وو، تر اوسه شاوخوا سل تنه افغانان د ویزې یا نورو لازمو اسنادو د نه درلودلو په تور په کراچۍ او د سند ایالت د نورو ښارونو په زندانونو کې بندیان دي.
په دې اړه نور: منيزه کاکړ: تر اوسه د پاکستان په زندانونو کې شاوخوا سل تنه افغانان بنديان ديد طالبانو حکومت په داسې مهال په سوډان کې د بندو افغانانو د رایستلو د هڅو خبره کوي چې ياد هېواد له تېرو نهه ورځو راهیسې د سختو کورنیو جګړو شاهد دی.
دا جګړه په سوډان کې د پوځ او د (ار ایس ایف) د ملېشه ځواک ترمنځ ده، دا دوې ډلې چې پخوا سره متحدې وې، په ۲۰۲۱ کې یې په ګډه د کودتا له لارې واک ترلاسه کړ.
تېره ورځ جګړه په پلازمېنه خرطوم کې د ولسمشرۍ ماڼۍ په شمول د حساسو دولتي ودانیو شاوخوا ته وغځېده، او بېلابېلو هېوادونو له خرطوم څخه د خپلو اتباعو د ایستلو اعلان وکړ.
د رویټرز خبري اژانس د راپور له مخې، د مهمو دولتي ودانیو د نیولو پر سر د سختې جګړې له کبله د پلازمېنې ډېر اوسېدونکي بند پاتې دي، ځکه چې هوايي ډګر غیر فعال شوی او په واټونو کې خطر دی.